Read lunyore YOHANA 3 Bible Online

YOHANA 3 - lunyore bible

YOHANA 3

¹Yaliho omundu womukhosi kwa Bafarisayi, eliira lilie Nikodemu, omwemeli wa Bayahudi.

²Omwene uyu yetsa khu Yesu butukhu, namubool'la “Rabi, khwamanya mbu oli omwibaali owarumwa na Nyasaye. Abulaho omundu onyala okhukhola akamangalimwa yaka akokholanga ibe, Nyasaye narali halala n'naye.”

³Yesu namukalusia, “Ne khubool'langa tooto, abulaho omundu onyala okhulola Obwami bwa Nyasaye, nasili okhwibulwa esiakhabili.”

⁴Nikodemu namureeba, “Omundu yakhanyala mbwena okhwibulwa nali omusakhulu? Siahene sianyala okhukalukha munda mwanyina mwana, ma yebulwe olwakhabili tawe.”

⁵Yesu namukalusia, “Khubool'langa tooto, omundu narebulwa namaatsi nende Omwoyo sianyala okhwinjila mu Bwami bwa Nyasaye tawe.

⁶Esiebulwa nomubili ne siomubili, ne esiebulwa no Mwoyo ne siomwoyo.

⁷Orachenya sichila khubooleye, kahel'le mwesi mwibulwe esiakhabili.

⁸Omuyeka kuhungutsanga hakwenyele; Ibe ohulilanga amayoosi kakwo, nebutswa siomanya hakurula nohomba hakutsia. Nimbwo kali khusiomundu owibuywe no Mwoyo.”

⁹Nikodemu namureeba, “Amang'ana yaka kakhanyala mbwena okhuba mbwo?”

¹⁰Yesu namukalusia, “Ibe oli omwibaali omukhongo mu Baisiraeli, ne yaka siokamanyile tawe?

¹¹Khubool'langa tooto mbu khuboolanga khukakhumanyile, khandi khukobokhelanga yako akakhwalola, nenywe simuhuchil'langa amang'ana kefwe tawe.

¹²Nimba nimubool'la amang'ana akesibala ne nimurahuchil'la, mwakhasubila mbwena nimba nimubool'la amang'ana komwikulu?

¹³Abulaho omundu owaniina okhutsia mwikulu narali Omwana wo Mundu, owekha okhurula mwikulu.”

¹⁴Singa obwa Musa yachingula inzokha yomukasa khumusaala musitsiimi, nimbwo kahel'le Omwana wo Mundu okhuchingulwa khumusaala;

¹⁵mbu siomundu osubila khuye abe nobulamu oburahwa.

¹⁶Okhuba Nyasaye yayanza abomusibala okhusila nahana Omwana uwe omutelwa mbu omundu oba namusubila aratiba, nebutswa abe nobulamu oburahwa.

¹⁷Okhuba Nyasaye siyaruma omwana uwe musibala akhalachile abomusibala esiina; yamuruma mbu abe omuhonia wesibala.

¹⁸Omundu osubilanga khuye siakhalachilwa esiina; ne orasubilanga wamala okhukhalachilwa sichila siyasubila mu Mwana wa Nyasaye omutelwa tawe.

¹⁹Yikhu nikhwo okhukhalachilwa: obulafu bwitsile musibala, ne abandu bayanzile esiilima okhuyomba obulafu; sichila emilimo chiabwe nemibi.

²⁰Siomundu okholanga obubi abihil'lwanga obulafu, kata siyakhetsa mubulafu tawe, khase emilimo chichie emibi chilalolekha.

²¹Ne okholanga akatooto yetsanga mubulafu kho obulafu bumanyie mbu achikholanga mukhwelela khu Nyasaye.

²²Inyuma we yako Yesu yetsa nende abechi baabe musibala sie Buyahudi, nahongayo n'nabo nabaputisa.

²³Yohana naye yali nabaputisanga mu Ainoni, nayo yali ahembi Salimu, sichila amaatsi amenji kali ebwene yiyo. Abandu nibetsayo khuye nibabaputiswa. (

²⁴Yaka kekhola Yohana nasili okhurebwa mubuhambe.)

²⁵Abalala khubechi ba Yohana nibachiaka okhuhingana no Muyahudi[2] khumang'ana kokhwesiiya.

²⁶Nibetsa khu Yohana, nibamubool'la, “Omwibaali witsul'langa uyo owabeye halala n'nawe khuluchelekha lwa Yorodani, owa wali okhukobokhela? Lola, owatsana uyo abaputisanga, ne abandu bosi batsitsanga khuye.”

²⁷Yohana nakalusia, “Omundu sianyala okhukhola ling'ana Nyasaye naramuhuchiliye tawe.

²⁸Inywe abene muli abakobokheli mbu ndali okhuboola, ‘Ise sindi Masihi tawe, nebutswa ndarumwa imbeli uwe.’

²⁹Oli nomukhaana omweha niye omusaatsa wes'selelo; nebutswa omulina womusaatsa mwene es'selelo, osinjilanga namuhulila, asangalanga olwa ahulilanga omwoyo kwomusaatsa wes'selelo. Nimbwo obusangali bwanje yibu bwitsuye.

³⁰Kahel'le uyo akalihibwe nase ndutuhibwe.”

³¹Uyo owitsanga okhurula mwikulu nomukhongo khu bosi. Uyo orulanga musibala nomundu owomusibala ne aboolanga khumang'ana kesibala. Orulanga mwikulu ali ikulu khu bosi.

³²Aka yalola nende aka yahulila, niko akaribulanga, ne abulaho omundu owahuchil'la amang'ana kaake.

³³Ohuchiliye amang'ana kaake ureye esimanyilo sisie khu yaka, mbu Nyasaye nowatooto.

³⁴Okhuba owa Nyasaye yaruma aboolanga amang'ana ka Nyasaye sichila Nyasaye amuhetsanga omwoyo kukwe mubwitsulu.

³⁵Papa wayanza Omwana, ne wamuha ebindu biosi mubunyali bubwe.

³⁶Naye uyo osubilanga mu Mwana ali nobulamu oburahwa; nebutswa orahulilanga Omwana, sialaba nobulamu tawe, nebutswa lirima lia Nyasaye lilaba khuye.