Read lunyore YOHANA 4 Bible Online

YOHANA 4 - lunyore bible

YOHANA 4

¹Omwami yamanya mbu Abafarisayi bahuliye mbu Yesu anyoolanga nabaputisa abechi abenji okhuyomba Yohana. (

²Kali Yesu omwene siyabaputisakhwo omundu tawe, nebutswa abechi baabe nibo ababaputisa.)

³Kho yarula musibala sie Buyahudi nakalukha Galilaya.

⁵Niyoola hetaala lia Samaria elilangwa Sukaru, ahembi khwiloba lia Yakobo yali niyaha omusiani uwe Yosefu.

⁶Ahene yaho sialiho esitaho sia Yakobo, ne khulwa mbu Yesu yali nachonyele noluchendo lulwe, yekhala hasitaho. Tsiali singa etsisaa tsisasaba tsiam'basu.

⁷Omukhasi Musamaria niyetsaho okhutaha amaatsi, ne Yesu namubool'la, “Mbekhwo amaatsi nywe.” (

⁸Abechi baabe bali nibatsiiye mwitaala okhukula ebiokhulia.)

⁹Omukhasi Omusamaria namubool'la, “Oli Omuyahudi, nase ndi Omusamaria, kho wakhasaba mbwena amaatsi kokhunywa.” (Abayahudi sibahambananga mwing'ana liosi nende Abasamaria tawe.)

¹⁰Yesu namukalusia, “Olaba omanyile khwo esihanwa sia Nyasaye ahaananga nende uyo okhusabanga amaatsi kokhunywa, wakhamurebele naye yakhakhuheye amaatsi akahaananga obulamu.”

¹¹Omukhasi namubool'la, “Omwami, sioli nende esiokhutayila tawe, ne esitaho nasio siatsia hasi buli. Wakhahinia hena amaatsi akahaananga obulamu yako?

¹²Kuka wefwe Yakobo niye owakhuhelesia esitaho yisi. Ne yanywetsanga mwo omwene, nende abaana baabe, khandi ebiayo bibie. Ibe oli omukhongo okhuyomba kuka wefwe Yakobo?”

¹³Yesu namukalusia, “Siomundu onywetsanga amaatsi yaka obuluho bwakhamuhamba khandi,

¹⁴nebutswa siomundu wosi onywetsanga amaatsi akandimuha obuluho sibwakhamuhamba khandi tawe. Amaatsi akandimuha ise, kakhabe muye esitaho siamaatsi akasenukhanga akobulamu nikamuha obulamu oburahwa.”

¹⁵Omukhasi namubool'la, “Omwami, umbekhwo amaatsi tsana, nambule okhuba nobuluho, kata mbule okhwitsanga hano okhutaha amaatsi.”

¹⁶Yesu namubool'la, “Tsia olange omusaatsa uwo, ma mwitse hano n'naye.”

¹⁷Omukhasi namukalusia, “Ise sindi nomusaatsa tawe.” Yesu namubool'la, “Oli habwene olwa obooye sioli nomusaatsa tawe.

¹⁸Wali okhuteesibwa nende abasaatsa barano, ne owoli n'naye luno siali omusaatsa uwo tawe. Kho umbooleye akatooto.”

¹⁹Omukhasi naboola “Omwami, ndutsi ibe oli omuroobi.

²⁰Abakuka befwe bekayakayanga Nyasaye musikulu yisi ne inywe muboolanga mbu, Yerusalemu niho hakwan'ne abandu okhwekayakayila Nyasaye.”

²¹Yesu namubool'la, “Omukhasi, huchil'la, inyinga yitsanga eya abandu sibaliekayakaya Papa, musikulu yisi, nohomba ha Yerusalemu tawe.

²²Inywe mwekayakayanga esia muramanyile; Ifwe khwekayakayanga esia khumanyile; sichila obuhoni bwitsanga okhurula mu Bayahudi.

²³Nebutswa inyinga yitsanga, ne nayo imal'le okhwola, olwa abekayakayi batooto, baliekayakaya Papa mumwoyo nende mubwatooto, okhuba Papa arunanga abandu yabo baabe abekayakayi baabe.

²⁴Nyasaye abetsanga Omwoyo nabo abamwekayakaya bahel'le bamwekayakaye mumwoyo nende mubwatooto.”

²⁵Omukhasi namubool'la, “Ndamanya Masihi yetsanga (olangwanga Kristo) ne nyinga yakhetse alikhuribul'la amang'ana kosi.”

²⁶Yesu namubool'la, “Ise obool'lananga n'nawe nise owatsana.”

²⁷Yaho abechi ba Yesu bamala nibetsa, ma nibahuka okhumunyoola nal'lomanga nende omukhasi uyo. Nebutswa siyaliho kata mulala khubo owareeba omukhasi, “Orunanga sina?” tawe. Nohomba owareeba Yesu “Obool'lananga n'naye busina?”

²⁸Khe omukhasi yalekha isongo yiye, natsia mwitaala nabool'la abandu,

²⁹“Hambe mulole omundu oumbooleye akandali okhukhola kosi. Yakhaba nali Masihi noho?”

³⁰Kho barula mwitaala, nibatsia khu Yesu.

³¹Munyinga yene yiyo abechi baabe, bamusaaya nibamubool'la, “Omwibaali, liakhwo esindu.”

³²Nebutswa yababool'la, “Ise ndi nende ebiokhulia ebia muramanyile tawe.”

³³Khe abechi nibarebana, “Omundu yakhaba namulereye ebiokhulia noho?”

³⁴Yesu nababool'la, “Ebiokhulia bianje bibetsanga okhukhola obulalilo obwe uyo owaruma, khandi okhumalilisia emilimo chichie.

³⁵Inywe simuboolanga ‘Chisili emiesi chine, khe lichesa naliole noho?’ Nase mubool'langa, Tikul'le tsimoni tsienywe, muhenge emikunda, sichila chiamala okhulaba chicheswe.

³⁶Omundu ochesanga anyoolanga omurungo, ne abunjelesianga ebiamo biobulamu oburahwa. Kho omundu orakanga nende ochesanga bekhoyelanga halala.

³⁷Khulwa akene yako okhuboola yikhwo nokhwatooto mbu ‘Mulala arakanga ne oundi nachesa.’

³⁸Nase ndamurumile okhuchesa yibio ebia muranyakhana khwo nimuraaka. Abandu bandi nibo abanyakhana nibaraka, nenywe munyoolanga obukhala khumilimo chiabwe.”

³⁹Abasamaria abenji bomwitaala yilio basubila muye khulwa obukobokholi bwomukhasi uyo, owali nababooleye mbu, “Yambooleye kosi akandakhola.”

⁴⁰Kho olwa Abasamaria bali nibetsele, bamuhomba mbu amenye n'nabo ne Yesu nakonayo amatukhu kabili.

⁴¹Ne abandi abenji basubila khulwa amang'ana kaake,

⁴²ma nibabool'la omukhasi tsana, “Luno sikhusubiye khulwo okhuboola khukhwo tawe, nebutswa khusubiye sichila khuhuliye ifwe abene, ma khumanyile mbu ye niye omuhonia wabomusibala.”

⁴³Olwe inyuma wamatukhu kabili Yesu yarulayo natsia Galilaya.

⁴⁴Okhuba Yesu mwene yakobokhela okhuboola mbu, “Omuroobi siabetsanga noluyali musibala siabwe siene tawe.”

⁴⁵Olwa yali niyol'le Galilaya, Abagalilaya bamwinjisia sichila bali mbaluutsi kosi aka yakhola mu Yerusalemu olwali khwitukhu lie Pasaka; okhuba nabo bali nibatsiyeyo khulwe lisabo.

⁴⁶Ma Yesu yakalukha mu Kana lia Galilaya, aha yali niyakalukhania amaatsi okhukwa ewaini. Ne ebwene yiyo yaliho omundu omurumikhili womuruchi, omwanawe yali nalwalanga Kaperinaumu.

⁴⁷Nyinga yahulila Yesu urul'le Ebuyahudi witsile Galilaya, yatsia khuye namusaaya mbu yetse Kaperinaumu okhuhonia omwana uwe, owali nali ahembi okhufwa.

⁴⁸Kho Yesu namubool'la, nimuba nimuralola ebilolelo nende akokhuchenya, simwakhasubila kata nahati tawe!

⁴⁹Omurumikhili wo Mwami namubool'la “Omwami, yanza khutsieyo omwana wanje nasili okhufwa.”

⁵⁰Yesu namubool'la, “Tsia butsia ingo omwanawo alahona.” Omusaatsa uyo nasubila amang'ana ka Yesu yamubool'la ma natsia.

⁵¹Ne olwa yali natsitsanga nasili khunjila abarumikhili baabe nibamwakan'na nibaboola mbu “Omwana uwo nomulamu.”

⁵²Naye nabareeba mbu “Tsiali etsisaa tsianga etsia yachiachiye mwo okhuba omulamu?” Nabo nibaboola, “Yachiachile okhuba bulahi olwabeye khusaa yakhane nakhataru.”

⁵³Ne samwana namanya niyo esaa yatsana eya Yesu yali namubooleye mbu “Omwana uwo yetsa okhuhona.”

⁵⁴Isi nisio esilolelo siamangalimwa siakhabili esia Yesu yakhola olwa yali narul'le Ebuyahudi okhutsia Galilaya.