Read lunyore YOHANA 5 Bible Online

YOHANA 5 - lunyore bible

YOHANA 5

¹Inyuma we yaka Yesu yatsia Yerusalemu khwisabo lia Bayahudi.

²Ne ha Yerusalemu yaho hasilibwa siamakondi lialiho litubango elialangwa mu Luheburania Bethsaida ne liali namahindu karano.

³Omukanda kwabandu abalwaye bali nibakonangamwo, ababofu, abalema, nende abanyela. [Balindil'langa amaatsi katubuukhe,

⁴sichila om'malaika wo Mwami yalinji okhwikha mwitubango isi lusi atubuule amaatsi. Omulwaye oba naranga okhwikhamwo, amaatsi nikatubuukhile, yahonanga obulwaye bwosi obuba nibwamuhamba.][3]

⁵Habwene yaho yaliho omundu owali niyalwala emihika amakhumi kataru namunane.

⁶Olwa Yesu yamulola nakon'ne namanya walwala amatukhu amenji, namureeba, “Wenyanga obe omulamu?”

⁷Naye omulwaye nakalusia mbu, “Omwami, sindi nende omundu owokhuura mwitubango nyinga amaatsi katubuukhanga tawe, nebutswa nyinga ise nzitsanga, oundi aranganga okhwikhamwo nase nisili.”

⁸Yesu namubool'la, “Sinjila wetukhe esirili sisio otsie.”

⁹Nonoho omundu uyo yahona nabukula esirili sisie niyetuukha natsia. Litukhu yilio liali lie Sabato.

¹⁰Kho Abayahudi nibabool'la uyo owali nahonibwe, “Leelo nelitukhu lie Sabato, nomusilo khu Malako kefwe okhwetukha esirili sisio.”

¹¹Nebutswa naye yabakalusia, “Oumbonisie yali okhumbool'la, wetukhe esirili sisio otsie.”

¹²Nabo nibamureeba, “Omundu tsana okhubooleye mbu wetukhe esirili ochende, niwina?”

¹³Nebutswa owali nahonibwe, siyali namumanyile tawe, sichila Yesu yali nakoreye mubandu khulwo omukanda omukali.

¹⁴Olwe inyuma Yesu yamunyoola mu Hekalu, namubool'la, “Lola, uhonibwe, orakhakhola tsimbi khandi, khase obubi obukali bwakhakhukwila.”

¹⁵Omundu uyo yatsia nabool'la Abayahudi mbu, “Yaali Yesu oumbonisie.”

¹⁶Kho Abayahudi nibakhupia Yesu esibi sichila yakhola yako mwitukhu lie Sabato.

¹⁷Nebutswa Yesu yabakalusia, “Papa wanje asikholanga emilimo, ne nase khandi ngwan'ne okhukhola emilimo.”

¹⁸Khusifune sieling'ana yili Abayahudi baruna okhusila okhwira Yesu sichila yononisie Esabato, khandi alanganga Nyasaye Samwanawe, nambwo yekholanga okhuhelana nende Nyasaye.

¹⁹Yesu yabakalusia nababool'la, “Mubool'langa tooto, omwana sianyala okhukhola ling'ana khububwe ndirali elialolanga Papa uwe nakhola tawe. Yako aka Papa akholanga niko ako Mwana naye akholanga.

²⁰Okhuba Papa wayanza Omwana, ne wamumanyia siesindu siosi esiakholanga omwene. Yakhamumanyie ebindu ebikali ebiyomba yibi ne mwesi mwakhachenye.

²¹Okhuba singa obwa Samwana asimukusia abafu nabahelesia obulamu, nimbwo Omwana naye ahaananga obulamu khu yabo abaayanzile okhuha.

²²Okhuba Papa siakhalachilanga omundu wosi esiina tawe. Nebutswa uheye Omwana obukhalachi bwosi obwe siina,

²³mbu bosi bahelesie Omwana oluyali singa bahelesianga Papa. Orahelesianga Omwana oluyali siahelesianga Papa owamuruma oluyali tawe.

²⁴“Mubool'langa tooto, uyo ohulilanga amang'ana kanje, nasubila khuye owaruma, ali nobulamu oburahwa. Sialikhalachilwa esiina tawe, nebutswa wamala okhurula mubafu wainjila mubulamu.

²⁵Mubool'langa tooto, inyinga yitsanga, ne yamala okhubaho, nyinga abafu balihulila omwoyo kwo Mwana wa Nyasaye; nabo abalihulila balisimukukha.

²⁶Okhuba singa Papa ali niye mwene obulamu nimbwo yaha Omwana okhuba obuchiachilo bwobulamu.

²⁷Wamuhelesia obunyali okhukhalaka esiina, sichila no Mwana wo Mundu.

²⁸Murachenya khuyaka; sichila esaa yitsanga eya abandu bosi abali mubilindwa balihulila omwoyo kukwe,

²⁹ne balirula mwo: abali okhukhola amalahi bakhatsie mukhusimukukha khwo bulamu; ne abali okhukhola obubi nabo bakhatsie mukhusimukukha khwo khukhalachilwa khwesiina.

³⁰“Ise sinyala okhukhola ling'ana liosi khubunyali obwanje omwene tawe; Singa obwa mbulilanga okhurula khu Nyasaye nimbwo khalakanga; ne okhukhalaka khwanje nokhulunji, sichila sirunanga obulalilo bwanje tawe, habula obulalilo obwe uyo owaruma.

³¹Nimba nindekobokhela omwene, obukobokheli bwanje sibunyala okhuba obwatooto tawe.

³²Aliho oundi niye oungobokhelanga, ma nase ndamanya obukobokheli bubwe obwa yangobokhelanga nobwatooto.

³³Inywe mwarumila Yohana abarumwa, naye yali okhukobokhela akatooto.

³⁴Ise simbuchil'langa obukobokheli oburula khubandu tawe, nebutswa mboolanga yaka mutoole okhuhona.

³⁵Yohana yali singa etaya eyatukhanga, neywe mwahuchil'la okhusangala mukhukhosia khukhwe hatututu.

³⁶Nebutswa ise obukobokheli obwandi n'nabwo nobukhongo okhuyomba obwa Yohana; emilimo chiene yichio echie ise kholanga, echia Papa yamba khole, chikobokhelanga nichimanyia mbu Papa yaruma.

³⁷Khandi Papa owaruma niye okobokhelanga akobuloli bubwe khwise. Inywe simwahulila omwoyo kukwe amatukhu kosi nohomba simwalola likondo lilie mumatukhu kosi tawe.

³⁸Ne amang'ana kaake sikamenyanga mwinywe tawe, sichila simusubilanga owayaruma tawe.

³⁹Murunilisianga Amahandiko, sichila mukalanga mukene yako namunyoole obulamu oburahwa. Ne yaka namahandiko akakobokhelanga ise!

⁴⁰Ne nilwo olwa musuulanga okhwitsa khwise munyoole obulamu.

⁴¹“Ise simbuchil'langa oluyali lwobukhongo okhurula khubandu tawe.

⁴²Nebutswa manyile muli abandu bambila sina, khandi manyile mbu simuli nobuyanzi khu Nyasaye mumioyo chienywe tawe.

⁴³Ise ndetsa mubunyali bwa Papa wanje, ne simwaimbuchil'la tawe, nebutswa oundi naba niyakhetse muliira lilie, omwene uyo mwakhamuhuchil'le.

⁴⁴Muyanzanga okhunyoola oluyali okhurula khwinywe abene khubene, nebutswa simutemanga okhunyoola oluyali okhurula khu uyo ouli niye Nyasaye yenyene tawe; kho mwakhasubila mbwena?

⁴⁵Murakaala en'no ndimuyaala imbeli wa Papa tawe. Musa owe inywe mwabiikhamwo okhunaaya khwenywe niye olimuyaala.

⁴⁶Kalaba mwasubila Musa, khane mwasubila ise; sichila yahandika amang'ana khu ise.

⁴⁷Khe nimuba nimurasubila amahandiko kaake, mwakhasubila mbwena amang'ana kanje?”