Read lunyore YOHANA 7 Bible Online

YOHANA 7 - lunyore bible

YOHANA 7

¹Olwe inyuma we yaka Yesu yali nachendanga musibala sia Galilaya; siyayenyanga okhuchenda mu Bayahudi tawe, sichila abakhongo ba Bayahudi bali nibenyanga okhumwira.

²Olwene yilwo Lisabo Liamahindu liali nilili ahembi.

³Kho abaana babwe nibamubool'la, “Rula hano, otsie Ebuyahudi, abalondi baabo balole emilimo chichio echiokholanga.

⁴Okhuba abulaho omundu okholanga emilimo chichie masilisi, ne omwene niyakhenya amanyikhe. Noba nokholanga yichi webisule khubo musibala.”

⁵Okhuba kata abaana babwe sibamusubila tawe.

⁶Kho Yesu nababool'la. “Inyinga yanje esili okhwola, nebutswa eyenywe eliho amatukhu kosi.

⁷Abomusibala sibanyala okhumubihil'lwa inywe tawe, nebutswa ise bambihil'lwanga, sichila ribulanga emilimo chiabwe emibi.

⁸Inywe mutsie Mwisabo. Ise sinanzie Mwisabo yilio tawe sichila inyinga yanje esili okhwola.”

⁹Niyakhaboolanga yaka, yatsilil'la okhumenya Galilaya.

¹⁰Olwa abaana babwe bali nibatsiye Mwisabo, Yesu naye yatsiamwo, nebutswa siyatsia kol'lani tawe, ngarali yatsia masilisi.

¹¹Abakhongo ba Bayahudi bali nibamurunanga Mwisabo yilio nibareebana, “Ali hena?”

¹²Okhumonyana okhwinji khwaliho mumukanda kwabandu khukaake. Abandu bandi nibaboola mbu “Nomundu omulahi.” Ne abandi nabo, “Tawe akosianga abandu.”

¹³Nebutswa yabulaho owaboola khukaake habulafu tawe, sichila baria abakhongo ba Bayahudi.

¹⁴Lisabo liali niliakhola hakari kho lihwe olwa Yesu yatsia mu Hekalu ma nachiaka okhwibaala.

¹⁵Abakhongo ba Bayahudi nibahuka okhusila ma nibaboola, “Omundu uno yamanya mbwena amang'ana yaka kosi nasili okhunyoolakhwo ameko kosi?”

¹⁶Yesu nakalusia nababool'la, “Akanzibaalanga sikali akanje khubwanje tawe, nebutswa karulanga khu Nyasaye.

¹⁷Omundu wosi naba niyakharakhwo omwoyo okhukhola aka Nyasaye yenya, yakhamanya nikali mbu akanzibaalanga karulanga khu Nyasaye, nohomba nimba nimboolanga khubunyali bwanje.

¹⁸Omundu oboolanga khubuubwe yerun'nanga oluyali lulwe omwene; nebutswa omundu orunanga oluyali lwe uyo owamuruma, omwene uyo niye owatooto, kata obusiamu sibuli muye tawe.

¹⁹Siaali Musa owamuha amalako? Ne kata mulala khu inywe siakholanga akamalako? Busina murunanga okhunzira?”

²⁰Abandu nibamukalusia, “Wasienwa niwina orunanga okhukhwira?”

²¹Yesu nabakalusia nababool'la, “Ndakhola esilolelo esia mangalimwa silala, ne inywe mwesi mwali okhuchenya tawe.

²²Musa yamuha esiimo siokhusebwa (ne sisiarula khu Musa nebutswa siarula khubapapa benywe), musebanga omwana mwitukhu lie Sabato.

²³Omwana naba nasebwa mu Sabato kho Amalako ka Musa kalekhe okhufunakwa, busina nimusinyikhila sichila mbonisie omundu okhuba omulamu khwitukhu lia Sabato?

²⁴Mulekhe okhukhalachila abandu khulwa okhulolekha khwesioba butswa, ngarali mukhalake mubwatooto.”

²⁵Abalala khubandu bomu Yerusalemu nibareeba, “Uyo siali niye owabakhongo barunanga okhwira?

²⁶Lole, al'lomanga habulafu, ne sibamufukula ling'ana kata elala tawe. Mbula abakhongo bakhaba mbamanyilekhwo siahene omwene uyo niye Masihi noho?

²⁷Nebutswa khumanyile omundu uno hayarula, nyinga Masihi alitsa omundu sialimanya aharul'le tawe.”

²⁸Kho Yesu yalanjisia mu Hekalu niyebaala naboola, “Inywe mwaimanya ise khandi mwamanya ahandarula. Sindaitsa khubwanje tawe, nebutswa uyo owaruma nowatooto. Inywe simum'manyile tawe,

²⁹ise ndamumanya sichila ndarula khuye, khandi niye owaruma.”

³⁰Ne nibenya okhumufumila nebutswa abulaho owamutilakhwo, sichila esaa yiye yali nesili okhwola.

³¹Nebutswa abandu abenji basubila khuye, nibaboola, “Nyinga Masihi yakhetse mbula alikhola akamangalimwa amenji okhuyomba yako ake uyu akhol'le noho?”

³²Abafarisayi nibahul'la omukanda kwabandu nikumumuchil'langa khulwaye. Kho abesaalisi abakhongo nende Abafarisayi nibaruma abalindi okhutsia okhumufumila.

³³Kho Yesu nababool'la, “Sili n'nenywe oluhono lutititi butswa ma kho nanzie khu uyu owaaruma.

³⁴Muliiruna ne simwakhanyoole tawe, ne owandiba nindi inywe simulinyala okhwitsayo tawe.”

³⁵Kho Abayahudi nibabool'lana abene, mbu “Nihena aha omundu uyu natsie aha ifwe khuranyala okhumunyoola yiyi? Akhenyanga okhutsia khu Basalanibwa mu Bayunani nabebaal'la noho?

³⁶Ning'ana sina eliabooye yilio? Mbu, ‘Muliruna, ne simwakhanyoole tawe,’ khandi mbu ‘Ahandiba, inywe simunyala okhwitsaho tawe?’ ”

³⁷Khwitukhu liesihesi, litukhu likhongo lielisabo, Yesu yasinjila nalanjisia, naboola, “Omundu oba nali nobuluho, yetse khu ise anywe.

³⁸Osubilanga khwise, singa obwa kahandikwa, muusi mumwoyo kukwe chilirulamwo emichela chiamaatsi kobulamu.”

³⁹Akene yako yali naboolanga ako Mwoyo owa bakhahebwe yabo abasubilanga khuye. Olwene yilwo Omwoyo yali nasili okhuhanwa, sichila Yesu yali nasili okhufumibwa.

⁴⁰Khe abalala mubomukanda nyinga bahulila amang'ana yaka, baboola, “Siahene uyu niye omuroobi watsana.”

⁴¹Ne abandi nibaboola, “Ye ni Masihi!” Nebutswa abandi nibaboola “Mbula Masihi yakharula Galilaya noho?

⁴²Amahandiko Amatsienukhu sikaboola Masihi yakharul'le mulwibulo lwa Daudi, ne yakhebulilwe Betselehemu, mwitaala aha Daudi yamenya?”

⁴³Abandu nibachiaka okhuhangalana khululwe.

⁴⁴Abandi khubo nibenya okhumufumila, nebutswa siyaliho omundu mulala owamutilakhwo tawe.

⁴⁵Olwa Abalindi yabo bakalukha khubesaalisi abakhongo nende Abafarisayi, babareeba, “Busina sim'muler're tawe?”

⁴⁶Abalindi yabo nibakalusia mbu, “Abulaho omundu ol'lomangakhwo singa omundu uyo tawe!”

⁴⁷Ne Abafarisayi nibareeba, “Nenywe amuyingoyisie?

⁴⁸Aliho khubakhongo owali okhusubila khuye nohomba khu Bafarisayi?

⁴⁹Nebutswa omukanda kuno sikwamanya Amalako ka Musa tawe kho kwalamwa.”

⁵⁰Nikodemu ula owali niyatsiakhwo okhulola Yesu olundi, yali mulala khu Bafarisayi. Yabool'la abasie,

⁵¹“Amalako kefwe sikakhalachilanga omundu esiina nasili okhuhulilwa omwene, khandi nikhusili okhumanyilisia akakhol'le tawe.”

⁵²Nibakalusia nibamureeba mbu, “Nawe khandi orulanga Galilaya? Weke okhurula mu Mahandiko mbu omuroobi siyakharula Galilaya tawe.” [

⁵³Ma siomundu natsia ingo we,