Read lunyore YOHANA 8 Bible Online

YOHANA 8 - lunyore bible

YOHANA 8

¹nebutswa Yesu yatsia Khusikulu sia Miseituni.

²Litukhu elialondakhwo mumabwebwe niyenjila mu Hekalu khandi. Abandu bosi betsa khuye, niyekhala hasi, nachiaka okhubebaal'la.

³Abebaali ba Malako nende Abafarisayi nibamuler'ra omukhasi owali nanyooywe mubuheyi, nibamura imbeli womukanda.

⁴Nibabool'la Yesu, “Omukhasi uno yanyooywe naheyanga habwene nahabwene.

⁵Mumalako kefwe Musa yakhulaka mbu khwire abafwana mbwo namachina. Khe nawe oboolanga mbwena khuye?”

⁶Ne eliene yili baboola khulwo okhumuteema, khe batoole esifune siokhumusitaka. Nebutswa Yesu yenama hasi nahandika mumaloba nesitere sisie.

⁷Nabo olwa barelel'la okhumureeba, yatikulukha nababool'la, “Uyo osili okhukholakhwo tsimbi khwinywe, arange okhumulasa lichina.”

⁸Ma niyenama hasi khandi nahandika mumaloba.

⁹Nabo, nyinga bahul'la yako baswekha nibatsia simulala, simulala okhuchiachila khumukhulundu okhwola khuwokhumal'likha. Yesu nasikala yenyene, ne omukhasi tsana nasisinjiyeho.

¹⁰Yesu natikulukha, namureeba, “Omukhasi abakhuyaal'lenje bali hena? Abulaho kata mulala okhukhalachiiye esiina?”

¹¹Namukalusia, “Omwami, sialiho kata mulala tawe.” Yesu namubool'la, “Nase sikhukhalachila esiina tawe, tsia ouwo, nebutswa okhurula luno orakhola tsimbi khandi tawe.”][4]

¹²Khandi Yesu yal'loma khu Bafarisayi. “Ise nise obulafu bwesibala. Ounonda ise sialachenda musiilima tawe, nebutswa alaba nobulafu bwobulamu.”

¹³Abafarisayi nibamubool'la, “Ibe wekobokhelanga omwene, ne obukobokheli bubwo sibuli obwatooto tawe.”

¹⁴Yesu yabakalusia nababool'la “Kata nimba nindekobokhelanga omwene, obukobokheli bwanje nobwatooto, sichila ndamanya ahandarula, nende ahanzitsanga.

¹⁵Inywe mukhalakanga esiina esinamubili, ise sikhalachilanga omundu tawe.

¹⁶Ne nimba nikhalachilanga omundu esiina okhukhalaka khwanje nokhwatooto, sichila sindi sienyene khubwanje tawe, nebutswa khuli nende Papa owaruma.

¹⁷Kahandikwa mu Malako kenywe mbu obukobokheli bwabandu babili nobwatooto.

¹⁸Ise ndekobokhelanga, khandi Papa owaruma yangobokhelanga.”

¹⁹Kho nibamureeba, “Papa uwo tsana ali hena?” Yesu nabakalusia, “Inywe simumanyile ise, kata simumanyile Papa khandi tawe. Mulaba nimwamanya, khane khandi mwamanya Papa.”

²⁰Amang'ana yaka yabool'la habali mbahanilanga esihanwa, olwa yali niyebaalanga mu Hekalu. Ne siyaliho omundu wosi owamufumila tawe, sichila inyinga yiye yali nesili okhwola.

²¹Yesu nabool'la Abafarisayi khandi, “Ise rulangaho; ne muliruna ise nebutswa mwakhafwile mutsimbi tsienywe. Ise ahanzia inywe simunyala okhwitsayo tawe.”

²²Abayahudi nibaboola, “Yetsa okhweyira omwene nohomba? Okhuba aboolanga, Ahanzia inywe simunyala okhwitsayo tawe.”

²³Nababool'la, “Inywe muli abehasi, nase ndi owomwikulu; inywe muli abomusibala muno, ise sindi owomusibala muno tawe.

²⁴Kho ndamubool'la, mwakhafwile mutsimbi tsienywe. Nimuba nimurasubila ‘Ise Nise ye’ mwakhafwile mutsimbi tsienywe.”

²⁵Khe nibamureeba. “Niwe wina?” Yesu nabakalusia, “Kali singa ndamubool'la okhurulana olwokhuranga.

²⁶Ndi namang'ana amenji akokhuboola khukenywe nende okhumukhalachila esiina. Nebutswa owaruma nowatooto; ne amang'ana akandali okhuhul'la okhurula khuye niko akamboolanga musibala.”

²⁷Sibamanya Yesu al'lomanga khu Samwana tawe.

²⁸Kho Yesu nababool'la, “Nyinga muliachikha Omwana wo Mundu khumusalapa nilwo olwa mwakhamanye ‘Ise Nise ye’; ma mulimanya mbu sikholanga ling'ana liosi khubwanje tawe, nebutswa mboolanga aka Papa yanzibaal'la okhuboola.

²⁹Naye niye owaruma ma ali halala n'nase, siyandekhanga sienyene tawe; sichila kholanga amatukhu kosi akayanzilwe khuye.”

³⁰Abandu abenji abahulila Yesu naboola amang'ana yaka, basubila khuye.

³¹Kho Yesu nabool'la Abayahudi abali nibasubiye khuye, “Inywe nimuba nimuhulila amebaalo kanje, mwakhaba abechi banje batooto.

³²Nenywe mwakhamanye akatooto, nako akatooto kakhamukhola okhuba abalakhuule.”

³³Nibamukalusia “Khuli abolwibulo lwa Aburahamu, khusili okhubakhwo abahambe bomundu wosi tawe, nawe oboolanga mbwena, ‘Muliba abalakhuule?’ ”

³⁴Yesu nababoolela, “Mubool'langa tooto, siomundu okholanga tsimbi nomuhambe wetsimbi.

³⁵Omuhambe siamenyanga munyumba amatukhu kosi tawe, omwana ye amenyanga amatukhu kosi.

³⁶Khe omwana naba namukhola abalakhuule, mulaba abalakhuule tooto.

³⁷Ndamanya muli abolwibulo lwa Aburahamu, ne murunanga okhunzira, sichila ling'ana lianje silinyooye obweyangu mwinywe tawe.

³⁸Yaka mboolanga akandalola khu Papa, ne nenywe akamwahulila khu papa wenywe niko aka muboolanga.”

³⁹Nibamukalusia, mbu “Papa wefwe ni Aburahamu.” Yesu nabakalusia mbu “Mulaba nimuli abaana ba Aburahamu, khane mukholanga emilimo chia Aburahamu yakhola.

⁴⁰Kosi aka mal'le okhukhola, nokhumubool'la akatooto aka ndahul'la okhurula khu Nyasaye nebutswa murunanga okhunzira. Yako sikali niko aka Aburahamu yakhola tawe.

⁴¹Inywe mukholanga aka papa wenywe yakhola.” Nibamubool'la, “Nyasaye mwene niye Papa wefwe yenyene, ne khuli abaanabe abahabwene.”

⁴²Yesu nababool'la, “Nyasaye alaba nali niye Papa wenywe, mwakhanyanzile ise, sichila ise ndarula owa Nyasaye ninzitsa hano. Sindaitsa khubwanje, nebutswa niye owaruma.

⁴³Busina muramanyilisia okhuboola khwanje? Kali sichila simunyala okhwefwila okhuhul'la amang'ana kanje tawe.

⁴⁴Muli aba papa wenywe Es'sieno ne muyanzanga okhulonda okhwekomba khwa papa wenywe. Yalinji omwiri wabandu okhurula mukhuchiaka khwesibala ne siasinjilanga mukatooto tawe sichila akatooto sikali muye tawe. Nyinga aboolanga obubehi, aboolanga khu keimela yiye sichila nomubehi, khandi niye samwana obubehi bwosi.

⁴⁵Nebutswa sichila mboolanga akatooto, simumbuchil'langa tawe.

⁴⁶Niwinakhwo khwinywe owakhamanyia mbu esiina sietsimbi siifwilanga? Nimba nimubool'la akatooto, busina simusubilanga tawe?

⁴⁷Uyo oli owa Nyasaye ahulilanga amang'ana ka Nyasaye. Nebutswa inywe simuli aba Nyasaye tawe, ne niko akachila simunyala okhuhul'la tawe.”

⁴⁸Abayahudi nabo nibamureeba mbu, “Sikhuboolanga habwene mbu oli Omusamaria khandi wasienwa?”

⁴⁹Yesu nakalusia mbu, “Ise sindasienwa tawe, nebutswa mbelesianga Papa wanje oluyali ne inywe munjaayanga.

⁵⁰Ise sinderun'nanga obukhongo bwanje omwene tawe, nebutswa aliho mulala oburunanga khandi akhalakanga niyangobokhela.

⁵¹Mubool'langa tooto, omundu naba nafumila obwibaali bwanje siyakhafwe kata hati.”

⁵²Abayahudi nibamubool'la, “Luno khwakhamanya mbu wasienwa! Aburahamu yafwa, khandi abaroobi bafwa, olwa nawe oboolanga mbu omundu naba nafumila obwibaali bubwo siyakhafwe kata hati tawe.

⁵³Aburahamu papa wefwe halala nende abaroobi bafwa; nawe sionyala okhwekhola omukhongo okhubayomba tawe. Wekholanga okhuba wina?”

⁵⁴Yesu nakalusia, “Nikaba ndefumianga omwene, ifuma yanje sieli esindu tawe. Oumbelesianga oluyali ni Papa wanje owe inywe muboolanga ni Nyasaye wenywe.

⁵⁵Kata nimuram'manyile ise ndamumanya. Nindakhabooye mbu simanyile Papa tawe, khe ndakhaba omubehi singa inywe. Nebutswa ise ndamumanya ne mbulilanga amang'ana kaake.

⁵⁶Papa wenywe Aburahamu yali okhusangala okhulola litukhu lianje; nalilola ma nalema omwoyo.”

⁵⁷Abayahudi bamubool'la, “Ibe kata osili okhuhela emihika amakhumi karano, nawe walola Aburahamu?”

⁵⁸Yesu nababool'la, “Mubool'langa tooto, Aburahamu nasili okhwibulwa, ise ndali nindiho.”

⁵⁹Nibabukula amachina mbu bamulasile, nebutswa Yesu niyebisa narula mu Hekalu.