Read lunyore YOHANA 9 Bible Online

YOHANA 9 - lunyore bible

YOHANA 9

¹Olwa Yesu yali nachendanga, yalola omundu owebulwa nali omubofu.

²Abechi baabe nibamureeba, “Omwibaali, niwina owakhola tsimbi; nomundu uyu nohomba nabebuli baabe nikachila niyebulwa nali omubofu?”

³Yesu nabakalusia, “Uyo ye siyakhola tsimbi noho kata abebuli baabe; nebutswa yebulwa omubofu kho emilimo chia Nyasaye chimanyikhe habulafu muye.

⁴Kakhuhel'le khukhole emilimochie uyo owaaruma olwa kusili m'basu; obutukhu bwitsanga olwa omundu aranyala okhukhola emilimo.

⁵Olwa sili musibala ndi obulafu bwesibala.”

⁶Olwa yamala okhuboola yako, yafutsa amare hasi, nalonga litohi namare tsana ma nabakha litohi tsana khu tsimoni tsitsie.

⁷Namubool'la, “Tsia wesaabe m'moni mwitubango lia Siloamu,” (Esifune sieliira yili sibetsanga “Okhurumwa.”) Kho yatsia, niyesaaba m'moni mwe ma niyetsa nalolanga.

⁸Kho abaluyia baabe nende yabo abamulola khwo khale nasabanga, nibareba, “Uyo siali niye owamenya mekhala nasabanga?”

⁹Abandi nibaboola, “Niye,” ne abandi nibaboola, “Mba, nebutswa afwana siaye.” Naye naboola, “Nise owatsana.”

¹⁰Nibamureeba, “Otooye mbwena okhufunulwa tsimoni tsitsio?”

¹¹Nabakalusia, “Omundu olangwa Yesu alongele litoyi niyambakha khutsimoni tsianje ma niyambool'la, ‘Tsia khu Siloamu wesaabe m'moni.’ Ma olwa nziye okhwesaaba mal'le nindoola okhuhenga.”

¹²Nibamureeba, “Ali hena?” Naye naboola, “Simanyile tawe.”

¹³Nibamuhila omubofu tsana khu Bafarisayi.

¹⁴Liali litukhu lie Sabato olwa Yesu yalonga litohi, nafunula tsimoni tsiomubofu.

¹⁵Khe Abafarisayi bamureba khandi singa obwatooye okhuhenga. Nababool'la, “Yali okhubakha litohi khutsimoni tsianje, nindesaaba, ma luno ndolanga.”

¹⁶Abalala khu Bafarisayi nibaboola, “Omundu uyu siyarula khu Nyasaye tawe, sichila siahetsanga litukhu lie Sabato oluyali tawe.” Ne abandi nibaboola, “Omundu wetsimbi yakhanyala mbwena okhukhola akamangalimwa singa yaka?” Ma abene nibahingana khukene yako.

¹⁷Kho Abafarisayi nibareba owabeyenge omubofu tsana, “Oboolanga mbwena khuye olwa afunuye tsimoni tsitsio?” Naye nababool'la, “Nomuroobi.”

¹⁸Ne abakhongo ba Bayahudi yabo sibasubila amang'ana kaake mbu yali omubofu ma luno utooye okhulola tawe, okhwola olwa balanga abebuli baabe

¹⁹nibabareba, “Uno no mwana wenywe owamuboolanga mbu yebulwa nali omubofu? Khe luno anyal'le mbwena okhulola?”

²⁰Abebuli baabe nibakalusia, nibaboola mbu, “Khumanyile uyu no mwana wefwe, khandi yebulwa nali omubofu.

²¹Ne singa atooye okhulola luno, sikhumanyile khwo tawe. Kata sikhumanyilekhwo owali okhufunula tsimoni tsitsie tawe. Mumureebe omwene, akhali mwana, alaboola amang'ana kaake omwene.”

²²Abebuli baabe baboola yako sichila bali nibariye abakhongo ba Bayahudi, sichila abakhongo ba Bayahudi bali bamal'le okhulomba omuse, mbu omundu naba namweyama khwo mbu Yesu ni Masihi, akhungwe okhurula musinakoki.

²³Niko akachila abebuli yabo nibaboola, “Akhali mwana; mumureebe omwene.”

²⁴Kho, nibamulanga olwakhabili omundu owali omubofu uyo, nibamureeba, “Oboole akatooto imbeli wa Nyasaye. Ifwe khumanyile omundu uyo nowetsimbi.”

²⁵Kho nabakalusia, “Simanyile naba nali owetsimbi tawe. Ling'ana elala eliamanyile lili mbu: Ndabeyenje omubofu, ne luno ndolanga.”

²⁶Nibamureeba, “Akhukholeye sina? Akhufunuuye mbwena tsimoni tsitsio?”

²⁷Nabakalusia, “Olwa mubooleye, simuhuliye tawe, mwenya mubool'le olwakhabili busina?”

²⁸Khe nibamukokonyela, nibaboola, “Ibe niwe oli omwechi uwe, ifwe khuli abechi ba Musa.

²⁹Khwamanya Nyasaye yabool'lana nende Musa, ne omundu uyo, sikhumumanyile aha yarula tawe.”

³⁰Omundu tsana nabakalusia, “Khe nakokhuchenyakhwo obwa muramumanyile aha yarula, nebutswa ufuunuye tsimoni tsianje.

³¹Ne khwamanya Nyasaye siahul'langa aboni, nebutswa omundu naba nali omwekayakayi wa Nyasaye nakholanga obulalilo bubwe, omwene uyo Nyasaye amuhulilanga.

³²Okhurulana mukhuchiaka khwesibala, kasili okhuhul'lwa khwo mbu omundu wafuunulakhwo tsimoni tsiomundu owebulwa omubofu.

³³Omundu uyo alaba nararula khu Nyasaye khane siyakhanyal'le okhukhola esindu tawe.”

³⁴Nibamubool'la, “Ibe owebulwa nokhusibwa mutsimbi nawe wakhanyala okhwibaal'la ifwe?” Nibamukhunga okhurula musinakoki.

³⁵Yesu naye yahul'la singa bali nibamufubile esioba; yatsia namunyoola, ma namureeba, “Usubiye mu Mwana wo Mundu?”

³⁶Naye namukalusia, “Ne niye wina, Omwami, ma subile muye?”

³⁷Yesu nakalusia namubool'la “Umal'le okhumulola, khandi niye ol'lomanga n'nawe.”

³⁸Kho naboola, “Omwami, subiye.” Ma namwekayakaya.

³⁹Kho Yesu naboola, “Ise ndetsa musibala sino okhukhalaka esiina, kho ababofu balole, ne abalolanga bakwe ababofu.”

⁴⁰Abafarisayi abali mbali halala n'naye bahul'la yaka, nibamureeba, “Nefwe khandi khuli ababofu noho?”

⁴¹Yesu nabakalusia, “Mulaba nimuli ababofu, khane simuli netsimbi; nebutswa luno olwa muboolanga, ‘Khulolanga’ tsimbi tsienywe khe tsiamenya.”