Read lunyore EBIKHOLWA 1 Bible Online

EBIKHOLWA 1 - lunyore bible

EBIKHOLWA 1

¹Awefwe Tseofilo: Musitapu sianje siokhuranga ndahandika khumang'ana kosi aka Yesu yakhola nende okhwibaala okhurula olwa yachiaka emilimochie,

²okhwola khwitukhu elia yabukul'lwakhwo okhutsia mwikulu. Nasili okhubukulwa okhutsia mwikulu, yahana amalako mubunyali bwo Mwoyo Omutsienukhu khubarumwa abayali niyeela.

³Khulwoluhono lwamatukhu amakhumi kane inyuma wokhufwakhwe yalolekha khubo esiakhenji mutsinjila etsiamanyia kololi mbu yali nali mwoyo. Bamulola, ne nal'loma n'nabo khukobwami bwa Nyasaye.

⁴Olwa bakaana halala n'naye yabalaka; “Murakharula Yerusalemu tawe, nebutswa mulindil'le esihanwa esia Papa yamulaka, esihanwa esiamwahul'la nin'nomangakhwo.

⁵Okhuba Yohana yabaputisanga mumaatsi, nebutswa inyuma wamatukhu matu, inywe namubaputiswe no Mwoyo Omutsienukhu.”

⁶Olwa abarumwa babukaana halala nende Yesu, bamureeba, “Omwami, wakhakaluchisie Abaisiraeli obwami munyinga tsino?”

⁷Yesu nababool'la, “Tsinyinga nende esaa biakene yako bili mubunyali bwa Papa wanje, ne sikali akenywe okhumanya biakhabe lina tawe.

⁸Nebutswa olwo Omwoyo Omutsienukhu aliyela khwinywe mwakhahebwe obunyali, ne mwakhabe abakobokheli banje mu Yerusalemu, mu Buyahudi mwosi nende Samaria, kata okhwola khusihesi siesibala.”

⁹Olwa yali namal'le okhuboola amang'ana yaka yabukulwa okhutsia mwikulu bosi nibalolanga, ne lilumbesi nilimubisa, sibali abanyala okhumulola khandi tawe.

¹⁰Olwa bali nibasihenga ikulu, naye natsitsanga, nonoho abandu babili abali nibebikhile tsingubo tsindafu basinjila ahembi n'nabo,

¹¹nibaboola, “Inywe abandu ba Galilaya, busina musinjiye yaha nimuhenga mwikulu? Yesu uyu, obukuywe okhurula khwinywe nahilwa mwikulu, yakhakalukhe singa obwa muluutsi natsitsanga mwikulu.”

¹²Kho abarumwa bamala nibakalukha Yerusalemu okhurula Khusikulu sia Miseituni esili ahembi ekilomita ndala okhurula Yerusalemu.

¹³Benjila mwitookho nibatsia musikoti esiali mukorofa omwabali nibamenyanga; ne bali Petero, Yohana, Yakobo, Anderea, Filipu nende Tomasi, Batsolomayo nende Matayo, Yakobo wa Alufayo, Simoni Selote[1] nende Yuda omwana wa Yakobo.

¹⁴Yaba bosi bebunjikha halala khulwokhusaaya, halala nende abakhasi nalebe, nende Mariamu nyina Yesu, nende abamwabo ba Yesu.

¹⁵Inyuma wamatukhu matu, kwaliho omukanda kwabasubili, abandu abahela emia ndala nende amakhumi kabili. Petero yasinjila imbeli wabwe naboola,

¹⁶“Abaana befwe, kali nikahel'le akahandikwa kahesibwe ako Mwoyo Omutsienukhu yekholel'la okhuboola mumunwa kwa Daudi khumang'ana ka Yuda owemel'la abandu abali okhufumila Yesu.

¹⁷Yuda yali mulala khwifwe ne yelwa yeyinjisie muburumikhi bwefwe.”

¹⁸(Yakula omukunda khumasendi kayanyoola okhurula khusikholwasie esisiamu yisio. Yakwa hasi narulikha ne amalake nikasundukha hasi.

¹⁹Abandu bosi abamenyanga mu Yerusalemu bahul'la amang'ana yako, kata omukunda tsana bakukulikha mul'lolomo lwabwe “Akelidama” eliboolanga “Omukunda kwamatsahi.”)

²⁰“Okhuba kahandikwa musitapu sia Saburi mbu, ‘Inyumba yiye esikale inzalamu; Omundu wosi alekhe okhumenyamwo.’ Khandi kahandikwa, ‘Omundu undi abukule obukonobwe muburumikhi yibwo.’

²¹“Kahel'le omundu undi anyoolwe owalondana halala n'nefwe amatukhu kosi aka Yesu yenjilanga narula khwifwe

²²okhuchiaka olwa Yohana yali nabaputisanga okhwola litukhu elia Yesu yabukulwa okhurula khwifwe okhutsia mwikulu. Omundu uyu abukulwe abe omukobokheli halala n'nefwe owokhusimukukha khwa Yesu.”

²³Bamala nibarala amera kabandu babili: Yosefu owalangwa Barasaba (Khandi yali neliira lindi Yusto), nende Matia.

²⁴Nibasaaya nibaboola, “Omwami, ibe wamanya emioyo chiabandu bosi. Okhumanyie owawel'le mubabili yaba

²⁵akalukhe mubukono bwomulimo kwoburume yiku okwa Yudasi yalekha natsia ahahe omwene.”

²⁶Nibakhupa imbulu khubabili yabo, ne imbulu nekwila Matia, ma nametwa khumukanda kwabarumwa bandi likhumi nende mulala.