Read lunyore EBIKHOLWA 10 Bible Online

EBIKHOLWA 10 - lunyore bible

EBIKHOLWA 10

¹Yaliho omundu Kaisaria owalangwa Korinelio, echekhe yomukanda kwabasikari ba Roma okulangwangwa “Italiani.”

²Yali omundu omulahi, owekayakayanga Nyasaye halala nende abeinyumba yiye bosi: Yakhonyanga abatakha be Buyahudi ma yasaayanga khasotso.

³Ahembi etsisaa tsirano natsine yalola mubusukhi om'malaika wo Mwami niyenjilanga ma namubool'la, “Korinelio!”

⁴Korinelio yareela om'malaika uyo tsimoni nariiye, ma naboola, “Nisina Omwami?” Om'malaika namubool'la, “Okhusaaya khukhwo nende aketsimbabasi kaako kahuchiliywe imbeli wa Nyasaye.

⁵Luno orume abandu Yopa, bende omundu olangwanga Simoni, ne eliira lindi Petero.

⁶Amenyele munyumba ya Simoni, omusitsa wamaselo, ne inyumbaye eli khuluchinga lweinyanza.”

⁷Om'malaika owaboola akene yako olwa yali natsiye, Korinelio yalanga abarumikhi baabe babili, nende omusikari mulala khu yabo abamurumikhilanga khasotso, owali naritsanga Nyasaye.

⁸Nababool'la kosi akali nikekhol'le, ma nabaruma Yopa.

⁹Khwitukhu elialondakhwo, olwabandu bataru yabo bali nibasili khuluchendo lwabwe, nibali ahembi okhwola Yopa, Petero yaniina khunyumba ikulu ahembi etsisaa tsisasaba tsiam'basu asaaye.

¹⁰Inzala yamuluma ma niyekomba okhunyoola esiokhulia. Esiokhulia olwa siali nisisitekhwa yatilwa nende tsindoolo ne nalola libisulo.

¹¹Yalola likulu nilikukha ne esindu singa esitambaya esilafu esikali nisiisibwanga hasi khusibala ne nisitil'lwe tsimbeka tsiasio tsine.

¹²Muusi mwasio tsialimwo tsimbila tsiosi etsietsinyama; tsinyama tsiebilenje bine, etsimolanga hasi ma nende amanyonyi kokhwikulu.

¹³Nahul'la omwoyo nikumubool'langa, “Petero, buukha wirekhwo khunyama yitsi olie!”

¹⁴Petero nakalusia, “Tawe, Omwami; Ise sili okhuliakhwo esindu siosi esibi nohomba esiesifwabwi.”

¹⁵Omwoyo tsana nikul'loma khuye khandi nikuboola, “Oralanga ebindu ebia Nyasaye yatsienula ebibi tawe.”

¹⁶Ling'ana yili liekhola esiakhataru, ma esitambaya yisio nisikalusibwa mwikulu.

¹⁷Olwa Petero yali nasihuka khulwobusukhi obwa yali nalutsi yibwo, abandu aba Korinelio yali narumile, nibamal'le okhureba inyumba ya Simoni, basinjila imbeli musilibwa.

¹⁸Bareeba nemioyo chieikulu, “Omucheni alikhwo yimwo olangwanga Simoni Petero?”

¹⁹Olwa Petero yali nasiteema okhumanyilisia libisulo tsana, Omwoyo namubool'la, “Hulila, abandu bataru bali hano bakhurunanga.

²⁰Bukha wikhe otsie n'nabo, oresingoyoyia tawe, sichila nise obarumile.”

²¹Kho Petero niyekha, nabool'la abandu yabo, “Nise owamurunanga. Nisina esichil'le nimwitsa?”

²²Nabo nibamukalusia, “Korinelio, echekhe yabasikari, ouli omundu omulunji, oritsanga Nyasaye, ma ohebwanga oluyali olukali mu Bayahudi bosi niye okhurumile. Abooleywe nende om'malaika omutsienukhu mbu akhulange ibe otsie munyumbamwe ohul'le kosi akaali n'nako.”

²³Petero nabenjisia munyumba, nabahelesia habundu hokhukona obutukhu yibwo. Olwa bwasia, Petero yachiaka oluchendo halala n'nabo, ne balala khubasubili abamenyanga Yopa batsia n'nabo.

²⁴Litukhu elialondakhwo boola Kaisaria. Korinelio yali nabalindil'langa, halala nende abekho nende abalina abayali nalanjile.

²⁵Olwa Petero yenjila, Korinelio yarula natsia okhumwakan'na, nasikama imbeliwe namwekayakaya.

²⁶Nebutswa Petero yamusinjisia namubool'la, “Sinjila, okhuba ise ndi butswa omundu singa ibe.”

²⁷Petero yatsitsachil'la okhul'loma nende Korinelio olwa bali nibenjilanga munyumba omwabandu abenji bali nibebunjikhile.

²⁸Petero nababool'la, “Inywe abene mwamanya mbu Omuyahudi siahuchil'lwanga okhusanga nende abandu betsimbia tsindi tawe. Nebutswa Nyasaye yamanyisie ndekhe okhubukula omundu wosi omubi nohomba owesifwabwi.

²⁹Niko akachil'le ninzitsa bwangu olwa munanjile sila okhwesingoyoyia. Khe murebanga, munanjile khulwa sina?”

³⁰Korinelio naboola, “Amatukhu kataru akahweye musaa singa yino, eyakharano nakhane m'basu, ndali nisaayanga munyumba mwanje. Ne nonoho omundu nasinjila imbeli wanje niyebikhile tsingubo tsindafu tser're,

³¹naboola, ‘Korinelio! Okhusaaya khukhwo nende aketsimbabasi kaako khubatakha bihuchiliywe nende Nyasaye.

³²Orume omundu atsie Yopa, alange omundu olangwanga Simoni oweliira lindi Petero, ne ali munyumba ya Simoni omusitsa wamaseelo omenyele ahembi nende inyanza.’

³³Habwene yaho ndarumile abandu khuibe bwangu, ne nawe okhol'le bulahi niwitsa. Luno ifwe fwesi khuli imbeli wa Nyasaye, khuhul'le amang'ana kosi ako Mwami akhulachile okhuboola.”

³⁴Petero yachiaka okhul'loma: “Siahene nduutsi mbu Nyasaye siakholanga ebiela tawe.

³⁵Omundu wosi omuriitsanga nakhola amalunji, Nyasaye amuyanzanga.

³⁶Yibu nibwo oburume obwa Nyasaye yarumila abandu ba Isiraeli nalandianga Amang'ana Amalahi akomulembe mu Yesu Kristo ouli Omwami wa bosi.

³⁷Inywe mwamanya akali okhwekhola musibala siosi esia Bayahudi okhuchiachila Galilaya inyuma wokhubaputisa khwa Yohana yakamba.

³⁸Mwamanya Yesu wa Nasareti nende singa obwa Nyasaye yamutsukhil'lakhwo Omwoyo Omutsienukhu nende obunyali. Nyasaye yali halala n'naye. Yayeyema iyi nende iyi nakholanga amalahi ne nahonia abandu bosi aba Setani yali niyalechelesia.

³⁹Ifwe khuli abakobokheli bamang'ana kosi aka yakhola musibala sia Bayahudi nende mu Yerusalemu. Bamwira khulwa okhumwachikha khumusalapa.

⁴⁰Nebutswa Nyasaye yamusimukusia okhurula mubafu khwitukhu liakhataru, namuhuchil'la alolekhe habulafu,

⁴¹sikali khubandu bosi tawe, nebutswa khubakobokheli aba Nyasaye yekholel'la okhwela, ne nifwe abatsana, abalia nikhunywa n'naye namal'le okhusimukukha okhurula mubafu.

⁴²Yakhulaka okhukamba Amang'ana Amalahi khubandu bosi, nende okhuribula mbu ye niye owelwa nende Nyasaye okhuba omukhalachi wabalamu nende abafu.

⁴³Niye owabaroobi bosi baboola mbu siomundu owakhamusubile yakhalekhelwe tsimbi tsitsie tsiosi mubunyali bweliira lilie.”

⁴⁴Olwa Petero yali nasiboola amang'ana yaka, Omwoyo Omutsienukhu yayela khubo bosi abahul'la oburume yibwo.

⁴⁵Abasubili Besiyahudi abetsa nende Petero okhurula Yopa, bachenya okhulola mbu Nyasaye yatsukhil'la esihanwa esio Mwoyo Omutsienukhu khubandu betsinzibulo tsindi khandi:

⁴⁶Okhuba babahul'langa nibal'loma mutsinonomo etsiabukhan'ne nibafumia Nyasaye. Ma Petero naboola,

⁴⁷“Abandu bano banyooye Omwoyo Omutsienukhu singa ifwe nefwe khwanyoola. Alikhwoho wosi onyala okhwikal'la babule okhubaputiswa m'maatsi?”

⁴⁸Ma nalaka mbu babaputiswe muliira lia Yesu Kristo. Ma nibamureeba amenye n'nabo khulwamatukhu mati.