Read lunyore EBIKHOLWA 11 Bible Online

EBIKHOLWA 11 - lunyore bible

EBIKHOLWA 11

¹Abarumwa nende abasubili bandi abali Ebuyahudi bahul'la mbu Abetsimbia tsindi batooye ling'ana lia Nyasaye.

²Kho nyinga Petero yakalukha Yerusalemu, abandu abenyanga mbu Abetsimbia basebwe, bamutula nibaboola:

³“Busina Ibe watsiye okhumenya nende abandu abaraasebwa, nolia n'nabo?”

⁴Nebutswa Petero yabenoosia amang'ana kosi singa obwa kali okhurula khukhuchiaka.

⁵“Ndali mwitookho lia Yopa nisaayanga, ne nindola obusukhi. Ndalola esindu esifwana singa esitambaya esilafu nisisibwanga nende tsimbeka tsine okhurula mwikulu, ma nisiola ahandali nindi.

⁶Ndahenga mukari wasio ne nindola tsinyama etsiebilenje bine, tsinyama tsiom'bulimo, tsinyama etsimolanga hasi nende amanyonyi kokhwikulu.

⁷Ma nimbul'la omwoyo nikumbool'langa, ‘Petero buukha wire, olie.’

⁸Ne nase nimboola, ‘Tawe, Omwami, okhuba siosi esibi nohomba esiesifwabwi sisili okhwinjilakhwo m'munwa kwanje.’

⁹Nebutswa omwoyo tsana nikungalusia okhurula mwikulu, nikuboola, ‘Esia Nyasaye yatsienula orasikhola esibi tawe.’

¹⁰Ling'ana yilio liekhola esiakhataru, ma ebindu yibio biosi nibikalusibwa mwikulu.

¹¹Ne matetekhana abandu bataru abali nibarumilwe khwise okhurula Kaisaria boola khunyumba eyandali nimenyelemwo.

¹²Omwoyo yambool'la nzie n'nabo, sila okhwesingoyoyia. Abasubili basasaba basianje yaba ndatsia n'nabo halala Kaisaria, ma nikhwinjila munyumba ya Korinelio.

¹³Yakhubool'la singa obwa yalola om'malaika nasinjiye munyumbamwe, namubool'la, ‘Orume omundu Yopa alange omundu olangwanga Simoni, oweliira lindi Petero.

¹⁴Nakhubool'le amang'ana akanakakhuhonie ibe nende abeinyumba yiyo bosi.’

¹⁵Nyinga ndachiaka okhul'loma ne Omwoyo Omutsienukhu nabayel'la singa obwa yakhuyel'la ifwe olwokhuranga.

¹⁶Ma ninzitsulila amang'ana ako Mwami yaboola, ‘Yohana yabaputisanga m'matsi, nebutswa inywe mwakhabaputiswe mu Mwoyo Omutsienukhu.’

¹⁷Kho Nyasaye naba niyahelesia Abetsimbia tsindi esihanwa esia yakhuhakhwo ifwe olwa khwasubila Omwami Yesu Kristo, nase nise wina owakhateema okhufukula Nyasaye?”

¹⁸Olwa bahul'la amang'ana yako, baholela, nibafumia Nyasaye nibaboola, “Nyasaye uhelesisie abandu betsimbia tsindi okhwekalukhania nende okhuba nobulamu.”

¹⁹Abasubili abalala abasalaanibwa khulwo khunyasibwa okhwekholekha olwa Stefano yerwa, batsia okhwola Foinike, Kupuro nende Antiokia, nibakambilanga Abayahudi bonyene ling'ana.

²⁰Nebutswa abasubili bandi, abandu ba Kupuro nende Kurene, batsia Antiokia ma nibakambila abandu betsimbia, nibababool'la Amang'ana Amalahi ako Mwami Yesu.

²¹Obunyali bwo Mwami bwali halala n'nabo, ne omukanda omukali okwabandu nikusubila ma nibasukhana khu Mwami.

²²Oluyali lwamang'ana yako lwalanda ma nilwol'la likanisa lia Yerusalemu, nabo nibaruma Baranaba atsie Antiokia.

²³Olwa yoolayo ma nalola obwesirenda sia Nyasaye siali khubandu yabo, yasangala ma nabatsuuba bosi batiike mubusubili bwabwe mu Mwami.

²⁴Baranaba yali omundu omulahi, owetsula nende Omwoyo Omutsienukhu nende obusubili. Abandu abenji balerwa khu Mwami.

²⁵Ma Baranaba narula natsia Tariso okhuruna Saulo.

²⁶Olwa yamunyoola, yamuleera Antiokia. Ne bombi babili bakaana nabasubili yabo omuhika kwosi nibebaal'langa omukanda omukali okwabandu. Antiokia niyo ahabasubili bachiachila okhulangwa Abakristo.

²⁷Mumatukhu kene yako abaroobi nalebe betsa Antiokia okhurula Yerusalemu.

²⁸Omundu mulala mubo owalangwa Akapo yasinjila ne narooba mubunyali bwo Mwoyo mbu inzala ingali yitsanga musibala siosi. Inzala tsana yaliho mumatukhu ka Kilaudia yali nali omuruchi.

²⁹Abechi babisia mbu siamulala khubo, khubiali n'nabio arumekhwo esindu khulwa okhukhonyel'la abasubili babwe abamenyanga Ebuyahudi.

³⁰Ma nibakhola mbwo, nibaruma ebihanwa biabwe khubakhulundu belikanisa mumakhono ka Baranaba nende Saulo.