Read lunyore EBIKHOLWA 12 Bible Online

EBIKHOLWA 12 - lunyore bible

EBIKHOLWA 12

¹Olwene yilwo Omwami Herode yachiaka okhukhupia abalala khubakristo esibi.

²Niyeera Yakobo awabwe nyene Yohana nolukanga.

³Olwa yalola nikayanzisisie Abayahudi, yatsitsachil'la, nafumila Petero. Akene yaka kekhola amatukhu kelisabo lio Mukaati okuralimwo amamela.

⁴Olwa yafumila Petero yamura mubuhambe, hasi wobulindi bwemikanda chine echiabasikari bane bane. Herode yenya okhumuhinia Epasaka nehweye amure imbeli wabandu.

⁵Kho Petero yalindwa munyumba yobuhambe, nebutswa abandu belikanisa basaaya nesinani khu Nyasaye khulwaye.

⁶Mubutukhu bwelitukhu elia Herode yenya okhumuhinia esioba, Petero yali nakon'ne hakari wabasikari babili. Yali nabohelwe nende eminyol'lo chibili ne abalindi bali nibalin'de esilibwa sieinyumba yababohe.

⁷Ne lola, om'malaika wo Mwami yasinjila ahembi n'naye ne obulafu nibwakha munyumba yimwo. Om'malaika nasungusa Petero namubool'la, “Bukha bwangu!” Ne eminyol'lo nichikwa okhurula khumakhonoke.

⁸Om'malaika namubool'la, “Webiikhe tsingubo, khandi webiikhe ebilarobio.” Naye nakhola mbwo. Ma om'malaika uyo namubool'la, “Weyabale lichora lilio, unonde.”

⁹Petero namulonda okhurula munyumba yobuhambe, ne siyamanya mbu akom'malaika uyo akhol'le nakatooto tawe; yapaalanga aloranga lilooro.

¹⁰Nibabira obulindi bwokhuranga, nende obwakhabili ma niboola khusilibwa siesibia esiokhwinjila mwitookho. Esilibwa yisio nisibekukhila butswa esiene, ma nibarula esioba. Besunda hambeli khunjila ndala ne om'malaika uyo nalekha Petero yenyene.

¹¹Ma Petero namanyilisia akali nikekhol'le khuye, naboola, “Luno manyile tooto mbu Omwami arumile om'malaikawe okhumbinia m'mukhono kwa Herode nende khukhunaya khwosi okhwa Bayahudi.”

¹²Olwa yamanyilisia mbwo yatsia munyumba ya Mariamu nyina Yohana owali neliira lindi Mariko. Abandu abenji bali nibebunjikhilemwo nibasaayanga.

¹³Nyinga Petero yakhong'onda khusilibwa omukhaana omurumikhi owalangwa Roda, natsia okhuhuyia.

¹⁴Olwa yamanya omwoyo kwa Petero siyayikula esilibwa tawe khulwo busangali, nebutswa yelukha tsimbilo natsia munyumba nababool'la mbu Petero usinjiye khusilibwa esioba.

¹⁵Nibamubool'la, “Ibe ulalukhile.” Nebutswa naye nakhanukha naboola, “Ni siahene.” Nabo nibamubool'la, “Uyo nom'malaika uwe.”

¹⁶Nebutswa Petero yarelel'la okhukhong'onda. Olwe inyuma bamala nibekula esilibwa, nibamulola, nibachenya.

¹⁷Nebutswa Petero yabasima nomukhono mbu basiling'ane, ma nabenoosia singa obwo Mwami yali namuhinisie mububohe. Ma nababool'la, “Mubool'le Yakobo nende abasubili bandi amang'ana yaka.” Ma narula natsia habundu handi.

¹⁸Olwa bwasia, yaliho indiri ingali eyesihenda mwoyo mubasikari khusiali nisikwiliye Petero.

¹⁹Ma Herode yalaka mbu arunwe nebutswa sibamunyoola tawe. Ma nalaka mbu abasikari yabo betsootswe, ne nalaka mbu berwe. Ma Petero narula Ebuyahudi natsia Kaisaria, namenyayo.

²⁰Herode yasinyikhila abandu ba Tiro nende Sidoni okhusila, ma nibatsia khuye nomukanda, bamulole. Olwokhuranga bahamba obulina nende Blasito abe elubeka wabwe. Blasito yali omulindi omukali munyumba yomwami. Ma nibatsia khu Herode nibamureeba omulembe kubeho sichila esibala siabwe sieletanga khusibala siomuruchi khulwe biokhulia.

²¹Khwitukhu eliali nilielwa Herode yebiikha tsingubotsie etsiobwami ma niyekhala khundebeye eyokhukhalaka esiina, nabool'la abandu amang'ana.

²²Abandu yabo bamukhupila liyoka liokhumwitsomia nibaboola, “Yiku nomwoyo kwa Nyasaye, sikuli okwomundu tawe.”

²³Ne nonoho om'malaika wo Mwami nakoka Herode hasi sichila siyahelesia Nyasaye oluyali yilwo tawe. Tsinyende nitsimulia ma nafwa.

²⁴Ling'ana lia Nyasaye nilitsitsachil'la okhulanda nende okhukhula.

²⁵Olwa Baranaba nende Saulo bamala oburume bwabwe, barula Yerusalemu khandi, nibabukula Yohana olangwanga Mariko.