Read lunyore EBIKHOLWA 13 Bible Online

EBIKHOLWA 13 - lunyore bible

EBIKHOLWA 13

¹Mwikanisa lia Antiokia balimwo abandu bandi abali abaroobi nende abebaali: Baranaba, Simoni owalangwa Om'mwamu, Lukio wa Kurene, Manaeni owafwitwa halala nende Herode Omuruchi, ma nende Saulo.

²Olwa bali nibarumikhilanga Omwami ne nibahonga okhulia, Omwoyo Omutsienukhu yababool'la, “Munzahul'le Baranaba nende Saulo bakhole emilimo echiandabalanjila.”

³Ma nibahonga okhulia ne nibasaaya, nibara amakhono kabwe khubo, ma nibabaruma batsie.

⁴Olwa Baranaba nende Saulo bali nibarumilwe nende Omwoyo Omutsienukhu, baselenjera okhutsia Seleukia, ne okhurula yo banina mumeeli nibatsia Kupuro.

⁵Olwa boola Salamisi bakambanga ling'ana lia Nyasaye mutsisinakoki etsia Abayahudi. Bali nende Yohana Mariko owabakhonyanga emilimo.

⁶Bachenda okhwola musichinga sia Pafo owa bakana nende omufumu Omuyahudi owalangwa Bara Yesu, owali omuroobi wobubehi.

⁷Yali omulina womukhongo wesikhala chinga owalangwa Serigio Paulo, owali omundu omuchesi okhusila. Omukhongo uyu yalanga Baranaba nende Saulo betse khuye sichila yenya ahulile ling'ana lia Nyasaye.

⁸Nebutswa bafukulwa nende omufumu Elima (nilio eliiralie mu Luyunani). Yatema okhuhinia omukhongo uyo khubusubili.

⁹Nebutswa Saulo, owali neliira lindi Paulo, yetsula nende Omwoyo Omutsienukhu, ma nareela omufumu uyo tsimoni,

¹⁰namubool'la “Ibe owetsula nobubehelesi bwosi nende obutamanu bwosi, omwana wa Setani ouli omusuku wobulunji, siolekhakhwo okhusiamia tsinjila tsio Mwami tsinunji tawe?

¹¹Luno Obunyali bwo Mwami bulolekha khuibe, olaba om'bofu, ma sinolole obulafu bweliuba munyinga indututu tawe.” Ne bwangu bwangu Elima nalola ebindu biosi nibifwana singa lifumbi nende esiilima, ma nachiaka okhuhutuuma, naruna omundu wokhumutiila omukhono amwemel'le.

¹²Olwomukhongo yalola akali nikekhol'le yasubila, okhuba yahuka khumebaalo kosi aka yahul'la khuko Mwami.

¹³Paulo nende abasie olwa barula Pafo baniina m'meeli nibatsia Periga, litookho elili mu Pamufulia; nebutswa Yohana Mariko yabalekha nakalukha Yerusalemu.

¹⁴Nebutswa bo babira Periga ma niboola Antiokia mu Pisidia. Litukhu lie Sabato benjila mu Hekalu nibekhala.

¹⁵Inyuma wobusomi bwa Malako ka Musa nende abaroobi, abakhongo besinakoki baruma omundu khubo ababool'le, “Abaana befwe, nimuba nimuli neling'ana liokhukambila abandu, muboole.”

¹⁶Paulo yasinjila, nabasimila omukhono, ma nachiaka okhul'loma: “Inywe Abaisiraeli basianje nende abandi mwesi abaritsanga Nyasaye, hulile!

¹⁷Nyasaye wabandu ba Isiraeli, yela abakuka befwe nabakhola okhuba abenji olwa bali nibamenya musibala sie Misiri. Nyasaye yabahinia Emisiri nobunyalibwe obukhongo,

¹⁸ma nabefwila emihika amakhumi kane musitsiimi.

¹⁹Yamulula tsimbia tsine natsitaru musibala sia Kanaani ma nakhola abandube okhuba abene sibala yisio.

²⁰Emihika etsimia tsine nende amakhumi karano nichibir're, yabahelesia abakhalachi besiina babemel'le okhwola mumatukhu komuroobi Samweli.

²¹Ne olwa bareeba okhuhebwa omuruchi, Nyasaye yabaha Saulo, Omwana wa Kishi, owoluyia lwa Benjameni, abe omuruchi wabwe khulwemihika amakhumi kane.

²²Olwa Nyasaye yahiniaho Saulo, yaraho Daudi okhuba omuruchi wabwe. Nyasaye yaboola kano khu Daudi, ‘Nyooye Daudi omwana wa Yese, nomundu owomwoyo kwanje kuyanzanga. Omwene uyu alikhola kosi aka ndakhenye okhukhola.’

²³Okhurulana khulwibulo lwomundu uyu Nyasaye yaler'ra Abaisiraeli omuhoni, ouli Yesu, singa obwa yabalaka.

²⁴Yesu nasili okhuchiaka emilimo chie, Yohana yemela nakambilanga abandu bosi ba Isiraeli mbu okhwola bekalukhanie ma babaputiswe.

²⁵Olwa Yohana yali namalilanga oburumebwe, yababool'la; ‘Mupaalanga ise nise wina? Ise sindi nise uyo owamulindil'langa tawe. Ye yetsanga inyuma wanje, ne ise singwan'ne kata okhubohol'la emikoye chiebilarobie tawe.’

²⁶“Abaisiraeli basianje, inywe abali abolwibulo lwa Aburahamu, nende abandi bosi abaritsanga Nyasaye! Oburume yibu obwobuhoni bwalerwa khwifwe.

²⁷Okhuba abandu abamenya Yerusalemu nende abakhongo babwe sibamulola okhuba Omuhoni tawe. Kata sibamanyilisia amang'ana kabaroobi akasomwanga khasotso sie Sabato tawe. Kata mbwo, bahesia amang'ana kabaroobi khulwa okhukhalachila Yesu esiina siokhufwa.

²⁸Kata nikali sibamunyoola nali nesikha esiakhachil'le yerwe, nebutswa bareeba Pilato amukhalachile okhwirwa.

²⁹Olwa bamala okhuhesia kosi akali nikahandikwa khuye, bamwakula okhurula khumusalapa, nibamuyabila musilindwa.

³⁰Nebutswa Nyasaye yamusimukusia okhurula mubafu.

³¹Naye yalolekha amatukhu amenji khuyabo abatsia n'naye okhurula Galilaya okhutsia Yerusalemu. Yabo nibo abakobokheli baabe luno imbeli wabandu ba Isiraeli.

³²Nefwe khwitsile okhumuler'ra Amang'ana Amalahi akelisubisio elia Nyasaye yalaka abakuka befwe.

³³Nyasaye yahesia akene yako khulwefwe abetsukhulu babwe khulwa okhumusimukusia Yesu okhurula mubafu. Singa obwa kahandikwa mu Saburi yakhabili: ‘Ibe oli omwana wanje, leelo ise mbeye Papawo.’

³⁴Ne kano niko aka Nyasaye yaboola khukokhumusimukusia okhurula mubafu, abule okhubol'la omusilindwa tawe: ‘Ndakhakhuhe ikhabi inzienukhu eyatooto eyandalaka Daudi.’

³⁵Khandi singa obwa aboolanga mu Saburi yindi mbu: ‘Siolilekha Omutsienukhuwo abol'le musilindwa tawe.’

³⁶Daudi yarumikhila lichoomo lia Nyasaye mutsinyinga tsitsie, ma nafwa, ne nayabilwa mubakuka baabe, ma om'bilikwe nikwononekha.

³⁷Nebutswa yako sikayekhola khu uyo owa Nyasaye yasimukusia okhurula mubafu tawe.

³⁸Kho ling'ana yili limanyikhe mwinywe, abaana befwe, mbu nikhulwa Yesu niko akachilanga nimukambilwa okhulekhelwa khwetsimbi.

³⁹Khandi khulwa ye siomundu wosi osubilanga alangwanga omulunji khumang'ana kosi aka Malako ka Musa karakhamulanjile okhuba omulunji.

⁴⁰Kho mwelinde, khase akabaroobi baboola yaka kalalekhe okhumukwila,

⁴¹‘Lole, inywe abachaayanga! Muchenye ma mutibe sichila omulimo kwakholanga luno mumatukhu kenywe, nokwamulibula okhusubila kata omundu naba namwinoosia.’ ”

⁴²Olwa Paulo nende Baranaba barula esioba wesinakoki, abandu babareba okhukalukha mu Sabato elondakhwo bababool'le amang'ana amenji khubindu yibi.

⁴³Olwabandu bali nibarul'le musinakoki, Abayahudi abenji nende abetsimbia tsindi abali nibalondanga edini yabwe balonda Paulo nende Baranaba. Abarumwa yabo bal'loma n'nabo, nibabatsuuba okhutsitsachil'la okhumenya nibeletanga khusirenda sia Nyasaye.

⁴⁴Mu Sabato eyalondakhwo, abandu bosi abomwitookho yilio betsa okhuhul'la ling'ana lio Mwami.

⁴⁵Olwa Abayahudi balola emikanda, imbalikha yabahamba, nibafukula aka Paulo yali naboolanga, nibamunyeka.

⁴⁶Ne kata mbwo Paulo nende Baranaba bal'loma nolutswoni okhusila nibaboola, “Kali nikahel'le ling'ana lia Nyasaye liboolwe khu inywe mbelio. Nebutswa sichila mulifukulanga nimulola mbu simuhel'le okhuba nobulamu oburahwa tawe, khumulekhanga nikhutsia khu Betsinzibulo tsindi.

⁴⁷Okhuba lino nilio lilako elio Mwami yakhuhelesia: ‘Khubikhile obe obulafu khubetsimbia tsindi, obe injila yobuhoni khusibala siosi.’ ”

⁴⁸Olwabandu betsimbia tsindi bahul'la akene yako, basangala, nibafumia ling'ana lio Mwami, ne yabo abali nibel'lwe okhutsia mubulamu oburahwa, basubila.

⁴⁹Ling'ana lio Mwami nililanda habundu hosi musibala siatsana.

⁵⁰Nebutswa Abayahudi bachema abakhasi abali abemeli mutsimbia tsindi ma abaritsanga Nyasaye, nende abasatsa abakhulundu obomwitaala, nibachiaka okhukhupia Paulo nende Baranaba esibi, nibabakhungania musibala siabwe.

⁵¹Abarumwa babungul'la olukukhi lwom'bilenje biabwe singa esilamo khubo, ma nibarula nibatsia Ikonia.

⁵²Nebutswa abasubili mu Antiokia betsula nobusangali ma nende Omwoyo Omutsienukhu.