Read lunyore EBIKHOLWA 14 Bible Online

EBIKHOLWA 14 - lunyore bible

EBIKHOLWA 14

¹Amang'ana matelwa yako kekhola Ikonia: Paulo nende Baranaba benjila musinakoki ya Abayahudi nibal'loma munjila eyachila Abayahudi abenji nende Abetsimbia tsindi nibasubila.

²Nebutswa Abayahudi abasuula okhusubila batsuuba Abetsimbia tsindi ma nibabachema okhufukula abasubili.

³Abarumwa bamenyayo oluhono, nibakambanga neikholo inyomu ako Mwami. Omwami naye nakobokhela ling'ana liesirenda sisie, nachila akamangalimwa nende akokhuchenya nikakholwa namakhono kabarumwa.

⁴Abandu bomwitaala babukhana: abalala batinya khu Bayahudi ne abandi nibaba elubeka wabarumwa.

⁵Ma abalala khu Betsimbia tsindi nende Abayahudi, halala nende abakhongo babwe benya okhukhol'la abarumwa obubi, nende okhubalasa namachina.

⁶Olwa abarumwa bamanya akene yako belukhila mumatookho ka Lusitera nende Deribe musibala sia Lukaonia nende mumbeka tsialondokhana n'nabio.

⁷Nibakamba Amang'ana Amalahi ebwene yiyo.

⁸Yaliho omundu mulala mwitookho lia Lusitera owali niyakwa likara mubilenje bibie okhurula okhwibulwakhwe ma siyali niyachendakhwo kata hati tawe.

⁹Omundu uyo yali nahuyianga Paulo nakambanga. Paulo yamureela tsimoni nalola mbu ali nende obusubili bwokhuhonibwa,

¹⁰naboola nomwoyo omukali, “Kol'lokha, osinjile nebilenje bibio!” Omundu uyo niyalulukha hayali nali, nachiaka okhuchenda.

¹¹Olwe emikanda chialola aka Paulo yali nakhol'le, nibachiaka okhuhanzuukha nibabool'la mul'limi lwabwe lwa Lukaonia, “Abanyasaye bakhwitsiye mukhufwana khwabandu.”

¹²Nibakulikha Baranaba eliira lindi mbu Seusi, ne Paulo naye nibamulanga Herime, sichila niye owali owalonya okhul'loma.

¹³Omwesaalisi wa Seusi, owe Hekalu ye yali esioba welitaala yalera tsing'ombe etsichulukhi nende tsingara tsiobwamu musilibwa, okhuba ye nende abomukanda benyanga bakhol'le abarumwa omusango.

¹⁴Olwa Baranaba nende Paulo bahul'la akabali nibenya okhukhola, barandula tsingubo tsiabwe mwirima nibelukha nibatsia mumukanda, nibalanjisia,

¹⁵“Inywe abaami, busina mwenyanga okhukhola yaka? Ifwe khuli butswa abandu singa inywe. Khuli hano khulwo okhulandia Amang'ana Amalahi akokhumuhinia khubindu ebikhaya singa yibi, muhenge khu Nyasaye oli mwoyo, owalomba likulu nende esibala nende inyanza, ma nende biosi ebilimwo.

¹⁶Khale yahuchilil'langa abandu bosi okhukhola singa benyele abene.

¹⁷Nebutswa siyalekha omwene sila okhweribul'la mubindu ebilahi ebiabakhol'langa. Amuhetsanga ifula okhurula mwikulu, nende ebirakwa mubise ebikwanile. Amuhetsanga ebiokhulia ma yetsusinjia emioyo chenywe nende obusangali.”

¹⁸Kata nikali baboola mbwo, bwali obutinyu khubo okhukaya emikanda okhubakhol'la emisango.

¹⁹Nebutswa Abayahudi nalebe okhurula Antiokia nende Ikonia, nibatsuuba emikanda okhwitsa khulubeka lwabwe, nibalasa Paulo namachina ma nibamukhulula okhumuhinia mwitookho, nibakaala mbu ufwiye.

²⁰Nebutswa olwa basubili bamufumbila, yasinjila nakalukha mwitaala. Litukhu elialondakhwo batsia nende Baranaba Deribe.

²¹Olwa bali nibamal'le okhukamba Amang'ana Amalahi mwitookho lia Deribe ma nibanyooye abalondi abenji, barula nibatsia Lusitera nende Ikonia okhwola Antiokia.

²²Bakufuhasia abasubili, nibabatsuuba okhutika mubusubili. Nibababool'la, “Okhwola khubir're mukhukhupibwa esibi kho khwinjile mu Bwami bwa Nyasaye.”

²³Musielikanisa beela abakhulundu, ma mubusaayi nende okhuhonga okhulia nibabara mumakhono ko Mwami owabali nibasubiyemwo.

²⁴Nibabir'ra musibala sia Pisidia ma niboola Pamufulia.

²⁵Olwa bali nibamal'le okhukamba ling'ana Periga, babira nibatsia Atalia.

²⁶Okhurulayo bambukha mumeeli nibatsia Antiokia, aha abandu babasaayila khusirenda sia Nyasaye khulwemilimo echiabali nibahesisie.

²⁷Olwa boola Antiokia, babunjikha abandu belikanisa halala, ma nibababool'la kosi aka Nyasaye yabakhol'la, khandi singa obwa yekul'la Abetsimbia tsindi injila yokhusubila.

²⁸Nibamenyayo amatukhu amenji halala nende abasubili.