Read lunyore EBIKHOLWA 15 Bible Online

EBIKHOLWA 15 - lunyore bible

EBIKHOLWA 15

¹Abandu nalebe barula Ebuyahudi nibetsa Antiokia ma nibachiaka okhwibaal'la abasubili nibaboola, “Simunyala okhuhonibwa nimurasebelwe singa Amalako ka Musa kaboolanga tawe.”

²Paulo nende Baranaba nibaba nokhuhangalana okhwinji n'nabo khulwa akene yako, ma nikabisibwa mbu Paulo nende Baranaba ma nende abasubili abalala abelikanisa lia Antiokia batsie Yerusalemu okhulola abarumwa nende abakhulundu khwing'ana yilio.

³Barumwa nende likanisa, ne olwa babir'ra Foinike nende Samaria balandia akokhwekalukhania okhwa Betsinzibulo tsindi. Amang'ana yako kasangasia abasubili basiabwe bosi okhusila.

⁴Olwa boola Yerusalemu benjisibwa nende likanisa, abarumwa nende abakhulundu, nabo nibababool'la amang'ana kosi aka Nyasaye yakhola okhubir'ra mubo.

⁵Nebutswa abalala khubasubili abali abomukanda kwa Abafarisayi basinjila nibaboola, “Khatimba abandu betsinzibulo tsindi basebwe ma bechibwe okhulonda Amalako ka Musa.”

⁶Abarumwa nende abakhulundu babukaana halala okhwinoosia ling'ana yili.

⁷Inyuma wobuhingani obwinji Petero yasinjila nababool'la, “Abaana befwe, inywe mwamanya mbu okhurula khale Nyasaye yanzahula okhurula mwinywe okhukambila Abetsimbia tsindi Amang'ana Amalahi, kho bahul'le ma basubile.

⁸Ne Nyasaye omanyile emioyo chiabandu yakobokhela mbu ubahuchiliye khulwa okhubahelesia nabo Omwoyo Omutsienukhu singa obwa yali okhukhuhelesia ifwe.

⁹Siyakhola ebiela hakari wefwe n'nabo tawe; yabalekhela tsimbi tsiabwe sichila basubila.

¹⁰Ne luno busina mutemanga Nyasaye, nimura likokolo khubasubili eliakhukhumbula ifwe kata nende abakuka befwe okhulietukha?

¹¹Ifwe khusubilanga ma khuhonibwangwa khulwe esirenda sio Mwami Yesu singa yaba.”

¹²Omukanda kwosi kwaholela tsi, nikuhuyia Baranaba nende Paulo nibenoosianga akokhuchenya nende akamangalimwa aka Nyasaye yakhola mubandu Betsimbia tsindi okhubir'ra mubo.

¹³Olwa bamala okhul'loma Yakobo naboola, “Abaana befwe mumbulile!

¹⁴Simoni winoosisie singa obwa Nyasaye olwokhuranga yahendel'la Abetsimbia tsindi mbu ahinie mubo abandu baabe.

¹⁵Amang'ana yaka kafwana nende akabaroobi, singa obwa kahandikwa,

¹⁶‘Inyuma wamang'ana yaka ndikalukha, Ndakhombokhe khandi inyumba ya Daudi eyali okhukwa. Ndakhalombe obuyia amasisi kayo akali nikalikulukha ma ndakhachisinjisie.

¹⁷Kho abandu bandi bosi bakhetse khwise, Abetsimbia tsindi bosi aba ndalanga okhuba abanje.

¹⁸Nimbwo Omwami owakhola kano kamanyikhe okhurula khale, aboola.’

¹⁹“Khulwe yako ise mboolanga mbu: Khuranyasia abandu Betsimbia tsindi abasukhana okhwitsa khu Nyasaye tawe.

²⁰Nebutswa khubahandichile ebarwa okhubabool'la mbu baralia khwo ebiokhulia biemisango tawe sichila biahanwa khumisambwa, behanye obuheyi nende tsinyama etsimichilwe, khandi baranywa amalasile tawe.

²¹Okhuba Amalako ka Musa kakambwa mumatookho kosi khandi kasomwa mutsisinakoki sie Sabato.”

²²Ma abarumwa nende abakhulundu, halala nende likanisa liosi, nibalola nobulahi okhwela abandu mubo ma babarume Antiokia halala nende Paulo nende Baranaba. Nibela Yudasi owalangwa eliira lindi Barasaba nende Sila abali neifuma indahi,

²³ma nibabaruma nende ebarwa yino: “Ifwe, abarumwa nende abakhulundu, abaana benywe, khurumanga amasiesi khubaana befwe bosi abarali Abayahudi, abali Antiokia, Siria nende Kilikia.

²⁴Khuhuliye mbu abandu nalebe abarula khwifwe bamunyasianga namang'ana kabwe, nibasiamia emioyo chienywe. Yabo ifwe sikhwabaruma tawe.

²⁵Ma khwakan'ne halala ne khurumile abandu khwinywe. Nabetse nende Baranaba ma nende Paulo, abakhwayanza,

²⁶abamal'le okhwehaana abene khulwe eliira lio Mwami wefwe Yesu Kristo.

²⁷Kho khumurumilanga Yudasi nende Sila, abanabam'bool'le neminwa chiabwe akakhuhandichile kano.

²⁸Omwoyo Omutsienukhu nende ifwe khuluutsi mbu, mbu nobulahi khuramutuukha omusiko omusiro okhuyomba amalako yaka tawe;

²⁹Muraliakhwo ebiokhulia ebiahanwa khulwe emisango tawe, murakhanywekhwo amalasile, murakhalia khwo inyama emichilwe tawe, ma mwehanye obuheyi. Mwakhaba nimukhol'le obulahi nimwakhehanya akene yako. Mube nemilembe.”

³⁰Nibamal'le okhubaseebula, babaruma okhutsia Antiokia owa babunjelesia omukanda kwabasubili ma nibabahelesia ebarwa.

³¹Olwa basoma ebarwa y'yo, akalimwo kabatsuuba okhusila ma nibasangala buli.

³²Yudasi nende Sila, abali abaroobi, bal'loma nende abasubili basiabwe yabo khulwo oluhono nibabatsuuba namang'ana amenji nende okhubatinyilisia.

³³Olwa bali nibamenyele yo amatukhu akahel'le, abasubili basiabwe aba Antiokia babasebula nemilembe ma nibakalukha khu yabo abali nibabaruma. [

³⁴Nebutswa Sila yalola nibuli obulahi mbu asikale amenye ebwene y'yo.][5]

³⁵Paulo nende Baranaba bamenyakhwo Antiokia khumiesi miti, nibebaalanga ne nibakamba ling'ana lio Mwami halala nende abandi abenji.

³⁶Inyuma wamatukhu mati Paulo yabool'la Baranaba, “Chenda khukalukhe okhukonya abasubili basiefwe mu sie litookho elia khwakamba mwo ling'ana lio Mwami, khulole singa batsitsachil'langa.”

³⁷Baranaba yenya babukule Yohana oweliira lindi Mariko, atsie n'nabo.

³⁸Nebutswa Paulo siyalola nibuli obulahi okhumubukula tawe, sichila yabalekha Pamufulia, nasuula okhusanga n'nabo mumilimo.

³⁹Ma nikhubaho okhuhingana okhukali hakari wabwe okhwachila nibabukhana. Baranaba nabukula Mariko nibaniina eliaro nibatsia Kupuro.

⁴⁰Ne Paulo naye niyela Sila ma narula, namal'le okhurebwa musirenda sio Mwami nende abasubili basie abaliho.

⁴¹Yabir'ra Siria nende Kilikia natinyilisianga amakanisa.