Read lunyore EBIKHOLWA 16 Bible Online

EBIKHOLWA 16 - lunyore bible

EBIKHOLWA 16

¹Paulo yoola Deribe nende Lusitera, aha Omwechi mulala yali owalangwa Timoteo. Nyina yali omukhaana Omuyahudi, owali omusubili naye khandi, nebutswa samwana yali Omuyunani.

²Timoteo yali owoluyali olukali mubasubili ba Lusitera nende Ikonia.

³Paulo yenya Timoteo atsie n'naye khuluchendo, khulwe yako yamala namuseba. Yakhola mbwo sichila Abayahudi bosi abamenyanga mumbeka yitsio bali nibamanya mbu samwana Timoteo yali Omuyunani.

⁴Olwa babir'ra mumatookho yako bahelesie abandu amalako akahanwa nende abarumwa ma nende abakhulundu abali Yerusalemu, nibababool'la mbu bakafumile.

⁵Amakanisa kamala nikakufuhasibwa mukhusubila, ma abasubili bameetekha okhwinjiha sielitukhu.

⁶Babir'ra musibala sia Firugia nende Galatia, okhuba Omwoyo Omutsienukhu siyabahuchil'la bakambe ling'ana musibala sia Asia tawe.

⁷Olwa boola khuluchelekha lwa Musia, batema okhwinjila Bitsunia, nebutswa Omwoyo wa Yesu siyabahuchil'la tawe.

⁸Bamala nibabir'ra Musia nibatsia Troa.

⁹Obutukhu yibwo Paulo yalola obusukhi, nalola omundu mulala owa Makedonia nasinjiye ho, namuhomba naboola, “Wambukhe witse Makedonia okhukhonye.”

¹⁰Paulo namal'le okhulola obusukhi yibwo, nonoho nikhwerechekha okhutsia Makedonia sila okhusisil'la, nikhuli nende obusubili mbu Nyasaye ukhulanjile khubahil'le Amang'ana Amalahi.

¹¹Khwanina muliaro nikhurula Troa, nikhutsia bulunji okhwola Samotserake, ne litukhu elialondakhwo nikhwola Neapoli.

¹²Olwa khwarulayo khwatsia Filipi, elili litookho lia Makedonia, elili likhongo mulubeka lwa Baroma bamihanga. Khwamenya mwitookho yimwo amatukhu kahel'le.

¹³Litukhu lie Sabato khwarula esioba we litookho, nikhutsia khuluchinga lwomuchela, aha khwakanakana nihabundu hokhusaaya. Nikhwikhala, nikhul'loma nende abakhasi abali nibebunjikhile ho.

¹⁴Mulala khubakhasi abakhuhulila yali Ludia owe litaala lia Tsuatira, owali omukhala wetsingubo tsisembe. Yali omukhasi owaria Nyasaye, ma Omwami niyekula Omwoyo kukwe mbu ahulile amang'ana ka Paulo yali naboolanga.

¹⁵Olwa omukhasi uyo nende abomunyumba yiye bali nibabaputisilwe yakhwinjisia naboola, “Nikali muluutsi tooto mbu ise subiye Omwami, mwitse mubutsekhwo munyumba mwanje.” Nakhuhindilisia okhwola nikhutsia.

¹⁶Litukhu lindi olwa khwali nikhutsitsanga habundu hokhusaaya, khwakana nende omukhaana mulala owali nomwoyo kwobufumu. Omukhaana uyo yanyool'langa abaami baabe injelesio ingali khulwo khulakula khukhwe.

¹⁷Yalonda Paulo halala n'nefwe, nahanzukha naboola, “Abandu yaba nabarumikhi ba Nyasaye Oweikulu Okhusila. Bamukambilanga injila yokhuhonibwa.”

¹⁸Yakhola mbwo khulwa amatukhu amenji okhwola olwa Paulo yasinyikha nasukhana nabool'la omwoyo kwali muye, “Khulakanga muliira lia Yesu Kristo, orule muye.” Ma omwoyo tsana nikurula esaa yene yiyo.

¹⁹Abaami bomukhaana uyo olwa balola mbu obunayi bwabwe obwokhunyoola emiandu burul'le, batila Paulo nende Sila nibabakhwesa nibabahila musiiro imbeli wabakhongo.

²⁰Babahila khubakhalachi nibaboola, “Abandu yaba na Bayahudi, ne bononianga litookho liefwe.

²¹Bebaalanga emiima echie ifwe Abaroma khurahuchil'lungwa okhubukula nohomba okhulonda.”

²²Omukanda kwabandu nikubabuchila okhuyaala Paulo nende Sila. Abakhalachi besiina nibarandula tsingubo tsia Paulo nende Sila, nibalaka mbu batiabwe eb'boko.

²³Olwa bamala okhubariaba okhusila, babara mubuhambe, ne nibalaka omulindi wabahambe okhubalinda obutinyu.

²⁴Olwomulindi wobuhambe yanyoola lilako yili, yabara munyumba yo mukari, ma nabohela ebilenje biabwe khubibambo ebisiro.

²⁵Ne mubutukhu hakari Paulo nende Sila bali nibasaayanga ne nibembanga tsinyembo tsiokhwitsoomia Nyasaye, ne ababohe bandi nibabahuyia.

²⁶Matetekhana khwaliho okhutechela khwesibala okhukali, okhwatechesia omuse kweinyumba yobubohe. Nonoho emiliango chiosi nichikukha ne eminyol'lo chiababohe bosi nichibohololokha.

²⁷Omulindi wabahambe yabukha mundoolo, ne olwa yalola emiliango chieinyumba yababohe nichialamile, yapaala mbu ababohe belukhile, ma nahinia olukanga lulwe niyenya okhweyira omwene.

²⁸Nebutswa Paulo yalanjisia nomwoyo omukali naboola, “Oresalisia tawe! Okhuba fwesi khuli hano.”

²⁹Omulindi wabahambe yalanga mbu aler'rwe etaya, niyenjila mukari matetekhana, ma nakwa habilenje bia Paulo nende Sila, natechelanga khulwo oburi.

³⁰Ma nabahinia esioba ne nareeba, “Abaami, khole sina kho mbonibwe?”

³¹Nibamukalusia, “Subila Omwami Yesu, ne wakhahonibwa, ibe nende abomunyumba yiyo.”

³²Nibamukambila ling'ana lio Mwami ye nende bosi abali munyumba yiye.

³³Musaa yene iyo butukhu yibwo omulindi wabahambe yababukula, nasaaba omwa bali nibatiabilwe ma ye nende abeinyumba yiye bosi nibabaputiswa.

³⁴Ma nabukula Paulo nende Sila nabahila munyumba yiye, nabahelesia ebiokhulia. Ye nende abeinyumba ye bosi betsula nobusangali sichila bali nibasubiye Nyasaye.

³⁵Olwa bwasia, abakhalachi baruma abasikari abakhongo, nibaboola, “Muboholole abandu yaba batsie.”

³⁶Omulindi wabahambe yamanyia Paulo amang'ana yaka naboola, “Abakhalachi barumanisie ling'ana mbu mubohol'lwe. Luno munyala okhurula mutsie nomulembe.”

³⁷Nebutswa Paulo yamukalusia naboola, “Bakhutiabiye imbeli wabandu ne nikhuralikhwo nesikha siosi — nefwe khuli Abaroma. Bakhureye mubuhambe ne luno benyanga bakhuhinie masilisi. Sikanyalikha tawe. Okhwola betse abene bakhubohol'le.”

³⁸Abasikari abakhongo yabo batsia okhubool'la abakhalachi amang'ana yaka; nabo olwa bahul'la mbu Paulo nende Sila bali Abaroma baria okhusila.

³⁹Ma nibatsia okhubahomba, nibabahinia mubuhambe ne nibababool'la barule mwitookho yimwo batsie.

⁴⁰Paulo nende Sila barula mubuhambe, nibatsia munyumba ya Ludia. Bakaanamwo nende abasubili ma nibababool'la amang'ana akokhubalemia emioyo ma olweinyuma nibarula nibatsia.