Read lunyore EBIKHOLWA 17 Bible Online

EBIKHOLWA 17 - lunyore bible

EBIKHOLWA 17

¹Paulo nende Sila babir'ra Amufipoli nende Apolonia ma niboola Tesalonike ahe Sinakoki ya Abayahudi yali.

²Paulo yenjila aha bali singa ifwo yiye yali, nahingana n'nabo amatukhu ke Sabato kataru narumikhilanga Amahandiko Amatsienukhu.

³Yenoosia Amahandiko nabamanyia mbu kali akobuha Kristo okhusalisibwa ma asimukukhe okhurula mubafu. Nababool'la, “Yesu owa mukambilanga inywe uyu niye Masihi.[6]”

⁴Abalala khubo bahuchil'la ma nibeyonga nende Paulo nende Sila. Khandi omukanda omwinji okwa Abayunani abaria Nyasaye halala nende abakhasi abenji abali abakhaye beyonga n'nabo.

⁵Nebutswa Abayahudi basiendekha nibahetsa abandu ababi abali abakara okhurula khutsinjila, nibaba omukanda omukali ma nibakhola indiri mwitookho. Nibafumbila inyumba ya Yasoni nibarunanga banyoolemwo Paulo nende Sila babalere ebulafu imbeli wabandu.

⁶Nebutswa sibabanyoolamwo tawe, ma nibakhwesa Yasoni nende abalala khubasubili nibabahila khubakhongo belitookho, nibakhupa liyoka nibaboola, “Abandu yaba bali okhusukhania esibala siosi ne luno bol'le mwitookho lino khandi.

⁷Ne Yasoni ubenjisisie munyumba mumwe. Abandu yaba bosi bakholanga akafukulanga amalako ka Kaisari nibaboola, ‘Aliho omuruchi undi olangwanga Yesu.’ ”

⁸Bahendia abakhongobe litaala nende omukanda kwabandu khulwa amang'ana yako.

⁹Abakhongo bamala nibabool'la Yasoni nende abasie barunge omurungo kwokhulakhulwa ma nibabalekha batsie.

¹⁰Olwo butukhu bwola, abasubili baruma Paulo nende Sila okhutsia Bereya. Olwa boolayo batsia mu Sinakoki ya Bayahudi.

¹¹Abandu bebwene iyo bali abahulili okhusila okhuyomba aba Tesalonike. Babukula amang'ana koburume munjila yokhuhulilisia ne sielitukhu barunilisianga akahandikwa okhulola nikali mbu aka Paulo nende Sila baboolanga nakatooto.

¹²Abenji khubo basubila halala nende abakhasi Abayunani abeifwo ingosi, nende abasatsa abenji.

¹³Nebutswa Abayahudi ba Tesalonike olwa bahul'la mbu Paulo yali nakambanga ling'ana lia Nyasaye mu Bereya, batsiayo nibachiaka okhuchemelesia emikanda chiabandu.

¹⁴Nonoho abasubili baruma Paulo atsie khuluchinga lweinyanza, nebutswa Sila nende Timoteo basikala Bereya.

¹⁵Abandu bahelekha Paulo m'batsia n'naye okhwola Atsene. Ma nibakalukha nende amalako ka Paulo mbu Sila nende Timoteo banguhe okhumulonda.

¹⁶Olwa Paulo yali nalin'danga Sila nende Timoteo Atsene, omwoyokwe kwasinyikha olwa yalola litookho yilio nilietsula mwo emisambwa.

¹⁷Yahingana nende Abayahudi nende abandu bandi abekayakayanga Nyasaye musinakoki, ne sielitukhu yahingana nende bosi abetsa musiiro.

¹⁸Abalala mubo abebaalanga amebaalo aka Abepikurio nende Abasitoiki bahingana n'naye. Abalala nibarebana, “Omulakalakani uyu yenya okhuboola sina?” Ne abandi nibakalusia, “Afwananga omukambi wabanyasaye abacheni.” Baboola mbwo sichila Paulo yali nakambanga aka Yesu nende okhusimukukha.

¹⁹Nibafumila Paulo nibamuhila Areopago nibaboola, “Khwenyanga khumanye okhwibaala okhuyia okhwoboolanga yikhu.

²⁰Ebindu bilala ebiakhuhuliye noboolanga nebicheni m'marwi kefwe. Khwenyanga khumanye esifune esiamang'ana yaka.”

²¹(Okhuba abandu ba Atsene nende abandu bandi abamenyangayo barumikhilanga obweyangu bwabwe bwosi okhutwakana amang'ana amacheni.)

²²Paulo yasinjila imbeli wabakhongo bomuse kwa Areopago, naboola, “Inywe abandu ba Atsene, ndolanga muli abekayakayi okhusila.

²³Okhuba olwa mbir'renje mwitookho lienywe ne nindola ebia mwekayakayanga, nyooye olusambwa olwahandikwa khwo, ‘Khu Nyasaye oramanyikhile.’ Kho uyo owa mwekayakayanga, nimuram'manyile, niye owe ise mukambilanga.

²⁴Nyasaye owalomba esibala nende biosi ebili mwo, niye Omwami womwikulu nende musibala, ne siamenyanga mutsihekalu etsiombokhwa nabandu tawe.

²⁵Khandi siarumikhilwanga nende amakhono kabandu singa olemanga esindu siosi tawe, okhuba niye ohaananga obulamu khubandu, khandi niye ochilanga nibahelana nende okhubaha ebindu biosi.

²⁶Okhurula khumundu mulala yalomba tsimbia tsiosi etsiabandu ma nabanyal'la okhumenya musibala siosi. Omwene yalaka tsinyinga etsielwa, nende tsinzakho etsiobumenyo bwetsimbia yitsio.

²⁷Yakhola mbwo kho bamurune ma bamunyoole khulwa okhuhabasia. Kata mbwo Nyasaye siali ehale khu siamulala khwifwe tawe.

²⁸Singa omundu nalebe yaboola, ‘Muye nimwo omwa khumenyanga, nikhuchenda nende okhubamwo.’ Ni singa abalala khubembi benywe abetsinyembo baboola, ‘Ifwe khuli abaana baabe’

²⁹Ifwe nikhuba nikhuli abaana ba Nyasaye sikakhuhel'le okhupaala mbu Nyasaye afwana etsahabu nohomba efetsa, nohomba lichina eliabandu bakunza nobusitsa bwabwe tawe.

³⁰Nyasaye wamayia amatukhu akabandu bali mukhukorwa. Nebutswa luno alakanga abandu bosi mumbeka tsiosi balekhe tsinjila tsiabwe tsimbibibi.

³¹Okhuba wamala okhwela litukhu elia alikhalachilamwo abomusibala esiina mubulunji okhubir'ra mumundu mulala owa yela. Nyasaye wakakhola okhumanyikha khubandu bosi munjila yokhusimukusia omundu uyo okhurula mubafu.”

³²Olwa bahul'la Paulo nal'lomanga khwing'ana liokhusimukusibwa khwa abafu, abalala khubo bachiaka okhukhola inzekhelesi. Nebutswa abandi baboola, “Khwakhayanza okhuhul'la khandi amang'ana yaka.”

³³Kho Paulo yamala narula khubo, natsia.

³⁴Nebutswa abandu balala bahambana n'naye, nibasubila. Abalala khubo bali Dionisio mulala khubomuse kwa Areopago, omukhasi owalangwa Damari nende abandi.