Read lunyore EBIKHOLWA 18 Bible Online

EBIKHOLWA 18 - lunyore bible

EBIKHOLWA 18

¹Inyuma we yako, Paulo yarula Atsene natsia Korintho.

²Yanyoola ebwene yiyo Omuyahudi mulala owalangwa Akula, owebulwa Ponto. Akula halala nende omukhasi uwe owalangwa Piliskila, bali nibakalukhile okhurula Italia amatukhu yako sichila Omuruchi Kilaudia yali niyalaka mbu Abayahudi bosi batabibwe okhurula Roma. Paulo yatsia okhubalola

³ma namenya n'nabo sichila bali abasitsa bokhunaba amaselo singa ye.

⁴Sie Sabato yahingana musinakoki natemanga okhukhwesa Abayahudi nende Abayunani mbu basubile.

⁵Olwa Sila nende Timoteo boola okhurula Makedonia, Paulo yachiaka okhurumikhila obweyangu bubwe bwosi okhukamba, naribul'la Abayahudi kol'lani mbu Yesu niye Masihi.

⁶Olwa bamufukula, nibaboola amabi khuye yabungul'la olukuukhi okhurula khutsingubotsie ma nababool'la, “Nimuba nimukora yako nakenywe abene, ise sindi nesikha tawe, okhurula luno nzitsanga khu Betsinzibulo tsindi.”

⁷Ma narula yo natsia okhumenya munyumba eyo omundu undi owalangwanga Tito Yusto, owekayakayanga Nyasaye. Inyumba ya Tito yali ahembi nende esinakoki iyo.

⁸Nebutswa Krispo, owali omukhulundu wesinakoki, yasubila Omwami halala nende abeinyumba yiye bosi. Abakorintho abenji bahul'la amang'ana yako ma nibasubila, nibabaputiswa.

⁹Litukhu elala, mubutukhu Omwami yabool'la Paulo mubusukhi; “Oraria tawe, tsitsachil'la butswa okhuboola sila okhufwa omwoyo;

¹⁰okhuba ndi halala n'nawe. Abulaho omundu owanokhukhol'le obubi, sichila ise ndi nende abandu abenji mwitookho muno.”

¹¹Ma Paulo namenyayo omuhika mulala nende enusu, niyebaal'langa abandu ling'ana lia Nyasaye.

¹²Nebutswa olwa Galio yali omukafuna wa Akaya, Abayahudi bosi bebunjikha ma nibafumila Paulo nibamuhila khumuse.

¹³Nibaboola, “Khusitakanga omundu uyu sichila ahombelesianga abandu okhwekayakaya Nyasaye munjila efukulanga lilako!”

¹⁴Paulo nasili kata okhuchiaka okhul'loma Galio nabool'la Abayahudi, “Yaka kalaba nikali amang'ana akobubi nohomba akokhubehelesia okhubi khwinywe Abayahudi, khane ndakhaba nende esifune esio okhumuhulila.

¹⁵Nebutswa nikaba nikali amahangasi khumang'ana nohomba khumera kamalako kenywe, mukaloosie abene. Ise sinyenya okhuba omukhalachi wamang'ana yaka tawe.”

¹⁶Ma nabakhunga okhurula imbeli wesiina.

¹⁷Nabo bosi nibafumila Sositsene owali omukhulundu wesinakoki, nibamutiabila imbeli wesiina. Nebutswa Galio siyahendel'la akene yako kata nahati tawe.

¹⁸Paulo yatsitsachil'la okhumenya nende abasubili Ebukorintho khulwa amatukhu amenji. Ma nabasebula, niyambukha okhutsia Siria halala nende Piliskila nende Akula. Olwa yoola Kenikerea yabekwa liswi khumurwe kwe singa obwa yali niyehwaba.

¹⁹Boola Efeso ma Paulo nalekha yo Piliskila nende Akula. Natsia musinakoki ma nahingana nende Abayahudi.

²⁰Abandu bamureba amenye n'nabo oluhono, nebutswa siyahuchil'la tawe.

²¹Nebutswa yaseebulana n'nabo nababool'la, “Nyasaye nayanza ndakhakalukhe.” Ma naniina muliaro narula Efeso.

²²Nyinga yekha Kaisaria, yatsia Yerusalemu nasiesia likanisa ma naselenjera Antiokia.

²³Namal'le yo amatukhu matu, yarula yo nachenda mutsingongo tsia Galatia nende Firugia nakufuhasianga abasubili bosi.

²⁴Omuyahudi mulala owalangwa Apolo, omwibule wa Alekisandaria, yoola Efeso. Yali omundu omulwenyukhu mukhul'loma ma owamanya Amahandiko Amatsienukhu okhusila.

²⁵Yali niyebaal'lwa injila yo Mwami ma yali nesinani mukhuboola amang'ana ka Yesu. Yebaala habwene, nebutswa yali niyamanya okhubaputisa khwa Yohana khwonyene.

²⁶Yachiaka okhul'loma nolutswoni musinakoki. Olwa Piliskila nende Akula bamuhul'la bamuhila ingo wabwe ma nibamwinoosia injila ya Nyasaye habwene.

²⁷Olwa Apolo yarula okhwambukha okhutsia Akaya, abasubili ba Efeso bamutsuuba, nibahandichila abasubili ba Akaya mbu bamwinjisie. Olwa yoola yo, yakhonyel'la okhusila abasubili khulwe esirenda sia Nyasaye.

²⁸Okhuba yalechelesia Abayahudi bosi imbeli wabandu, namanyia mu mahandiko mbu Yesu niye Masihi.