Read lunyore EBIKHOLWA 19 Bible Online

EBIKHOLWA 19 - lunyore bible

EBIKHOLWA 19

¹Olwa Apolo yali Korintho, Paulo yali nachendanga mutsingongo tsiomukari mwesibala yisio niyoola Efeso. Yanyoola yo abechi balala,

²ma nabareeba, “Mwanyoola Omwoyo Omutsienukhu olwa mwasubila?” Nibamukalusia, “Tawe, kata khusili okhuhul'lakhwo mbu Omwoyo Omutsienukhu aliho.”

³Nabareeba, “Kho mwanyoola okhubaputiswa khufwana mbwena?” Nabo nibakalusia, “Okhubaputiswa khwa Yohana.”

⁴Paulo nababool'la, “Okhubaputisa khwa Yohana khwali okhwe yabo abali nibarul'le mutsimbi tsiabwe. Yohana yabool'langa abandu basubile uyo owali niyetsanga inyuma uwe, niye Yesu.”

⁵Olwa bakahulila, babaputiswa muliira lio Mwami Yesu.

⁶Ma Paulo nabarakhwo amakhono kaake ne Omwoyo Omutsienukhu nayela khubo, nibachiaka okhul'loma mutsinimi etsiabukhan'ne, nibalandia oburume bwa Nyasaye.

⁷Bosi halala bali abandu likhumi nende babili.

⁸Paulo yenjila musinakoki ma nal'loma khubandu nolutswoni khulwe emiesi chitaru, nahingananga n'nabo natema okhubamanyia obwatooto bwamang'ana ako Bwami bwa Nyasaye.

⁹Nebutswa abalala khubo bali abakakhamanu, nibasuula okhusubila, nibachiaka okhul'loma amabi habulafu khu keinjila yo Mwami. Paulo yamala narula nabalekha, natsia sibeka nende abechi, nahingana n'nabo sielitukhu musinakoki ya Turano.

¹⁰Yaka katsitsachil'la khulwemihika chibili okhwola abandu bosi abamenyanga Asia, Abayahudi nende abandu Betsinzibulo tsindi nibahul'la ling'ana lio Mwami.

¹¹Nyasaye yakhola akamangalimwa okhubir'ra mu Paulo.

¹²Kata ebitambaya nende ebilabi ebia Paulo yarumikhilanga biabukulwa nibihil'lwa abalwaye ne nibahonibwa obulwaye bwabwe, ne abalinji nende emioyo chiesifwabwi chiarula mubo.

¹³Abayahudi balala abali abayeyemi, abafumu nibachiaka okhurala eliira lio Mwami Yesu khubandu abali nemioyo chiesifwabwi. Nibaboola, “Khumulakanga muliira lia Yesu owa Paulo akambanga.”

¹⁴Abaana bane nabataru abo Mwesaalisi Omukhongo Wesiyahudi owalangwa Sekewa bakholanga akene yaka.

¹⁵Nebutswa omwoyo kwesifwabwi kwababool'la, “Ndamanya Yesu, khandi ndamanya Paulo, nenywe ninywe bena?”

¹⁶Omundu owali nomwoyo kwesifwabwi uyo yamala nabaruma khwo, nabayembel'la netsingufu. Nibelukha okhurula munyumbamwe nibali esihechenye nende tsinguma.

¹⁷Ling'ana yili liamanyikha khubandu bosi, Abayahudi nende Abayunani abamenyanga Efeso. Oburi bwabahamba bosi, nibetsoomia eliira lio Mwami Yesu.

¹⁸Abasubili abenji betsa nibeyama kol'lani aka bali nibakhola.

¹⁹Abandi khubo abali nibarumikhilanga obufumu, balera ebitapu biabwe biobufumu, nibabisamba imbeli wabandu bosi. Babala obukusi bwebitapu yibio nibanyoola buhela ebitonye biefetsa etsielefu amakhumi karano.

²⁰Munjila iyo ling'ana lio Mwami liatsitsachil'la okhulanda niliba netsingufu tsinyinji.

²¹Olwa amang'ana yaka kali nikekhol'le, Paulo yachooma mumwoyokwe okhutsia Yerusalemu nabir'ra Makedonia nende Akaya. Naboola, “Nimal'le okhwola Yerusalemu kambel'le khandi okhutsia Roma.”

²²Ma naruma babili khu bali abakhonyani baabe, Timoteo nende Erasto bemele okhutsia Makedonia, naye omwene nasikala Asia amatukhu matututu.

²³Olwene yilwo nilwo olwe indiri ingali okhusila yali Efeso khulwe injila yo Mwami.

²⁴Yaliho omundu mulala owalangwa Demeterio, owali omuruli wefetsa, owemilimo chie chiali okhulomba ebiniini biefetsa ebie Hekalu ya Aritemi. Emilimo yichio chiamuler'ranga obukhala obwinji halala nende abarumikhi baabe.

²⁵Demeterio yabunjelesia halala abarumikhi baabe nende abakholi bandi abomulimo singa yikwo nababool'la, “Abandu inywe, mwamanya mbu obuhinda bwefwe burulanga khumulimo yiku.

²⁶Ne luno mulolanga abene nimuhul'la aka Paulo akholanga, simuli mu Efeso muno mwonyene tawe nebutswa kata mu Asia mwosi. Asukhanianga abandu nababool'la bahuchil'le mbu abanyasaye abalombwa nabandu sibali abanyasaye tawe.

²⁷Obukhala bwefwe yibu nabunyoole eliira libibibi. Ne sikali yako konyene tawe, nebutswa ehekalu iyi eya nyasaye omukhasi omukhongo Aritemi sinebalwe esindu tawe ma nahinibwe khubukhongo bubwe — uyu owabandu bosi mu Asia nende esibala siosi bekayakayanga!”

²⁸Olwa bahul'la yaka betsula nelirima, nibahanzukha nibaboola, “Aritemi wa Efeso nomukhongo.”

²⁹Litookho liosi lietsula mwo indiri. Nibafumila Gayo nende Arisitariko, abebule ba Makedonia abachendanga nende Paulo, nibelukha n'nabo okhwola munyumba yemisino.

³⁰Paulo yenya omwene okhutsia m'mukanda yikwo nebutswa abechi bamukaya.

³¹Abalala khubaruchi ba Asia abali abalina baabe bamurumila oburume nibamuhomba aratsia munyumba yemisino tawe.

³²Olwene yilwo siomundu yali nakhupanga liyoka, balala bali nibaboolanga yaka ne abandi kala, okhuba abenji khubo sibamanya esiachila nibakana tawe.

³³Abandu balala bakhalaka mbu Alekisanda niye owali mwene mang'ana okhuba Abayahudi bamuruma atsie imbeli. Ma Alekisanda nasimila abandu omukhono mbu babune, ma natema okhubakalusia.

³⁴Nebutswa olwa bamanya mbu no Muyahudi, bosi bahanzukha halala khulwetsisaa tsibili nibaboola, “Aritemi wa Efeso nomukhongo!”

³⁵Nyinga omuhandichi welitookho yamala okhusiling'ania abemikanda, nababool'la, “Abaefeso basianje, siomundu wamanya mbu litookho lia Efeso nilio elitendanga ehekalu ya Aritemi omukhongo, nende esiniini esiakukha okhurula mwikulu.

³⁶Abulaho onyala okhwambakhana amang'ana yaka. Kho kamuhel'le okhusiling'ana, murakhola khwo ling'ana liokhutetekhana tawe.

³⁷Muler're abandu yaba hano ne sibali abebi bebindu bietsihekalu nohomba abanyechi ba nyasaye wefwe omukhasi tawe.

³⁸Nikakhaba mbu Demeterio nende abasitsa abali halala n'naye bali neling'ana khumundu wosi, khuli nende abaruchi ma nende amatukhu kemise. Babayaale ebwene iyo.

³⁹Nebutswa niliakhaba ho ling'ana lindi, liakhaloosibwa mumuse kwamalako.

⁴⁰Okhuba khwakhanyoola amatinyu kokhukhuyaala khulwe indiri ya leelo erali nesifune, ne sikhwakhahana esifune esilahi khumukanda tawe.”

⁴¹Olwa yamala okhuboola yaka, nibasalana.