Read lunyore EBIKHOLWA 2 Bible Online

EBIKHOLWA 2 - lunyore bible

EBIKHOLWA 2

¹Olwe litukhu lia Pentekoste[2] liola, abasubili bosi bali nibebunjikhile halala.

²Omuhumo kwarula mwikulu matetekhana okwafwana singa omuyeka omukali okuhungutsanga, ma nikwitsula inyumba yosi eya bali nibekhayemwo.

³Ma nibalola ebindu ebiafwananga singa tsinimi tsiomul'lo, nitsisalana nitsiyela khusiamulala khubo.

⁴Bosi nibetsula Omwoyo Omutsienukhu, nibachiaka okhuboola mutsinonomo tsindi singa obwo Omwoyo yabanyal'la okhuboola.

⁵Abayahudi, abandu abaria Nyasaye, abali nibarula mutsimbia tsiosi musibala bali nibamenya Yerusalemu olwene yilwo.

⁶Olwa bahul'la omuhumo yikwo, omukanda omukali kwebunjikha. Bosi bang'ang'ala sichila simulala khubo yahul'la abasubili nibal'lomanga ol'lolomo lulwe.

⁷Nibachenya bosi, nibahumania nibaboola, “Abandu abal'lomanga mbu yaba sibali Abagalilaya?

⁸Busina ifwe fwesi simulala ahul'langa nibal'loma ol'lolomo lwefwe?

⁹Balala khwifwe naba Paritsi, Abamede nende Abaelamu, abandi barulanga Mesopotamia, Ebuyahudi, Kapadokia, Ponto nende Asia,

¹⁰Firugia nende Pamufulia, Emisiri nende tsimbeka tsia Libia ahembi nende Kurene. Abalala khwifwe nabacheni okhurula Roma,

¹¹Abayahudi nende Abetsimbia abenjila mudini ya Bayahudi, ne abalala khwifwe barula Kurete nende Ebuharabu; fwesi khuhul'langa nibal'loma mutsinonomo tsiefwe nibaboola akemilimo chia Nyasaye emikhongo.”

¹²Bosi bachenya nibahumania nibarebana, “Kano nimang'ana sina?”

¹³Nebutswa abandi babakhol'la inzekhelesi nibaboola, “Abandu yaba banyweye ma bakhol'lwe.”

¹⁴Nebutswa Petero yasinjila halala nende abechi bandi likhumi nende mulala nachiaka okhul'loma khubandu nomwoyo omukali naboola, “Inywe Abayahudi basiefwe nende inywe mwesi abamenyanga Yerusalemu, muhul'lisie bulahi amang'ana kanje.

¹⁵Abandu yaba sibakhol'lwe singa mukanakananga tawe; luno netsisaa tsitaru tsiamukamba.

¹⁶Nebutswa ling'ana yili nelio omuroobi Yoeli yaboola:

¹⁷‘Yaka niko aka ndakhakhole Mumatukhu kesihesi, Nyasaye abolanga: Ndakhatsukhil'le khubandu bosi Omwoyo wanje: Abasiani benywe nende abakhaana bakhaboole amang'ana kanje. Ababukha benywe bakhalole obusukhi, ne abakhulundu benywe bakhaloore amalooro.

¹⁸Yee, kata khubarumikhi banje abasiani nende abakhaana, ndakhabatsukhil'le khwo Omwoyo wanje, amatukhu yako, nabo bakharoobe.

¹⁹Ndakhakhole akamangalimwa ikulu khwikulu, ne akokhuchenyia musibala hasi. Amatsahi nende omul'lo nende omwosi omusiro biakhabeho;

²⁰eliuba liakhakalukhanibwe lilabe esiilima nomwesi kwakhabe omwakhanyu singa amatsahi, litukhu likhongo elio Mwami nilisili okhwola.

²¹Ne wosi olilanga khuliira lio Mwami yakhahonibwe!’

²²“Inywe abandu ba Isiraeli; hulile amang'ana yaka! Yesu wa Nasareti yali omundu owobunyalibwe bwobunyasaye bwabisulwa khwinywe munjila yokhuchenya nende ebilolelo ebia Nyasaye yakhola hakari wenywe munjila yiye singa mumanyile.

²³Okhulondokhana nende obuloosie bwa Nyasaye mwene yakhalaka mbu Yesu yakharebwe mumakhono kenywe, nenywe mwamura mumakhono kabandu ababi ma nibamubamba.

²⁴Nebutswa Nyasaye yamusimukusia okhurula mubafu namuhonia okhurula mubunyali bwokhufwa sichila sikanyalikha abohwe nende okhufwa tawe.

²⁵Okhuba Daudi yaboola khuye mbu: ‘Ndalola Omwami imbeli wanje amatukhu kosi. Ali n'nase khumukhono musaatsa, kho sindakhatechesibwa tawe.

²⁶Khulwe yako omwoyo kwanje kwitsuye nobusangali khandi amang'ana kanje kalimwo obusangali omubili kwanje kulimenya mubunaayi

²⁷sichila siolilekha omwoyo kwanje Emakombe tawe. Kata siolihuchil'la omutsienukhu uwo abol'le musilindwa tawe.

²⁸Wainzibaal'la tsinjila tsiobulamu ne okhubahokhwo khulinzitsusia nobusangali.’

²⁹“Abaana befwe, okhwola mubool'le kol'lani amang'ana ka kuka wefwe Daudi. Yafwa ma nayabilwa, ne esilindwa sisie sisiliho n'nefwe kata leelo.

³⁰Nebutswa sichila Daudi yali omuroobi yamanya mbu Nyasaye yamwesuhila esiesuho mbu mulwibulo lulwe yakhekhasiemwo mulala owokhuruka musielenje sisie.

³¹Daudi yalola aka Nyasaye yaboola nikasili okhwekhola ma nal'loma amang'ana kokhusimukukha khwa Kristo olwa yaboola, ‘Siyalekhwa Emakombe, omubilikwe sikwabola tawe.’

³²Nyasaye wasimukusia Yesu mwene uyu ne fwesi khuli abakobokheli baabe.

³³Wachingulwa ikulu khumukhono musatsa kwa Nyasaye, nahebwa okhurula khu Papa lisubisio lio Mwoyo Omutsienukhu. Ne esiamulolanga nimuhul'la yisi nokhutsukhil'lwa khwo Mwoyo uyo khwifwe.

³⁴Okhuba Daudi mwene siyaniina okhutsia mwikulu tawe, nebutswa omwene yaboola, ‘Omwami yabool'la omwami wanje, yikhale khumukhono kwanje omusaatsa,

³⁵okhwola olwa ndikhola abasuku baabo balabe hasi webilenje bibio.’

³⁶“Abandu bosi aba Isiraeli bahel'le bamanye ototo mbu Yesu uyo oweinywe mwabamba, niye owa Nyasaye yakhola abe Omwami khandi Masihi.”

³⁷Olwabandu bahul'la yaka emioyo chiabarotsa, nibareeba Petero nende abarumwa bandi: “Baana befwe, khukhole sina?”

³⁸Petero nabakalusia, “Mwekalukhanie okhurula mutsimbi, mubaputiswe siamulala khwinywe muliira lia Yesu Kristo kho mutoole okhulekhelwa khwetsimbi ma munyoole esihanwa sio Mwoyo Omutsienukhu okhurula khu Nyasaye.

³⁹Okhuba lisubisio yilio liali khulwe inywe, abaana benywe bosi, abandu bosi abali ehale, nende bosi abo Mwami Nyasaye wefwe alilanga betse khuye.”

⁴⁰Petero yatsitsachil'la okhuyunjia abandu namang'ana kandi amenji naboola, “Mwehonie khubandu abomwisuba lisiamu yili.”

⁴¹Abenji bahuchil'la amang'ana kaake, nibabaputiswa, ne khwitukhu yilio abandu abahela etsielefu tsitaru bameetekha khumukanda kwabasubili.

⁴²Yabo bosi batsitsachil'la okhweka okhurula khubarumwa, nibamenya halala mubuhambani nende okhumekania omukaati nokhusaaya.

⁴³Akamangalimwa nende akokhuchenyia amenji kakholwa okhubir'ra khubarumwa ma siomundu naba noburi obwinji.

⁴⁴Abasubili bosi batsitsachil'la okhuba halala nibakabulana ebindu biabwe halala.

⁴⁵Bakusianga emiandu chiabwe nende ebindu biabwe ma bakabulana amapesa okhulondokhana nende obutakha bwabuli mulala.

⁴⁶Batsitsachil'la okhwakana sielitukhu mu Hekalu, nibaliila halala mutsinyumba tsiabwe nobusangali nende emioyo emisiyikhu,

⁴⁷nibetsoomia Nyasaye ne nibasangal'lwa nabandu bosi. Sielitukhu Omwami yametanga khubo yabo abahonibwanga.