Read lunyore EBIKHOLWA 20 Bible Online

EBIKHOLWA 20 - lunyore bible

EBIKHOLWA 20

¹Olwe indiri yali nehweye, Paulo yalanga abasubili halala, nabatinyilisia. Ma nabasebula, narula natsia Emakedonia.

²Yabir'ra mungongo tsiatsana natinyilisianga abandu namang'ana amenji, ma niyoola Akaya

³owayamenya emiesi chitaru. Olwa yali niyerechekhanga okhutsia Siria, yanyoola mbu Abayahudi bali nibamwerechekhelanga khumabi. Yamala nakhalaka okhukalukhila Makedonia.

⁴Sopatiro omwana wa Puro okhurula Bereya, yahelekhana n'naye halala nende Arisitariko nende Sekundo okhurula Tesalonike, Gayo okhurula Deribe, Timoteo, Tukiko nende Terofimo okhurula Asia.

⁵Yabo bakhwemel'la ma nibakhulinda Troa.

⁶Nefwe olwa khwali nikhumal'le Lisabo liemikaati echiralimwo amamela, khwanina emeeli okhurula Filipi ma nikhubanyoola Troa inyuma wamatukhu karano. Khwamenyayo lihonga elala.

⁷Litukhu liomulwenjeso khubwile khwebunjikha halala khulwokhumekania omukaati. Paulo yakambila abandu okhwola mubutukhu hakari sichila yali naloosisie okhurulayo litukhu elialondakhwo.

⁸Etsitaya tsinyinji tsiali mukorofa omwa khwali nikhwebunjikhile.

⁹Omusiani mulala owalangwa Eutuko yali niyekhaye mwitilisa olwa Paulo yali nakambanga. Yachiaka okhurengetsa hati hati ma olweinyuma tsindoolo nitsimuhila, niyakulukha okhurula khukorofa yakhataru nakwa hasi. Nachingwa okhurula hasi namal'le okhufwa.

¹⁰Paulo yekha hasi namukwakhwo, namufumbel'la, naboola, “Murafwa emioyo tawe okhuba asili omulamu.”

¹¹Ma naniina khandi mukorofa, namekania omukaati, nalia. Natsitsachil'la okhul'loma n'nabo oluhono okhwola olweisi yachiaka okhulaba ma narula.

¹²Abandu nibabukula omusiani uyo nibamuhila ingo wabwe nali omulamu, nibalemibwa emioyo muno.

¹³Ifwe khwemela okhutsia mumeeli ma nikhutsia Asosi hakhwali khubukul'le Paulo. Yali nakhulachile khukhole mbwo, okhuba yali natsiye yo khubilenje.

¹⁴Yakhwakan'na Asosi ma nikhumuninia mumeeli ma nikhutsia Mitulene.

¹⁵Khwarulayo nikhwambukha nikhwola Kio litukhu elialondakhwo. Litukhu liakhabili nikhwola Samo, ne elialondakhwo nikhwola Mileto.

¹⁶Paulo yali nachoomele okhutsitsachil'la noluchendo okhubira Efeso kho abule okhusisil'la Asia. Yali natetekhananga yoole Yerusalemu nikanyalikha khwitukhu lia Pentekoste.

¹⁷Paulo yaruma abandu okhurula Mileto batsie Efeso okhulanga abakhulundu belikanisa bakane n'naye.

¹⁸Olwa boola khuye, yababool'la, “Inywe mumanyile singa ndamenya n'nenywe tsinyinga tsianje tsiosi okhurula litukhu liokhuranga eliandoola Asia.

¹⁹Mumanyile singa ndarumikhila Omwami nokhwechieyia khwosi, nende amasika, ma nende okhutemwa khwosi okhwetsa khulwo khukonekha khwa Bayahudi.

²⁰Mumanyile mbu sindachweya okhumukambila habulafu nende mutsinyumba tsienywe, nimwibaal'langa ling'ana liosi elikwan'ne.

²¹Ndali okhuribul'la bosi — Abayahudi nende Abetsimbia tsindi bekalukhanie okhurula khutsimbi tsiabwe nibetsa khu Nyasaye ma basubile Omwami wefwe Yesu Kristo.

²²Ne luno, nzitsanga Yerusalemu ninyemeleywe nende Omwoyo Omutsienukhu sila okhumanya aka nakangwile yo.

²³Eliamanyile lili mbu Omwoyo Omutsienukhu yaribul'langa musielitookho mbu okhubohwa nende okhukhupa esibi nibio ebinindanga.

²⁴Nebutswa simbalanga obulamu bwanje okhuba esindu siobukusi obutinyu khwise tawe; nebutswa nyenyanga okhuhesia oburume bwanje ma male omulimo kwo Mwami Yesu yambelesia okhukhola, okwokhuribula Amang'ana Amalahi akesirenda sia Nyasaye.

²⁵“Ndabotokhana mwinywe mwesi, ningambanga Obwami bwa Nyasaye. Ne luno manyile abulaho kata mul'la khwinywe owakhandolekhwo khandi.

²⁶Khulwe yako muribul'langa khandi leelo: omundu wosi khwinywe niyakhakora, ise sindi nesikha tawe.

²⁷Okhuba sindasisil'la okhumubuul'la inywe kosi aka Nyasaye alalilanga tawe.

²⁸Kho mwelinde abene nende esiayo siosi esio Mwoyo Omutsienukhu yamukhola okhuba abahenji khusio. Mube abayi abelikanisa lia Nyasaye eliayetool'la omwene namatsahi ko Mwanawe.

²⁹Manyile mbu nimal'le okhurula, ebibwe biakhenjile mwinywe ne sibiakhabeelel'le esiayo tawe.

³⁰Kata khandi mwinywe bene bakharulemwo abandu abakhaboole obubehi khulwo khuberula abasiabwe mbu babalonde.

³¹Khulwe yako mwelinde, nimwitsul'langa mbu khulwemihika chitaru, obutukhu nom'basu, sindatoha okhwibaal'la siomundu khwinywe namasika tawe.

³²“Ne luno muretsanga mubulindi bwa Nyasaye nende oburume bweling'ana liesirenda sisie, elinyala okhumwombokha inywe nende okhumuhelesia tsikhabi etsia Nyasaye ali n'natsio khulwabandu baabe bosi.

³³Ise sindakhayilwakhwo efetsa yomundu nohomba etsahabu, nohomba tsingubo tsiomundu tawe.

³⁴Inywe abene mwamanya obwa ndakhola emilimo nende amakhono kanje omwene khulwobuha bwanje nende abasianje.

³⁵Ndamumanyia mbu mumang'ana kosi mbu mukhukhola emilimo munjila iyi okhwola khukhonyel'le abatekhele, nikhwitsul'langa amang'ana ko Mwami Yesu mwene yaboola, ‘Neikhabi okhuhana okhuyomba okhuhebwa.’ ”

³⁶Olwa Paulo yali namal'le okhuboola yaka, yasikama halala n'nabo bosi, ma nasaaya.

³⁷Bosi bali nibalakayanga, nibamufumbel'la nibamutsunzuna ma nibamusebula.

³⁸Babelela okhusila sichila yali nabooye mbu sibakhamulolekhwo khandi tawe. Nibamuhelekha nibamwosia mumeeli.