Read lunyore EBIKHOLWA 21 Bible Online

EBIKHOLWA 21 - lunyore bible

EBIKHOLWA 21

¹Olwa khwali nikhusebulan'ne n'nabo, khwanina m'meeli nikhutsia silunji okhwola Kosi. Litukhu elialondakhwo khwola Rodo ne okhurulayo nikhutsia Patara.

²Ebwene iyo khwanyoolayo emeeli eyali netsitsanga Foinike, nikhuninamwo nikhuchiaka oluchendo.

³Olwa khwola habundu ahakhwalol'la Kupuro, khwamala nikhubir'ra khumukhono mukhasi nikhutsia Siria. Khwekha mwitookho lia Tiro ahemeeli yali okhwisia emisiko.

⁴Khwanyoolayo abasubili, nikhumenya n'nabo khulwelihonga elala. Abasubili yabo babool'la Paulo mutsingufu tsio Mwoyo mbu alekhe okhutsia Yerusalemu.

⁵Nebutswa olwa amatukhu kefwe kahwa khwarula yo. Ne bosi, halala nabakhasi nende abaana, bakhuhelekha okhwola esioba welitookho. Olwa khwola khuluchinga lweinyanza, fwesi khwasikama nikhusaaya.

⁶Ma nikhusebulana, ifwe nikhuniina m'meeli, nabo nibakalukha ingo.

⁷Khwatsitsachil'la noluchendo lwefwe okhurula Tiro nikhwola Putolemai, nikhusiesia abasubili basiefwe ma nikhubaho litukhu elala.

⁸Litukhu elialondakhwo khwarula nikhutsia Kaisaria, nikhwinjila munyumba yomukambi Filipu, owali mulala khubane nabataru abelwa okhuba abakhonyel'li mu Yerusalemu.

⁹Yali nabakhaana bane abali nibasili okhulerwa, abaroobanga.

¹⁰Olwa khwali nikhumal'leho amatukhu akahel'le, omuroobi mulala owalangwa Akapo yoola narula Ebuyahudi.

¹¹Yetsa khwifwe, nabukula olukhoba lwa Paulo niyeboha ebilenjebie namakhono, naboola; “Omwoyo Omutsienukhu aboolanga mbu, Abayahudi abali Yerusalemu nababohe mwene lukhoba luno singa mbu ma nabamure mumakhono kabandu Betsinzibulo tsindi.”

¹²Olwa khwahul'la mbwo ifwe nende abandu bandi abaliho khwahomba Paulo alekhe okhutsia Yerusalemu.

¹³Nebutswa naye nakalusia, “Mukholanga sina? Busina muchilanga ninyakhana mumwoyo khulwokhulakaya khwenywe? Sinderechekhele butswa okhubohwa khwonyene tawe, nebutswa kata okhufwa mu Yerusalemu khulweliira lio Mwami Yesu.”

¹⁴Olwa yakhukhumbula okhumusukhania amakani, khwamulekha nikhuboola, “Obulalilo bwo Mwami bukholwe.”

¹⁵Nikhumal'leyo amatukhu akahel'le nikhuboha ebindu biefwe nikhutsitsachil'la noluchendo lwokhutsia Yerusalemu.

¹⁶Abalala khubechi okhurula Kaisaria batsia n'nefwe, nibakhuhila munyumba yo Munasoni we Kupuro owa khwali nikhutsitsanga okhumenya n'naye khulwe tsinyinga tsindititi. Munasoni yali omusubili wemihika eminji.

¹⁷Olwa khwola Yerusalemu abasubili bakhwinjisia nobusangali.

¹⁸Litukhu elialondakhwo Paulo yatsia halala n'nefwe okhulola Yakobo, ne abakhulundu belikanisa bosi baliho.

¹⁹Paulo yabasiesia ma nabamanyia kosi aka Nyasaye yali nakholeye Abetsimbia tsindi okhubir'ra mubukholi bubwe.

²⁰Nabo olwa bakahul'la betsoomia Nyasaye ma nibabool'la Paulo, “Awefwe Paulo, onyala okhulola etsielefu tsia Bayahudi abali abasubili, ma luno batilanga Amalako ka Musa buuli.

²¹Babool'lwa mbu ibe wibaal'langa Abayahudi bosi abamenyele nabetsimbia tsindi okhulekha Amalako ka Musa, nobabool'la balekhe okhuseba abaana babwe nohomba okhulonda ifwo yabwe eya Bayahudi.

²²Luno nakabe mbwena? Kali kololi nabahul'le mbu witsile hano.

²³Okhole singa obwa khuboolanga. Khuli hano nende abasatsa bane abamal'le okhwehwaba.

²⁴Tsia n'nabo, winjile n'nabo m'mulukha kwokhwetsienula, obarunjile emirungo echienyekhanga ma babekwe emirwe chiabwe. Munjila iyo abandu bosi bakhamanya mbu obwatooto sibuli mukosi akabooywe khuibe tawe, nebutswa ibe omwene ochendanga habwene nofumila Amalako ka Musa.

²⁵Nebutswa aka Betsimbia tsindi abasubila khwabahandichiye ebarwa nikhubabool'langa mbu khukhalachile barakhaliakhwo ebiokhulia biemisango chiemisambwa, nende amalasile ma nende ebimichilwe nende okhukhola obuheyi tawe.”

²⁶Paulo yamala nabukula abandu tsana, ne litukhu elialondakhwo nalomba omulukha kwokhwetsienula halala n'nabo. Ma niyenjila mu Hekalu naribula amatukhu kokhwetsienula kahesibwe khandi emisango echiakhakhol'lwe khulwa siamulala khubo.

²⁷Olwa matukhu kane nakataru kali nikenya okhuhwa, Abayahudi abarula Asia, balola Paulo mu Hekalu. Bamala nibatsuuba omukanda kwosi ma nibamufumila,

²⁸nibayoka: “Inywe abandu ba Isiraeli, mukhukhonye. Uno niye omundu owibaal'langa abandu siahabundu amang'ana akafukulanga abandu ba Isiraeli, nikafukula Amalako ka Musa nende habundu hatsienukhu. Ne luno uler're abandu betsinzibulo tsindi mu Hekalu, nafwabia hatsienukhu hano.”

²⁹Esiachila nibaboola mbwo siali mbu bali nibalutsi Terofimo owe Efeso nali halala nende Paulo mwitookho, nibapaala mbu Paulo yali namwinjisisie mu Hekalu.

³⁰Indiri yalanda mwitookho liosi, abandu nibetsa okhurula tsimbeka tsiosi, nibafumila Paulo, nibamuhinia mu Hekalu, ma emiliango chie Hekalu nichikalwa matetekhana.

³¹Kho olwa benya okhwira Paulo, amang'ana koola khumukhongo wamahe ka Roma mbu Yerusalemu yosi yali nende indiri.

³²Yamala nabukula abasikari nende etsisawoni, nibatsia malibiri khumukanda. Olwabandu balola nali nende abasikari nibalekha okhukhupaka Paulo.

³³Kho omukhongo wamahe natsia khu Paulo, namufumila, nalaka mbu Paulo abohwe neminyol'lo chibili. Ma nareeba, “Omundu uyu niwina, khandi akhol'le sina?”

³⁴Abandu balala mumukanda bayoka nibaboola ling'ana elala, ne abandi nibaboola elindi lukano. Liyoka liali elinji ma omukhongo wamahe siyamanyilisia esiali nisiekhol'le tawe. Ma nalaka abandu baabe bahile Paulo mulukaka lwabasikari.

³⁵Olwa Paulo yoola khusininilo, abasikari nibamuchinga khulwe liyoka liabandu.

³⁶Okhuba omukanda omukhongo kwamulonda nibakhupa liyoka nibaboola, “Yerwe.”

³⁷Olwa bali nibamwinjisianga mulukaka lwabasikari, Paulo yareeba omukhongo wamahe naboola, “Wakhayanza khubool'lekhwo ling'ana?” Omukhongo wamahe uyo nakalusia, “Wamanya Oluyunani?

³⁸Ibe sioli niwe Omumisiri owachema indiri mumatukhu kahweye, niwemel'la abandu abasaatsa etsielefu tsine abali aberi okhutsia musitsiimi?”

³⁹Paulo nakalusia, “Ise ndi Omuyahudi, omwibule wa Tariso mu Kilikia, ndi omundu welitookho likali. Yanza umbuchilil'le n'nome nabandu yaba.”

⁴⁰Omukhongo wamahe uyo namuhuchilil'la. Paulo nasinjila khusininilo, nasimila abandu omukhono ne olwa babuna, nachiaka okhul'loma n'nabo mu Luheburania, naboola: