Read lunyore EBIKHOLWA 22 Bible Online

EBIKHOLWA 22 - lunyore bible

EBIKHOLWA 22

¹“Abaana befwe nende abapapa, muhulile amang'ana kanje akanderanga imbeli wenywe luno.”

²Olwa bahul'la nal'lomanga n'nabo mu Luheburania, basiling'ana tsitsits'tsi. Ma Paulo natsitsachil'la okhuboola,

³“Ise ndi Omuyahudi, owebul'lwa Tariso litookho elili mu Kilikia. Nebutswa ndakhul'la mwitookho lia Yerusalemu lino hasi wobwibaali bwa Gamalieli. Ndechibwa habwene Amalako kabakuka befwe ma nindehana khu Nyasaye singa inywe muli leelo.

⁴Ise ndakhupianga esibi kata okhubera yabo abalondanga injila iyi. Ndafumila abasatsa nende abakhasi nimbara mubuhambe.

⁵Omwesaalisi Omukhongo nende abomuse kwabakhulundu bosi banyala okhukobokhela ling'ana yilio. Ndanyoola etsibarwa okhurula khubo etsia bahandichila Abayahudi basianje abali Damasiko. Ndatsia Damasiko okhufumila abandu yabo, mbalere Yerusalemu nibabohelwe, kho bahebwe esinyasio.

⁶“Olwa ndali ninjendanga nindi ahembi okhwola Damasiko, ahembi m'basu hakari, nonoho obulafu obukali okhurula mwikulu bwalabia ahatsana nibufumbila.

⁷Ndakwa hasi ne nimbul'la omwoyo nikumbool'la, ‘Saulo, Saulo busina ukhupianga esibi?’

⁸Nase nimboola, ‘Niwe wina Omwami?’ Naye niyangalusia, ‘Nise Yesu wa Nasareti owokhupianga esibi.’

⁹Aba ndali n'nabo balola obulafu nebutswa sibahul'la omwoyo okwe uyo owabool'lananga n'nase tawe.

¹⁰Ndamala nireba, ‘Khole sina Omwami?’ Ne Omwami niyambool'la ‘Bukha otsie Damasiko, ebwene yiyo nobool'lwe kosi akolachilwe okhukhola.’

¹¹Ndali niralolanga esindu khulwobulafu obukali yibwo, ma abasianje nibandiila omukhono nibanyemel'la okhwola Damasiko.

¹²“Mwitookho yimwo yalimwo omundu owalangwa Anania, omundu owaria Nyasaye khandi olondanga Amalako ma owahebwa oluyali nende Abayahudi abamenyanga Damasiko.

¹³Yetsa okhundola, nasinjila ahembi n'nase, naboola; ‘Awefwe Saulo, Ohenge.’ Ne esaa yene iyo nindola, ma nimuhenga.

¹⁴Ma Anania niyambool'la, ‘Nyasaye wabakuka befwe ukhwel'le ibe omanye okhulalila khukhwe nende okhulola omurumikhiliwe omulunji, ma khandi okhumuhulila omwene nal'lomanga.

¹⁵Okhuba wakhabe omukobokheliwe khubandu bosi khumang'ana aka walola nende okhuhul'la.

¹⁶Ne luno, olindanga sina? Sinjila, obaputiswe, wosibwe tsimbi tsitsio khulwokhulanga khuliira lilie.’

¹⁷“Ndakalukha Yerusalemu, ne olwa ndali nisaayanga mu Hekalu, ndalola libisulo.

¹⁸Ndalola Omwami niyambool'langa ‘Weyanguyie, orule Yerusalemu bwangu okhuba abandu behano sinabahuchil'le oburibuli bubwo khwise tawe’

¹⁹Nase nimukalusia; ‘Omwami, abene bamanya mbu nise owatsitsanga mutsisinakoki nifumila nende okhukhupaka yabo abali nibasubiye mwibe.

²⁰Ne olwa omukobokheliwo Stefano yerwa, ise omwene ndaliho nimbuchil'la yerwe ne nininda tsingubo etsie yabo abali nibamwiranga.’

²¹Ne Omwami niyambool'la, ‘Tsia, khurumanga ehale khu Betsinzibulo tsindi.’ ”

²²Abandu bahulila Paulo okhwola khwing'ana yili, ma nibachinga emioyo nibaboola, “Muhinie musibala omundu uyu. Omundu weimbila iyi siakwan'ne okhuba mwoyo tawe.”

²³Bahanzukha nibafuuba tsingubo tsiabwe, niboha amaloba ikulu.

²⁴Omukhongo wamahe nalaka mbu Paulo alerwe mulukaka lwabasikari, ma nababool'la bamutiabe nolukhoba khe amanye esichil'le Abayahudi nibamukhupila liyoka.

²⁵Nebutswa olwa bali nibamubohele khe bamukhupe, Paulo yareeba omukhongo owali nasinjiye sibeka, “Kali kololi khwinywe okhukhupaka omundu Omuroma esiina nisisili okhumufwila?”

²⁶Olwomukhongo uyo yahul'la mbwo, yatsia khumukhongo wamahe namubool'la “Wenyanga okhukhola sina? Omundu uyu Nomuroma!”

²⁷Ma omukhongo wamahe natsia khu Paulo namubool'la, “Mbool'la, ibe oli Omuroma?” Paulo namukalusia, “Yee.”

²⁸Omukhongo wamahe naboola, “Ise nase ndakholwa okhuba Omuroma khulwo okhurunga omurungo omukali.” Paulo naboola, “Ne nase ndi Omuroma khulwo obwibule.”

²⁹Abandu abali nibenya okhwitsotsa Paulo banyookhila matetekhana. Kata omukhongo wamahe omwene naria olwa yamanya mbu Paulo nomwibule wa Roma ne yali namubohele.

³⁰Litukhu elialondakhwo omukhongo wamahe yenya okhumanya akatooto Akabayahudi bali nibasitachilanga Paulo. Ma nabohol'la Paulo eminyol'lo khumakhono, nalaka abesaalisi abakhongo nende abesiina bosi bebunjikhe halala. Ma nalera Paulo namusinjisia imbeli womuse.