Read lunyore EBIKHOLWA 23 Bible Online

EBIKHOLWA 23 - lunyore bible

EBIKHOLWA 23

¹Paulo yarangala tsimonitsie khubandu bomuse ma naboola, “Abaana befwe, Ise ndachendanga imbeli wa Nyasaye nende Omwoyo omulahi okhwola leelo”.

²Omwesaalisi Omukhongo Anania yalaka abali nibasinjiye ahembi nende Paulo bamwale oluhi khumunwa.

³Paulo namubool'la, “Nyasaye mwene nakhukhupe oluhi ibe ofwana nende lisisi eliabakhwa lilongo lilafu. Wakhekhala mbwena okhukhalachila esiina singa amalako kali nebutswa niwe ofunakanga amalako tsana khulwokhulaka nzalwe oluhi.”

⁴Abandu abali nibasinjiyeho nibabool'la Paulo, “Onyekanga Omwesaalisi Omukhongo wa Nyasaye?”

⁵Paulo nabakalusia, “Abaana befwe, simanyilenge no Mwesaalisi Omukhongo tawe. Okhuba Amahandiko kaboolanga: ‘Oraboola obubi khumukhongo wabandu benywe tawe.’ ”

⁶Olwa Paulo yamanya mbu esituma silala sialimwo Abasadukayi nesindi Abafarisayi yahanzuukha musiina naboola, “Abaana befwe ise ndi Omufarisayi Omwana wa Bafarisayi. Khalachilwanga esiina khulwokhunaya khwokhusimukukha khwabafu.”

⁷Nyinga yali nabooye mbwo ne Abafarisayi nende Abasadukayi nibachiaka okhuhingana, ma omukanda nikwabukhana.

⁸Okhuba Abasadukayi baboolanga okhusimukukha khubulaho, khandi kata abamalaika nohomba emioyo sichiliho tawe. Nebutswa Abafarisayi basubilanga biosi bitaru.

⁹Liyoka liamala niliba elinji ma abalala khubebaali ba Malako abomukanda kwa Bafarisayi basinjila nibasolana muno, nibaboola, “Sikhulutsi obubi bwosi khumundu uyu tawe. Haundi Omwoyo nohomba om'malaika wabool'lana n'naye.”

¹⁰Obuhingani bwametekha okhusila, ma omukhongo wamahe naba noburi mbu Paulo yakhatonyanibwa mubitonye. Yamala nalaka abasikari baabe benjile mumukanda yikwo bahiniemwo Paulo, bamuhile mulukaka lwabasikari.

¹¹Mubutukhu yibwo Omwami yasinjila ahembi nende Paulo namubool'la “Oraria tawe. Umal'le okhuribula amang'ana kanje mu Yerusalemu, khandi kakhuhel'le okholembwo Eburoma.”

¹²Olwa bwasia, Abayahudi bebunjikha ma nibalomba obuloosie. Behwaba nibaboola, “Sinakhuliekhwo esindu nohomba okhunywa okhwola olwa nakhube nikhwir're Paulo.”

¹³Abehwaba bali abandu okhuyomba amakhumi kane.

¹⁴Ma nibatsia khubesaalisi abakhongo nende abakhulundu nibaboola, “Ifwe khwehwabile mbu sinakhutsanzame khwo esiokhulia nikhusili okhwira Paulo tawe.

¹⁵Luno inywe nende abesiina, murume oburume khumukhongo wamahe alere Paulo khwinywe. Mwekaatie mbu murunanga okhumanyilisia amang'ana kaake bulahi. Ma khwerechekhe okhumwira nasili okhwola hano.”

¹⁶Nebutswa omwihwa wa Paulo yahul'la ako khwekonekha khwabwe yikhwo; ma natsia mulukaka nabool'la Paulo.

¹⁷Paulo yalanga mulala khubemeli yetse ma namubool'la, “Ohile omusiani uno khumukhongo wamahe, ali nende ling'ana elia yenya okhumubool'la.”

¹⁸Omwemeli uyo namubukula, namuhila khumukhongo wamahe naboola, “Omubohe Paulo yananjile ma niyareeba ndere omusiani uno khu yibe sichila ali neling'ana liayenya okhukhubool'la.”

¹⁹Omukhongo wamahe namutila omukhono, namuhila sibeka namureeba masilisi, “Neling'ana sina eliawenya okhumbool'la?”

²⁰Naye namubool'la, “Abayahudi bahuchilisanisie okhukhureeba ohile Paulo musiina mukamba, khulwokhwekaatia mbu esiina sirunanga okhurunilisia akatooto khuye.

²¹Orakhahuchil'la amang'ana kabwe tawe sichila abandu okhuyomba amakhumi kane bamwekonekheye. Behwabile mbu sinabaliekhwo nohomba okhunywa okhwola olwa nababe nibamwir're. Luno berechekhele balindil'langa butswa obukhalachi bubwo.”

²²Omukhongo wamahe naboola, “Orakhabool'lakhwo omundu mbu umbooleye amang'ana yaka tawe.” Ma namusebula atsie.

²³Ma omukhongo wamahe nalanga mulala khubemeli baabe, namubool'la, “Rechekha abasikari etsimia tsibili abokhutsia Kaisaria, nende abasikari abetsisululi amakhumi kane nakataru ma nende abamafumo etsimia tsibili ma mwerechekhe okhurula etsisaa tsitaru etsiobutukhu.

²⁴Murechekhe etsisululi khulwa Paulo okhuchendelakhwo ma mumuhile khumuruchi Felike.”

²⁵Ma omukhongo wamahe nahandika ebarwa singa mbu:

²⁶“Ise Kilaudia Lusia mandichilanga omuruchi Felike; Emilembe.

²⁷Abayahudi bafumila omundu uno, ma bali nibenya okhumwira. Ndahul'la mbu nomwibule wa Roma ma ninzia halala nende abasikari ma nimuhonia.

²⁸Ndenya manye esia bamusitachilanga ma nimuhila musiina.

²⁹Ndanyoola mbu asili okhukhola khwo esindu siosi esiakhachila yerwe nohomba okhurebwa mubuhambe tawe. Aka bamusitachilanga kalondokhananga nende amarebo khukamalako kabwe abene.

³⁰Ne olwa ndamanyibwa mbu obuloosie buliho obwokhumwira, ne nimuruma khu ibe bwangu. Mbooleye abamuyaalanga mbu balere aka bamusitachilanga imbeliwo.”

³¹Ma abasikari yabo nibabukula Paulo singa obwa balakwa, nibamuhila obutukhu yibwo nibamwosia Antipatiri.

³²Litukhu elialondakhwo abasikari abatsia nebilenje nibakalukha mulukaka ne nibalekha abasikari abali netsisululi batsitsachil'le noluchendo halala nende Paulo.

³³Olwa boola Kaisaria bahelesie omuruchi ebarwa tsana ma nibara Paulo hasi wobulindi bubwe.

³⁴Olwa Felike yasoma ebarwa tsana yabareeba Paulo nomundu wasibala sina? Olwa yabool'lwa mbu yarula musibala sia Kilikia,

³⁵naboola, “Nambul'le omusekwo olwe yabo abakhuyaalanga nababe nibetsele.” Ma nalaka mbu Paulo abikhwe hasi wobulindi munyumba yomuse kwa Herode.