Read lunyore EBIKHOLWA 24 Bible Online

EBIKHOLWA 24 - lunyore bible

EBIKHOLWA 24

¹Inyuma wamatukhu karano, Omwesaalisi Omukhongo owalangwa Anania yetsa Kaisaria halala nende abakhulundu bandi ma nende omulonyi wamalako owalangwa Teritulo. Batsia khumuruchi uyo nibamwinoosia obusitaki bwabwe khu Paulo.

²Paulo yalangwa, Teritulo nachiaka obuyaali bwe singa mbu: “Owoluyali Felike, obwemelibwo obulahi bwaleera emilembe eminji ne amang'ana amabi kakasibwanga muluyia lwefwe luno.

³Khwahuchil'la akene yaka habundu hosi ma khandi hali khasotso khuboolanga embwo khuibe.

⁴Sinyenya okhubukula obweyangu bubwo obwinji tawe, nebutswa khusaayanga ohul'le amang'ana kefwe matututu.

⁵Khunyooye mbu omundu uyu noweinzoka, omuchemelesi mu Bayahudi mubibala biosi. Khandi nomwemeli omukhongo womukanda okwa Banasareti.

⁶Khandi yatema okhufwabia Ehekalu ma ifwe nikhumufumila. [Khwenya khumukhalachile okhulondokhana nende Amalako kefwe.

⁷Nebutswa omukhongo wamahe Lusia yetsa namuhinia mumakhono kefwe netsingufu tsingali.

⁸Ma nalaka mbu abamuyaalanga betse imbeli wo.][7] Ibe nomureeba omwene, onyala okhunyoola amang'ana kosi aka khumusitachilanga.”

⁹Abayahudi nabo bahuchilisania nende amang'ana yako nibaboola mbu kosi nimbwo kali.

¹⁰Omuruchi yamala nasima Paulo naye al'lome, ma Paulo naboola, “Manyile mbu wakhaba omukhalachi wesiina muuyia luno khulwemihika eminji, ma ndi nende obusangali okhukalusia obusitaki yibu.

¹¹Onyala okhumanya mbu amatukhu likhumi nende kabili kasili okhubira okhurula olwa ndatsia okhwekayakaya Yerusalemu.

¹²Abayahudi sibainyoola nimangalananga nende omundu wosi mu Hekalu tawe, kata sibainyoola ninzuubanga omukanda mutsisinakoki nohomba mwitookho tawe.

¹³Kata sibanyala okhumanyia amang'ana akabasitachilanga yaka tawe.

¹⁴Aka mbuchil'langa imbeli wo ni yaka: Ise ndekayakayanga Nyasaye wabakuka befwe, nisubila injila eya baboolanga neyobubehi. Khandi subilanga kosi akahandikwa mu Malako ka Musa nende mubitapu biabaroobi.

¹⁵Ise ndi nende okhunaya khu Nyasaye, okhwe yaba nabo khandi bali n'nakhwo mbu abandu bosi, abalunji nende ababi, bakhasimukukhe.

¹⁶Khulwe yako ndenasianga mbu mbe nende omwoyo omulahi okurali nesikha khu Nyasaye nohomba khubandu.

¹⁷“Inyuma wokhumenya ehale nende Yerusalemu khulwemihika eminji, ndakalukhile okhuhil'la abandu befwe ebihanwa nende okhuhana omusango.

¹⁸Olwa ndali nikholanga akene yaka nilwo olwa banyoola mu Hekalu nimal'le okhwetsienula. Omukanda sikwali khwo ho nohomba esikhu tawe.

¹⁹Nebutswa baliho Abayahudi bandi okhurula Asia. Yabo nibo abakwanile okhuba hano imbeliwo nibahaananga obukobokheli bwabwe nikaba bali neling'ana khwise.

²⁰Nohomba balekhe abandu abali hano yaba baboole obubi obwabalola khwise olwa ndasinjila imbeli womuse kwabwe omukhongo,

²¹nikarali amang'ana yako aka ndaboola imbeli wabwe, ‘Mukhalachilanga luno khulwo khusubila mbu abafu bakhasimukusibwe!’ ”

²²Ma Felike, owali niyamanya ake Injila iyo bulahi niyekala omuse yikwo. Nababool'la, “Olwa Lusia omukhongo wamahe yakhetse yino nilwo olwa ndakhakhalache omuse kwenywe yiku.”

²³Ma nalaka omukhongo uyo are Paulo mubuhambe, nebutswa abe nobalakhuule obuhela, khandi abalina be barakaywa okhumuler'ra ebia yakhenya tawe.

²⁴Inyuma wamatukhu matu, Felike yetsa nomukhasiwe Dorosila owali omukoko Muyahudi. Nalanga Paulo, amuhul'le nal'loma khwing'ana liokhusubila Yesu Kristo.

²⁵Nebutswa olwa Paulo yachiaka okhul'loma khukobulunji, okhwekaya nende esiina esiitsanga, Felike yaria okhusila ma naboola, “Onyala okhutsia luno. Ndakhakhulange khandi olwa ndakhabe nende obweyangu.”

²⁶Khandi yanayanga mbu Paulo yakhamuha ebihetso. Khulwe esifune yisi yalanga Paulo khasotso natwaka n'naye.

²⁷Inyuma wemihika chibili Porikio Festo yabukula obweyangu bwa Felike singa omuruchi woluyia yilwo. Ne sichila mbu Felike yaruna okhuyanzisia Abayahudi, yalekha Paulo mubuhambe.