Read lunyore EBIKHOLWA 25 Bible Online

EBIKHOLWA 25 - lunyore bible

EBIKHOLWA 25

¹Amatukhu kataru nikahweye okhurula Festo niyenjila musibala yisio, yarula Kaisaria natsia Yerusalemu.

²Abesaalisi abakhongo nende abemeli ba Bayahudi bamumanyia amang'ana kobusitaki bwa Paulo. Bahomba Festo

³ababeele esirenda alere Paulo Yerusalemu, okhuba bali nibaloosisie okhumwekonekha mbu bamwir're khunjila.

⁴Nebutswa Festo yabakalusia, “Paulo alatsitsachil'la okhuba mubuhambe Kaisaria, ne ise omwene nambe ninzitsangayo ahembi yaha.

⁵Rume abemeli benywe khutsieyo n'nabo ma bamuyaale nikali wakhola amabi.”

⁶Festo yamala amatukhu kandi munane nohomba likhumi ma narula natsia Kaisaria. Litukhu elialondakhwo yekhala khundebe yesiina ma nalaka mbu Paulo alerwe.

⁷Olwa Paulo yetsa ne Abayahudi abarula Yerusalemu basinjila ahembi khuye nibamusitaka nende amang'ana amenji amasiro aka bakhumbulwa okhwinoosia es'sina siako.

⁸Ne Paulo naye yabakalusia naboola, “Ise sindakholakhwo libi liosi khu Malako ka Bayahudi nohomba khu Hekalu nohomba kata khu Kaisari tawe.”

⁹Nebutswa sichila Festo yenya okhuhuchilil'lwa nende Abayahudi, yareba Paulo, “Wakhahuchil'la okhutsia Yerusalemu okhalachilwe esiinayo imbeli wanje khumang'ana yaka?”

¹⁰Paulo nakalusia, “Ise sinjiye imbeli wesiina sia Kaisari, ne habwene hano niho ahangwanile okhukhalachilwa. Singa obwe ibe omwene omanyile bulahi, sindakhol'lakhwo Abayahudi obubi bwosi tawe.

¹¹Nimba nifunachile lilako nohomba nikhol'le libi elikwan'ne khalachilwe okhufwa sindakhareba mbule okhuhebwa esinyasio yisio tawe. Nebutswa obwatooto niburali mumang'ana akabandu yaba bahiinisie, sialiho onyala okhura mumakhono kabwe tawe. Rumanga ling'ana khu Kaisari Omuruchi wa Roma yakhalachile.”

¹²Kho nyinga Festo yali nabool'lane nende abachetsiyi baabe, yakalusia naboola, “Orun'ne Kaisari akhukhalachile, kho olatsia khu Kaisari.”

¹³Inyuma wamatukhu matu, Omwami Agiripa nende Berinike batsia Kaisaria khulwa okhuhelesia Festo oluyali nende okhumwinjisia.

¹⁴Olwa bali mbekhayeyo amatukhu amenji, Festo yamanyia omuruchi amang'ana ka Paulo, namubool'la, “Aliho omundu mulala hano owa Felike yalekha mubuhambe.

¹⁵Olwa ndatsia Yerusalemu, abesaalisi abakhongo nende abakhulundu ba Bayahudi bamuyaala ma nibareba mukhalachile.

¹⁶Nebutswa ndabakalusia mbu sieli ifwo ya Baroma okhuhinia omundu ositachilwe khulwamabi nasili okhwakana nende abamusitakanga kol'lani, ma abe nende obweyangu bwokhukalusia amang'ana akasitachiywe tawe.

¹⁷Olwa betsa hano sindasisil'la tawe, nebutswa ndekhala khusiina litukhu elialondakhwo ma nindaka mbu omundu uyo alerwe.

¹⁸Abamuyaalanga basinjila, nebutswa sibamuyaala khwo nende amabi aka ndapaalanga nabamusitake n'nako tawe.

¹⁹Aka bamusitachila namahangasi nalebe khukokhwekayakaya khwabwe nende khukomundu olangungwa Yesu owafwa nebutswa Paulo aboolanga mbu ali mwoyo.

²⁰Sindamanya elianyala okhukalusia khukene yaka tawe ma nireba Paulo nikaba yakhenya okhutsia Yerusalemu ayal'lweyo.

²¹Nebutswa Paulo yenya alinde Omuruchi omukhongo amuyale. Ma nindaka mbu arebwe mubuhambe okhwola olwa ndimuruma khu Kaisari.”

²²Agiripa nabool'la Festo, “Ndakhenya okhuhul'la omuse kwomundu uyu ise mwene.” Festo namubool'la, “Nomuhul'le mukamba.”

²³Litukhu elialondakhwo, Agiripa nende Berinike betsa nende eng'oono ingali ma nibenjila habahulil'langa amang'ana, halala nende abemeli ma nende abakhongo belitookho. Festo yalaka mbu Paulo alerwe.

²⁴Ma Festo naboola, “Omuruchi Agiripa, nende abandu bosi abali hano halala n'nefwe, mulole omundu uyu owemikanda chiosi echia Bayahudi ba Yerusalemu nende abehano barebele nibakhupa liyoka nibaboola siakwan'ne okhuba mwoyo tawe.

²⁵Nebutswa ise sindalola niyakhola ling'ana elikwan'ne afwe tawe. Nebutswa sichila omwene yenya Kaisari amuyale, ndachoomia mbu muhile khuye.

²⁶Ne ise sindi nende ling'ana elilunjikhile elianyala okhuhandichila Kaisari khuye tawe. Niko akachil'le nimulera imbeli wenywe, ne okhusila muno imbeliwo Omuruchi Agiripa — kho namal'le okhwitsotswa amang'ana ndakhanyoola elia ndakhahandika.

²⁷Sikafwananga akahabwene khwise okhuruma omubohe sila okhumanya aka bamuyaaliye tawe.”