Read lunyore EBIKHOLWA 26 Bible Online

EBIKHOLWA 26 - lunyore bible

EBIKHOLWA 26

¹Agiripa yabool'la Paulo, “Oli nomunwa okhuboola akaako.” Ma Paulo nanyiila omukhonokwe ma nakalusia mbu:

²“Omuruchi Agiripa, ndolanga ndi nende ikhabi leelo mbu mbeywe okhukalusia imbeliwo khumang'ana kosi aka Bayahudi banzal'langa.

³Okhusila muno sichila ibe umanyile obulahi ifwo nende amang'ana kosi aka Bayahudi. Kho khuhombanga umbulile nokhwesimilisia.

⁴“Abayahudi bosi bamanya obwa menyanga okhurula olwa ndali nisili omwana. Bamanya obwa ndamenya okhurula mukhuchiaka musibala sianje ma nende mu Yerusalemu.

⁵Bayimanya khulwo oluhono olurambi, banyala okhukobokhela nikali bayanzile, mbu okhurula olwokhuranga ndamenyanga singa mulala khubomukanda okwali omutinyu okwa Bafarisayi.

⁶Ne luno sinjiye hano khulwo khuyaalwa khulwo bunayi bwandi n'nabwo mwisubisio elia Nyasaye yasubisia abakuka befwe.

⁷Lisubisio yilio nilio elietsimbia likhumi natsibili etsiabandu befwe banaayanga okhunyoola, olwa bekayakayanga Nyasaye om'basu nende obutukhu. Ni khulwo okhunaya yikhu, Omuruchi, okhuchil'le Abayahudi nibasitaka.

⁸Busina inywe abali hano munyoolanga obutinyu okhusubila mbu Nyasaye asimukusianga abafu?

⁹“Ise mwene ndapaala khubwanje kambel'le khole amang'ana amenji akokhufukula eliira lia Yesu Omunasareti.

¹⁰Niko akandakhola mu Yerusalemu. Ndanyoola obunyali okhurula khubesaalisi abakhongo ma nira abandu ba Nyasaye abenji mububohe. Ne olwa bakhalachilwa okhufwa ndali mulala khu yabo abakobokhela ling'ana yilio.

¹¹Hali khasotso ndabasandia mutsisinakoki, nimbahachia okhunyeka amang'ana aka basubila. Lirima lianje khubo liali likali ma kata ndatsia mumatookho kehale okhubasandia.

¹²“Ne khulwe lichoomo yilio eliachila nirula ninzia Damasiko nindi nende obunyali ma nende amalako kabesaalisi abakhongo.

¹³Omwami, m'basu hakari nindi khunjila, ndalola obulafu obukhongo okhuyomba obweliuba, nibwakha ma nibufumbila nende abakhwali nikhuchendanga n'nabo.

¹⁴Fwesi khwakwa hasi ma ise nimbul'la omwoyo nikumbool'langa mu Luheburania: ‘Saulo, Saulo! Busina ukhupianga esibi? Wesalisianga butswa omwene, singa epunda eratsanga olubasi khutsichuula.’

¹⁵Nase nireba, ‘Niwe wina Omwami?’ Ne Omwami nakalusia, ‘Nise Yesu owokhupianga esibi.

¹⁶Nebutswa buukha osinjile. Khubisukhiye khulwo khukhwela okhuba omurumikhili wanje. Nobe omukobokheli khubandi owamang'ana akolutsi litukhu lino nende yako aka ndakhakhumanyie amatukhu aketsanga.

¹⁷Ndikhuhonia khubandu ba Isiraeli nende abetsimbia tsindi abakhurumanga khwo.

¹⁸Wakhekule tsimoni tsiabwe ma olabahinie musiilima benjile mubulafu, barule mu Bwami bwa Setani betse khu Nyasaye, mbu kho mukhusubila khwabwe mwise balekhelwe tsimbi tsiabwe ma banyoole obweyangu bwabwe mubandu abelwa nende Nyasaye.’

¹⁹“Kho, Omuruchi Agiripa, sindakhola esikala marwi khubusukhi obwarula mwikulu tawe.

²⁰Nikarali ndachiaka okhukambila abandu ba Damasiko, ma aba Yerusalemu nende esibala siosi esie Buyahudi ma nende Abetsimbia tsindi. Ndabatsuuba bekalukhanie bahunzukhe khu Nyasaye ma bamanyie mubikhole biabwe mbu bayekalukhania okhurula mutsimbi.

²¹Ni khulwe esifune yisi esiachila Abayahudi nibandetsumba nindi mu Hekalu, nibatema okhunzira.

²²Nebutswa okhwola leelo ndakhonywa nende Nyasaye ma sinjiye hano okhuhaana obuloli bwanje khubosi, abatu nende abakali. Akamboolanga yaka niko amatelwa akabaroobi nende Musa baboola kakhekholekhe;

²³mbu kamuhel'le Masihi okhusalisibwa, ma abe owokhuranga okhusimukukha okhurula mubafu khe alandie obulafu bwobuhoni khu Bayahudi nende Abetsimbia tsindi.”

²⁴Olwa Paulo yoola yaho mukhukalusia khukhwe, Festo naboola nomwoyo omukali, “Paulo, ibe oli omulalu! — Obusomi bubwo obwinji bukhukholanga okhuba omulalu.”

²⁵Nebutswa Paulo nakalusia, “Sindi omulalu tawe, Omwami Festo. Akamboolanga nakatooto butswa.

²⁶Omuruchi Agiripa umanyile amang'ana yaka akamboolanga n'naye sila oburi. Okhuba manyile amang'ana yaka sikayebisa khuye okhuba sikayekhola mubwebisu tawe.

²⁷Omuruchi Agiripa osubilanga abaroobi? Manyile mbu osubilanga.”

²⁸Agiripa nakalusia Paulo, “Munyinga indututu yino opaalanga okhuukhola Omukristo noho?”

²⁹Paulo nakalusia, “Saayanga Nyasaye mbu khutsinyinga tsindututu nohomba tsirambi ibe nende bosi abambulilanga litukhu lino makano mwaba singa ise ndi, sila eminyol'lo yichi.”

³⁰Ma omuruchi, omukafuna nende Berinike ma nende abali nibekhaye n'nabo nibasinjila,

³¹ma olwa bali nibatsiye sibeka nibabool'lana abene, “Omundu uyu siyakhola esindu esiakhachila akhalachilwe okhufwa nohomba okhubohwa tawe.”

³²Ma Agiripa nabool'la Festo, “Omundu uyu yakhalakhuywe alaba narareba Omuruchi wa Roma okhumukhalachila.”