Read lunyore EBIKHOLWA 27 Bible Online

EBIKHOLWA 27 - lunyore bible

EBIKHOLWA 27

¹Olwa bakhalaka mbu khwambukhe khutsie Italia, bara Paulo nende ababohe bandi mumakhono ka Juliasi owali omukhongo womukanda kwabasikari ba Roma okwalangwa, “Omukanda kwa Kaisari.”

²Khwanina mumeeli ya Aduramutimo eyali neli ahembi okhurula okhutsia khumataala khuluchinga lwa Asia, ma nikhuchiaka oluchendo. Ne Arisitariko, Omumakedonia okhurula Tesalonike, yali halala n'nefwe.

³Litukhu elialondakhwo khwola Sidoni. Juliasi yakhol'la Paulo obulahi, namuhuchil'la okhutsia okhulola abalina baabe, okhuhebwa ebiayali nalemanga.

⁴Khwarulayo nikhutsilil'la noluchendo, nikhutsiila musibafu sia Kupuro sichila omuyeka kwali nikurulanga imbeli wefwe.

⁵Ma nikhwambukha inyanza ya Kilikia nende Pamufulia nikhwola Mura litookho lia Lukia.

⁶Omukhongo yanyoolayo emeeli okhurula Alekisandaria eyali netsitsanga Italia, ma nakhuniniamwo.

⁷Khwachenda kalaha khulwa amatukhu amenji ma nikhwol'la Kinido mukhunyakhana okhukali, sichila omuyeka kwakhusibila. Khwatsitsachil'la imbeli nikhubir'ra musibafu sia Kurete, ahembi nende Salimone ahomuyeka kuraali omwinji.

⁸Khwabir'ra ahembi khuluchinga ma nikhwola habundu halangwanga “Inyambukho indahi,” ahembi nende litookho lia Lasea.

⁹Amatukhu amenji kali nikabir're, ma oluchendo niluba namasiila amenji, ne litukhu liokhuhonga okhulia liali nilibir're. Ma Paulo nabahelesia lichetsiyio lino:

¹⁰“Abasianje, ndolanga oluchendo yilu nalube namasiila amenji nende esiloli, tawe butswa khubindu ebili mumeeli bionyene, nebutswa khandi khubulamu bwefwe.”

¹¹Nebutswa omukhongo yahul'la amang'ana komwemeli wemeeli okhuyomba aka Paulo yaboola.

¹²Khulwa mbu inyambukho siyali indahi okhumenyamwo mumatukhu kobusindu, abenji balola nobulahi okhutsitsachil'la noluchendo, aliitsi boole Foinike khe bamenyeyo amatukhu kobusindu. Foinike neinyambukho yomusibala sia Kurete ehenganga ebukwe iyi ne iyi.

¹³Omuyeka okwarula enandete kwahungutsa kalaha, ma nibakala banyoye ol'lahi ma nibachiaka oluchendo nibalonda ahembi khuluchinga lwa Kurete.

¹⁴Nebutswa inyuma weinyinga indututu omuyeka kweikhumaatsi okwalangwa “Omuyeka kwesinyolu” kwachiaka okhuhungutsa okhurula khusikhala chinga.

¹⁵Omuyeka kwarunda emeeli ne sichila mbu sikhwali abanyala okhuhingana n'nakwo tawe, khwalekha kunuye butswa emeeli.

¹⁶Olwa khwola khusikhala chinga esialangwa Kauda, siakhusingakhwo khumuyeka yikwo hatu, ma olwa khwola emwalo wasio khwanyala okhuboha emeeli kata nikali khwanyakhana okhusila.

¹⁷Bakhwesa emeeli okhwola khuluchinga ma nibachiboha butinyu nende tsimbuno. Baria mbu khase bakhakwa mulutende oluli ahembi nende oluchinga lwa Libia ma nibesia tsinanga nibalekha emeeli enuywe nomuyeka.

¹⁸Ikhumaatsi yatsitsachil'la okhurunda okhusila ma litukhu elialondakhwo nikhuchiaka okhufuuba ebindu munyanza.

¹⁹Ne litukhu liakhataru khwafuuba ebirumikhilo biomumeeli namakhono kefwe abene.

²⁰Khumatukhu amenji sikhwalolakhwo eliuba nohomba tsinyininyini tawe, ne ikhumaatsi netsisaachil'la okhurunda butinyu. Okhunaya khwefwe khwosi okhwe ifwe okhuhona khwahwa.

²¹Inyuma wokhumenya inzala khulwo oluhono, Paulo yasinjila imbeli wabwe ma naboola, “Abasianje, bwakhabeye obulahi kalaba mwahuliye aka ndamubooleye ma khulabula okhuchiaka oluchendo lwokhurula Kurete. Khane sikhunyooye obusalili yibu nende esiloli yisi tawe.

²²Ne luno mubool'langa muleme emioyo! Abulaho kata mulala khwinywe owanotibe, nerali emeeli yonyene niyo eyanekore.

²³Okhuba obutukhu buhweye yibu om'malaika wa Nyasaye owandekayakayanga yandolekheye,

²⁴niyambool'la, ‘Paulo, oraria tawe! Okhwola nosinjile imbeli wa Kaisari. Ne Nyasaye khulwo bulahibwe khuibe uhonisie obulamu bweyabo abamuli n'nabo khuluchendo balekhe okhutiba.’

²⁵Khulwe yako, abasianje, muleme emioyo, okhuba subiye Nyasaye mbu nakabe singa obwambooleywe.

²⁶Nebutswa okhwola nakhufuubwe musichinga nalebe.”

²⁷Obutukhu bwelitukhu lielikhumi nakhane khwali nikhunuyungwa iyi nende iyi munyanza ya Adiria.[8] Mubutukhu hakari abakholi bomumeeli bakanakana mbu khuli ahembi khusibala.

²⁸Besia omukoye okwali nikubohelwe khwo esindu es'siro khulwo khuchela olutungu ma nibanyoola mbu amaatsi kali etsimiita amakhumi kane. Olweinyumakhwo khandi nibachela ne nibanyoola mbu nahembi etsimiita amakhumi kataru.

²⁹Baria mbu khase bakhahanda munyanda ma nibalakhuula ebiralisio bine inyuma wemeeli, nibekomba busie bwangu.

³⁰Abakholi bomumeeli batema okhwilukha balekhe emeeli, besia eliaro m'matsi ma nibekatia mbu batsitsanga okhulakhula ebiralisio imbeli wemeeli.

³¹Nebutswa Paulo yabool'la omukhongo wamahe nende abasikari baabe, “Abakholi bomumeeli yaba nibabula okhuba m'meeli muno simwakhahona tawe.”

³²Ma abasikari nibakhalaka tsimbuno tsieliaro, nibalekha nilihilwa namaatsi.

³³Olwa bwali nibwenya okhusia, Paulo yabahomba bosi balie ebiokhulia, naboola, “Leelo namatukhu likhumi nakane nimuli mumanyakhano ne nimuraliitsanga khwo esindu siosi.

³⁴Khulwe yako muhombanga mulie ebiokhulia, okhuba mubienyanga khe mube abanyala okhutsilil'la okhumenya. Okhuba kata liswi elala siliakhakorekhwo khumirwe chienywe tawe.”

³⁵Olwa Paulo yali nabooye mbwo yabukula omukaati nakhupila Nyasaye embwo imbeli wabwe bosi, namekania ma nachiaka okhulia.

³⁶Kho bosi nibalema emioyo, nabo nibalia esiokhulia.

³⁷Fwesi abali m'meeli khwali abandu etsimia tsibili nende amakhumi kane nakataru nende basasaba.[9]

³⁸Olwabali nibaliiye nibekur're, bafuuba ingano yosi munyanza khulwo khwanguhia emeeli.

³⁹Olwa bwasia abakholi bomumeeli sibamanya esibala esiabalimwo tawe, nikarali balola olusoma lweinyanza olwali noluchinga lwomuyekhe, ma nibalola mbu nikali akanyalikha bakhasinjisisieyo emeeli.

⁴⁰Ma nibakhalaka ebiralisio nibabilekha munyanza ne nibabohol'la emikoye tsiemiikho. Nibasunga tsinanga tsieimbeli khe omuyeka kucheesie emeeli ma nikhutsia khuluchinga.

⁴¹Nebutswa boola habundu ahe tsinyanza tsibili tsiakan'nanga ma emeeli nehanda. Omurwe kwemeeli kwahanda m'muyekhe kakak'ka, ma tsingufu tsiebikubuli nitsifunaka inyuma wemeeli mubitonye.

⁴²Abasikari benya mbu bere ababohe bosi khulwoburi mbu bakhakhupa apali ma belukhe.

⁴³Nebutswa omukhongo wamahe yenya ahonie Paulo, ma nabekal'la balekhe okhukhola mbwo. Yalaka mbu yabo abanyala okhwelema belumbe munyanza beleme okhutsia khuluchinga,

⁴⁴ne abandi balondekhwo nibatil'le khutsimbao tsiemeeli etsiali nitsifunikhile. Nimbwo fwesi khwola khuluchinga nikhuli abalamu.