Read lunyore EBIKHOLWA 28 Bible Online

EBIKHOLWA 28 - lunyore bible

EBIKHOLWA 28

¹Olwa khwali nikhuhon'ne ma nikhwol'le khuluchinga khwamala nikhunyoola mbu esichinga yisio sialangwanga Melita.

²Abene esichinga yisio bali netsimbabasi tsinyinji khwifwe. Ifula yali nekwitsanga ma obusindu bwaliho obwinji, bamala nibahwana omul'lo, nibakhwinjisia fwesi.

³Paulo yabunjikha olukhanya lwetsikhwi ma yali natsiretsanga m'mul'lo ne inzokha nerulamwo khulwoluya lwomul'lo ma nemuhanda khumukhono.

⁴Bene esichinga olwa balola inzokha niyesung'unanianga khumukhono kwa Paulo ma nibabool'lana abene khubene, “Omundu uyu okhwola abe nali omwiri; kata naba nahon'ne khunyanza, obulunji sibumulekha abe mwoyo tawe.”

⁵Nebutswa Paulo yasakusa inzokha nekwa m'mul'lo sila okhusal'la kata nahati.

⁶Abandu yabo bapaalanga mbu Paulo yetsa okhusimba, nohomba okhukwa hasi bwangu ma afwe. Nebutswa olwa balinda oluhono nibaralola esibi nisiekhola khuye bakalukhania amakani kabwe nibaboola, “Ye ni Nyasaye.”

⁷Ahembi nende habundu yaho chialiho emikunda chiomukhongo wesichinga yisio owalangwa Pubilio. Yakhwinjisia nolukoosi, nikhuba abachenibe khulwamatukhu kataru.

⁸Samwana Pubilio yali nakon'ne musitanda nalwala omurengo nende okhunyalala amatsahi. Paulo yenjila musikoti mwa samwana Pubilio yalimwo ma nasaaya namurakhwo amakhono kaake, namuhonia.

⁹Ne olwe yaka kekhola, abandi bosi abali abalwaye musichinga yisio betsa ne nibahonibwa.

¹⁰Bakhuhelesia ebihanwa ebiabukhan'ne ne olwa khwarulayo bakhureela mumeeli ebindu ebiakhwali nikhukwanile okhuba n'nabio.

¹¹Inyuma wemiesi chitaru khwanina emeeli ya Alekisandaria eya langwanga “Abanyasaye amakhwana.” Emeeli iyo yali niyamenya musichinga yisio mumatukhu kosi akobusindu.

¹²Khwola mwitookho lia Sirakusa nikhumenyamwo amatukhu kataru.

¹³Olwa khwarulayo khwabotokhana okhwola litookho lia Regio. Inyuma welitukhu elala omuyeka okwarula enandete kwahungutsa, ne inyuma wamatukhu kabili nikhwola Putioli.

¹⁴Ebwene yiyo khwaliho nabasubili bandi abakhuhomba khumenye n'nabo khulwe lihonga elala. Nimbwo khwola Roma.

¹⁵Abasubili basiefwe abe Buroma bahul'la amang'ana kefwe ma nibetsa okhukhwakan'na mumatookho akalangwa Esiiro sia Apio nende Tsinyumba Tsiabacheni Tsitaru. Olwa Paulo yabalola yakhupila Nyasaye embwo ma nakhuuma ikholo.

¹⁶Olwa khwola Roma, omukhongo wamahe yara abahambe mumakhono ketswoni, nebutswa Paulo yahuchil'lwa okhuba khububwe nalind'we nomusikari.

¹⁷Inyuma wamatukhu kataru, Paulo yalanga halala abakhongo Besiyahudi abahabwene yaho. Olwa bali nibebunjelesisie nababool'la, “Abaisiraeli basianje, kata nikali sindakhol'la abandu befwe obubi, nohomba khumiima chiabakuka befwe, ndabohwa Yerusalemu ma nirebwa mumakhono ka Baroma.

¹⁸Olwa banzitsotsa nibalola mbu sindali khwo nende ling'ana liosi elikwan'ne okhwirwa tawe, nibaruna okhumboholola.

¹⁹Nebutswa olwa Abayahudi bafukula, kambachia okhuruna obukhalachi bwa Kaisari, kata nikali sindaali neling'ana liosi eliokhusitaka abandu befwe tawe.

²⁰Khulwe yako mulanjile mwitse khulolane nende okhul'loma n'nenywe sichila ndabohwa muminyololo singa mbu khulwo khunaaya khwa Baisiraeli.”

²¹Nabo nibamubool'la, “Ifwe sikhwanyoolakhwo etsibarwa tsiosi okhurula Ebuyahudi etsiamang'ana kako, kata omundu mulala khubaana befwe abetsa hano siyalerakhwo ling'ana nohomba okhuboola ling'ana libi khuibe tawe.

²²Nebutswa khulolanga nobulahi khuhulile okhurula khuibe obwololanga. Khwamanya mbu omukanda yikwo kufukulwanga habundu hosi.”

²³Ma nibaloosia litukhu nende Paulo eliokhwakana, ne abandu abenji nibatsia khuye aha yali namenyele. Okhurula mukamba tsuli okhwola butukhu yabenoosia amang'ana ko Bwami bwa Nyasaye, ne natema okhubamanyia aka Yesu narumikhilanga Amalako ka Musa nende akali mubitapu biabaroobi.

²⁴Abalala khubo basubila amang'ana kaake, ne abandi sibasubila tawe.

²⁵Nibabula okhuhuchilisania, ma nibatsia owabwe inyuma wa Paulo yali nababooleye ling'ana yili: “Nitooto ako Mwoyo Omutsienukhu yaboola khubakuka befwe okhubir'ra khumuroobi Isaya kali habwene.

²⁶Yaboola, ‘Tsia khubandu yaba obabool'le okhuhulila mulahulila ne simulimanyilisia tawe. Okhuhenga mulahenga ne simulalola tawe.

²⁷Okhuba emioyo chiabandu yaba chiatinya k'ka; Namarwi kabwe kaikala t'ti, netsimoni tsiabwe bamwasia. Nikarakhabeye mbwo bakhalol'le netsimoni tsiabwe, bakhahuliye namarwi kabwe, nibamanyilisia nemioyo chiabwe, ma basukhane khwise ma nase ndabahonia.’ ”

²⁸Ma Paulo namalila naboola, “Mumanye mbu oburume bwa Nyasaye obwobuhoni yibu buhiliywe Abetsimbia tsindi. Bo nabahulile.” [

²⁹Nolwa Paulo yali nabooye amang'ana yaka, Abayahudi barula nibahangalananga obutinyu abene khubene.][10]

³⁰Paulo yamenya emihika chibili chiosi munyumba eyomwene yali niyakombosia, niyenjisianga bosi abetsa okhumulola.

³¹Yakambanga ako Bwami bwa Nyasaye, niyebaala oko Mwami Yesu Kristo nolutswoni lwosi, sila omundu okhumukaya.