Read lunyore EBIKHOLWA 3 Bible Online

EBIKHOLWA 3 - lunyore bible

EBIKHOLWA 3

¹Litukhu lindi Petero nende Yohana bali nibatsitsanga mu Hekalu etsisaa tsirano natsine, etsisaa tsiokhusaaya.

²Ne ahembi nende omuliango kwe Hekalu okwalangwangwa “Omuliango Omukasu,” yaliho omundu mulala owali omulema okhurula niyebulwa. Abandu bachinga omundu uyo sielitukhu ma bamura yaho, khe asabe aketsimbabasi khu yabo abenjilanga mu Hekalu.

³Olwa yalola Petero nende Yohana nibenjilanga mu Hekalu yabasaba bamuhekhwo esindu.

⁴Petero nende Yohana nibamureela tsimoni, ma Petero namubool'la, “Khuhenge!”

⁵Naye nasukhana habali, nanaayanga okhunyoola khubo esindu.

⁶Nebutswa Petero namubool'la “Sindikhwo nende amapesa tawe, nebutswa esiandi n'nasio nisio esiakhuhelesia. Muliira lia Yesu Kristo wa Nasareti sinjila ochende!”

⁷Ma namutila omukhono omusaatsa, namusinjisia. Ne bwangu bwangu ebilenje bibie nende ebitseketsebie nibinyoola tsingufu.

⁸Niyetuta ikulu, nasinjila khubilenjebie nachiaka okhuchenda, niyenjila mu Hekalu halala n'nabo nachendanga niyetutatuta, ne niyetsomia Nyasaye.

⁹Abandu bosi bamulola nachendanga niyetsomianga Nyasaye.

¹⁰Olwa bamumanyilisia mbu niye owekhalanga ha “Muliango Omukasu” nasabil'la ebindu, bachenya okhusila khukali nikekhol'le khuye.

¹¹Olwomundu uyo yali nafumiye amakhono ka Petero nende Yohana nibali khulusimbo olwalangwa Olusimbo lwa Solomoni, abandu bosi bahuka muno, nibelukha okhutsia khubo.

¹²Olwa Petero yalola abandu yabo, yababool'la, “Abandu ba Isiraeli, busina muchenyanga khulwe yaka? Busina mukhureeleye tsimoni ol'la singa netsingufu tsiefwe nohomba okhufwana Nyasaye khwefwe okhuchil'le omundu uyu nachenda?

¹³Nyasaye wa Aburahamu, Isaka nende Yakobo, Nyasaye wabakuka befwe, ufumisie Omurumikhili uwe Yesu. Niye oweinywe mwara mumakhono kabakhongo, ma nimumwambakhana imbeli wa Pilato kata olwa Pilato mwene yali nakhalachile mbu abohol'lwe.

¹⁴Yali omutsienukhu khandi omulunji, nebutswa inywe mwamwambakhana, ne nimwenya omundu undi owali omwiri abohol'lwe.

¹⁵Mwera owemel'langa khubulamu, nebutswa Nyasaye yamusimukusia okhurula mubafu ne ifwe khuli abakobokheli baabe.

¹⁶Nobunyali bweliira lia Yesu obuchil'le omundu uyu owamulolanga ma mwamumanya okhuba omulema, abe netsingufu. Nokhusubila khukhwe muliira lia Yesu okhumuheye obulamu bwomubili imbeli wenywe mwesi.

¹⁷“Ne luno, abaana befwe, ndamanya mbu akenywe nende abemeli benywe mwakhola khu Yesu, mwakhola mukhubula okhumanya khwenywe.

¹⁸Nebutswa Nyasaye yahesia amang'ana akayekholel'la okhumanyia khale okhubir'ra mubaroobi baabe bosi, mbu kali akobuha Kristo uwe alisalisibwa.

¹⁹Kho mwekalukhanie, musukhane khu Nyasaye, kho amulekhele tsimbi tsienywe.

²⁰Mukhole mbwo khe Omwami amuhelesie tsinyinga tsiokhuhulusibwa, ma amuler're Kristo owa yamwel'la, ouli Yesu.

²¹Kamuhel'le asikale mwikulu okhwola inyinga yokhulomba ebindu biosi ebiyia, singa obwa Nyasaye yabisula okhubir'ra mubaroobi baabe abatsienukhu okhurula khale muno.

²²Okhuba Musa yaboola, ‘Omwami Nyasaye wenywe yakhamuler're omuroobi singa ise olirula mubaana benywe bene.

²³Wosi owakhabule okhumuhulila omuroobi uyo yakhabukhanibwe okhurula khubandu ba Nyasaye ma alamululwe.’

²⁴Abaroobi bosi, okhurula khu Samweli nende bosi abamulonda, bali okhuboola amang'ana akekholanga amatukhu kano.

²⁵Amasubisio ka Nyasaye yahana okhubir'ra mubaroobi kali khulwe inywe, ne musanganga mukhulakana okhwa Nyasaye yalomba nende abakuka benywe, singa obwa yabool'la Aburahamu, ‘Okhubir'ra mulwibulo lulwo ndakhalamile abandu bosi besibala tsikhabi.’

²⁶Nyasaye yela Omurumikhili uwe ma namuruma khwinywe mbelio, mbu amulamila tsikhabi nende okhukhola siamulala khwinywe arule mutsinjila tsitsie etsiobubi.”