Read lunyore EBIKHOLWA 4 Bible Online

EBIKHOLWA 4 - lunyore bible

EBIKHOLWA 4

¹Petero nende Yohana bali nibasil'loma khubandu olwa abesaalisi balala, omulindi wabasikari bomu Hekalu nende Abasadukayi balala boola.

²Bali okhusinyikha okhusila sichila abarumwa yabo bali nibebaal'langa abandu mbu Yesu yasimukukha, akamanyianga mbu abafu bakhasimukukhe.

³Bamala nibabafumila nibabara mubuhambe okhwola omukamba okwalondakhwo sichila isi yali nebir're.

⁴Nebutswa abenji khubo abahul'la amang'ana yako basubila, abandu batsilil'la okhumetekha, amabalo kabwe nikaba ahembi etsielefu tsirano.

⁵Omukamba okwalondakhwo abakhongo ba Bayahudi, abakhulundu nende abebaali ba Malako bebunjikha halala mu Yerusalemu.

⁶Babukaana halala nende Anasi, Kayafa, Yohana, Alekisanda nende abandi abali abekho bo Mwesaalisi Omukhongo.

⁷Basinjisia abarumwa imbeli wabwe, nibabareeba, “Inywe mukhol'le ling'ana yili mutsingufu sina, nohomba muliira lia wina?”

⁸Kho Petero yali niyetsuye Omwoyo Omutsienukhu, nabakalusia, “Inywe abakhongo nende abakhulundu babandu,

⁹nikhuba nikhwitsotsungwa leelo khulwesikholwa esilahi esikhol'lwe khumundu owali omulema uyu nende obwa ahonibwe,

¹⁰kho inywe mwesi nende abandu bosi aba Isiraeli mukwana okhumanya mbu omundu uyu usinjiye imbeli wenywe leelo nali omulamu khulwo bunyali bweliira lia Yesu wa Nasareti oweinywe mwabamba, nebutswa Nyasaye yamusimukusia okhurula mubafu.

¹¹Uyu niye owa Amahandiko Amatsienukhu kal'loma khwo, ‘Lichina lieinywe abombokhi mwachaaya eliene yilio likwiye eliobukhonyi obukali khunyumba.’

¹²“Obuhoni sibunyoolekhanga okhubir'ra mumundu undi wosi tawe, okhuba libulaho eliira lindi musibala mwosi eliabandu bahebwa eliakhuhel'le okhuhonichisibwamwo.”

¹³Abakhulundu bomuse yabo olwa balola Petero nende Yohana sibaali nende obusomi obweikulu, bachenya singa obwa bal'loma nende olutswoni. Nibamanya mbu balinji halala nende Yesu.

¹⁴Nebutswa olwa balola omundu wali nahonibwe nasinjiye halala nende Petero na Yohana, sibaali abanyala okhuboola esindu siosi tawe.

¹⁵Bamala nibalaka mbu barule mumoni tsiabwe, nabo abene nibasikala nibasibool'lana.

¹⁶Nibareebana, “Khubakhol'le sina abandu yaba? Siomundu omenyele Yerusalemu umanyile mbu akamangalimwa yaka kakhol'lwe n'nabo, ne ifwe sikhunyala okhwambakhana tawe.

¹⁷Nebutswa khulwo khwikal'la ling'ana yili libule okhulanda mubandu ehale, khubakaye barakhal'loma khwo nende omundu wosi muliira lia Yesu tawe.”

¹⁸Bamala nibabalanga mukari khandi nibabakaya barakhal'loma khwo khandi nohomba okhwibaala muliira lia Yesu tawe.

¹⁹Nebutswa Petero nende Yohana nibabakalusia nibababool'la, “Inywe abene mukhalache nel'lihena lilahi mumoni mwa Nyasaye — okhuhulila inywe nohomba okhuhulila Nyasaye.

²⁰Okhuba ifwe sikhunyala okhulekha okhul'loma khukakhwalola nende okhuhul'la tawe.”

²¹Kho abakhulundu bomuse yabo nibamal'le okhubekhana nende okhubakaya butinyu, nibabalakhula. Balola nibuli obutinyu okhubahelesia esinyasio sichila abandu bosi bali nibetsoomianga Nyasaye khukosi akali nikekhol'le.

²²Omundu owahonibwa uyo yali nemihika okhuyomba amakhumi kane.

²³Olwa Petero nende Yohana balakhulwa, bakalukha khubasiabwe nibababool'la singa abesaalisi abakhongo nende abakhulundu bali nibababooleye.

²⁴Olwa basubili buhulila amang'ana yako bahambana mukhusaaya Nyasaye neimbul'lano nibaboola, “Omwami owalomba likulu nende esibala, nende inyanza ma nende biosi ebilimwo;

²⁵niwe owachila omurumwawo Daudi naboola mutsingufu tsio Mwoyo Omutsienukhu mbu: ‘Nisina esichilanga Abetsimbia nibaba nelirima? Busina abandu baloosianga amang'ana akabutswa?

²⁶Abaruchi besibala berechekhanga ne abakhongo nibebunjikha halala okhufukula Omwami nende Masihi uwe.’

²⁷Okhuba, siahene, nimbwo Herode, Pontio Pilato halala nende Abaisiraeli nende Abetsimbia tsindi bebunjikha mwitookho muno okhufukula Yesu, owali omurumikhiliwo Omutsienukhu; oweibe wakhola okhuba Masihi.

²⁸Bebunjikha bakhole akeibe wali niwachooma kakhekhole mubunyali bubwo.

²⁹Ne luno Omwami, ohenge okhwekhana nende okhuriisia khwabwe. Okhunyal'le ifwe abarumikhili baabo okhukamba ling'ana lilio nolutswoni lwosi.

³⁰Nyila omukhono kukwo kuhonie abandu, ma ohuchil'le mbu akamangalimwa nende akokhuchenyia kekhole muliira lio Murumikhiliwo omutsienukhu Yesu.”

³¹Olwa bamala okhusaaya, habundu ahabali nibebunjikhile yaho hatechesibwa, ne bosi nibetsusibwa nende Omwoyo Omutsienukhu. Bosi nibachiaka okhukamba ling'ana lia Nyasaye sila oburi.

³²Omukanda kwabasubili kwali nende okhulalila khulala nende omwoyo mulala. Siyalikhwoho kata mulala owali nesindu siosi ma naboola nesisie yenyene tawe, nikarali bakabana biosi ebiabali n'nabio.

³³Abarumwa betsoomia nobunyali obukali khukokhusimukukha khwo Mwami Yesu, ne Nyasaye naye nabahelesia esirenda esinji.

³⁴Siyalikhwoho kata mulala mubo owali nobutambi, sichila abali nemikunda nohomba tsinyumba bakusia, nibalera amapesa kabakusisie,

³⁵nibahelesia abarumwa; ne amapesa yako kakabul'lwa siomundu okhulondokhana nende elienya lilie.

³⁶Ma nimbwo Yosefu, Omulawi owebul'lwa Kupuro, owabarumwa balanganga Baranaba (Eliboolanga “Omundu wokhutinyilisia”),

³⁷yakusia omukunda okwa yali n'nakwo, nalera amapesa nahana khubarumwa.