Read lunyore EBIKHOLWA 5 Bible Online

EBIKHOLWA 5 - lunyore bible

EBIKHOLWA 5

¹Omundu mulala owalangwa Anania nomukhasiwe Safira nabo khandi bakusia esitonye siemiandu chiabwe.

²Nebutswa namal'le okhuhuchilisania nende omukhasiwe, yakabukhania esitonye silala siamapesa nahana esiasikala khubarumwa.

³Petero namubool'la, “Anania, busina nohuchil'la Setani niyenjila mumwoyo kukwo nachila nokaata Omwoyo Omutsienukhu khulwo khukalukhania esitonye siamapesa kokusisie omukunda?

⁴Nosili okhukusia kwali omwandu kukwo ne kata olwa wali nomal'le okhukusia, amapesa kali akaako. Nisina esichil'le nokhalaka mumwoyokwo okhukhola esindu singa yisi? Siokaat'te omundu tawe; okaat'te Nyasaye.”

⁵Olwa Anania yahul'la amang'ana yaka, yakwa hasi nafwa. Abandu bosi abahul'la amang'ana yaka baria okhusila.

⁶Abasiani basinjila nibafunikha omubili kukwe, nibamuhinia esioba, nibamuyabila.

⁷Inyuma wetsisaa singa tsitaru mbu, omukhasiwe niyenjila, naramanyilekhwo akali nikekhol'le.

⁸Petero namureeba, “Mbool'la, kano niko amapesa kosi kamwanyooye olwa mwakusisie omukunda?” Naye nakalusia, “Yee, nimbwo kali.”

⁹Petero namubool'la, “Busina muhuchilisanisie nende omusaatsawo okhutema Omwoyo wo Mwami? Lola, abandu abaali okhuyabila omusaatsawo mbaba bali m'muliango ne betsa okhukhuhila nawe khandi.”

¹⁰Habwene yaho Safira nakwa habilenje bia Petero, nafwa. Abasiani yabo olwa benjila, banyoola nafwiye; ma nibamuhinia esioba, nibamuyabila ahembi nende omusaatsawe.

¹¹Abelikanisa bosi halala nende bosi abahul'la amang'ana yaka baria okhusila muno.

¹²Abarumwa bakhola akamangalimwa amenji nende akokhuchenyia mubandu. Abasubili bakan'nanga halala mulusimbo lwa Solomoni.

¹³Omundu undi wosi orali omusubili siyatsalikha okhwetsoka mubo tawe. Kata mbwo, abandu babafumia.

¹⁴Abandu bandi abenji bameetekha khumukanda yikwo — abasaatsa nende abakhasi abasubila Omwami.

¹⁵Khulwa amang'ana akabarumwa bali nibakholanga, abandu bahila abalwaye kutsinjila nibabakonisie khubirili nende khumachambi mbu olwa Petero aba nabiranga, esiniini sisie sibir're khubalala khubo.

¹⁶Abandu abenji betsa okhurula mumatookho akalondokhana nende Yerusalemu, nibaleera abalwaye babwe nende yabo abali nende emioyo chiesifwabwi, ne bosi nibahonibwa.

¹⁷Ma Omwesaalisi Omukhongo nende abasie bosi abali abomukanda kwa Basadukayi abahabwene yaho, nibasiendekhela abarumwa.

¹⁸Nibabafumila, nibabara munyumba yabahambe.

¹⁹Nebutswa om'malaika wo Mwami yekula emiliango chieinyumba yobuhambe butukhu, nabahinia esioba, nababool'la,

²⁰“Mutsie musinjile mu Hekalu mubool'le abandu amang'ana kosi akobulamu obuhia yibu.”

²¹Abarumwa bakahulila, nibenjila mu Hekalu mukamba tsuli, nibachiaka okhwibaala. Omwesaalisi Omukhongo nende abasie betsa nibalanga omukanda kwabandu besiina halala nende abakhulundu bosi aba Isiraeli, naruma abandu batsie munyumba yobuhambe balere abarumwa yabo.

²²Nebutswa abandu yabo olwaboola munyumba yobuhambe sibanyoola abarumwa nibalimwo tawe. Nibakalukha nibabool'la abomukanda,

²³“Khunyooye inyumba yobuhambe niyikaye bulahi, ne abalindi nibalindanga emiliango. Nebutswa nyinga khwikuye sikhunyooyemwo omundu wosi tawe.”

²⁴Khe olwo mukhongo wabalindi be Hekalu nende abesaalisi abakhongo bahul'la amang'ana yako, bahenda emioyo, nibakorwa okhumanya esiali nisiekhol'le khubarumwa.

²⁵Omundu mulala yetsa nababool'la, “Abandu bamwareye mububohe bala, luno bali mu Hekalu, bebaal'langa abandu.”

²⁶Omukhongo wabalindi be Hekalu halala nende abandu baabe batsia mu Hekalu, nalera abarumwa. Nebutswa sibabafumila netsingufu tawe, okhuba baria mbu abandu bakhabalasa namachina.

²⁷Nibalera abarumwa, nibabasinjisia imbeli womuse. Omwesaalisi Omukhongo nababool'la,

²⁸“Khwamukayile kol'lani mbu murebaalakhwo muliira liomundu uyu tawe, ne luno mulandisie amebaalo kenywe mu Yerusalemu, nimwenyanga okhulera amatsahi komundu uyu khwifwe!”

²⁹Petero nende abarumwa bandi nibakalusia nibaboola, “Khatimba khuhulile Nyasaye, okhuyomba abandu.

³⁰Nyasaye wabakuka befwe yasimukusia Yesu olwa mwali nimumwir're nimumwachikha khumusalapa.

³¹Omwene uyu Nyasaye yamuchingula khumukhonokwe omusaatsa, abe omwemeli khandi omuhoni, khe abahe Abaisiraeli obweyangu bekalukhanie, nibalekhelwa tsimbi tsiabwe.

³²Ifwe khuli abakobokheli khumang'ana yako, halala nende Omwoyo Omutsienukhu oli esihanwa esia Nyasaye ahetsanga bosi abamuhulilanga.”

³³Abandu bosi abomuse olwa bahul'la yako nibaba nelirima likali ma kata nibenya okhwira abarumwa.

³⁴Nebutswa Omufarisayi mulala owalangwa Gamalieli owali Omwibaali wa Malako ma owali niyahebwa oluyali okhusila nabandu bosi, yasinjila imbeli womuse, nalaka mbu abarumwa yabo bahilwe esioba hatu.

³⁵Ma nabool'la abomuse, “Abaisiraeli basianje, mwehile kalaha khukamukhol'la abandu yaba.

³⁶Mwitsul'langa amatukhu kabir're omundu yarul'lamwo owalangwa Tseuda, owekhola okhuba omukhongo, ne abandu ahembi etsimia tsine nibeyonga khuye. Nebutswa yamala niyerwa, ne abalondibe bosi nibasalana, ma omukandakwe nikukora.

³⁷Khandi olunyumakhwo Yuda Omugalilaya narul'lamwo mumatukhu kokhubasia abandu. Naye nakhwesa omukanda omukali nikumulonda, nebutswa naye khandi yerwa ma omukanda kwabalondibe nikusalaana.

³⁸Ne luno khandi mubool'langa, mwehile kalaha, murakhol'lakhwo abandu yaba esindu siosi tawe. Mubalekhe baabe! Sichila obuloosie yibu nohomba emilimo yichi nibiba nibili ebiarula khubandu nabikore butswa ebiene.

³⁹Nebutswa nibili ebiarula khu Nyasaye, simwakhanyala okhubaleka tawe. Khase fwana mwakhanyoolekha mulwananga nende Nyasaye!” Nabo nibahuchil'la amang'ana ka Gamalieli.

⁴⁰Nibalanga abarumwa, nibalaka mbu bakhupwe eb'boko, ma nibabakaya barakhebaalakhwo muliira lia Yesu tawe, ma nibabalakhula.

⁴¹Abarumwa nibarula nende obusangali okhuba kali nikakwanile basimbibwe emirwe khulweliira lia Yesu.

⁴²Nibatsitsachil'la okhwibaala nende okhukamba Amang'ana Amalahi aka Yesu Kristo mu Hekalu nende mutsinyumba tsiabandu sielitukhu.