Read lunyore EBIKHOLWA 6 Bible Online

EBIKHOLWA 6 - lunyore bible

EBIKHOLWA 6

¹Inyumakhwo, olwabechi bali nibameetekhanga, oburambane bwaliho hakari wa Bayahudi abal'lomanga Oluyunani nende Abayahudi bene esibala. Abayahudi abal'lomanga Oluyunani baboola mbu abalekhwa babwe sibatendwangwa obulahi mukhukabilwa khwesielitukhu khwamapesa tawe.

²Khulwe yako abarumwa likhumi nababili nibalanga omukanda kwabasubili kwosi, nibaboola, “Sibuli obulahi ifwe okhulekha okhukamba Ling'ana lia Nyasaye mbu khurumikhile emilimo chietsimesa tawe.

³Khulwe yako, abaana befwe, mwele abandu bane nabataru okhurula mwinywe aboluyali ol'lahi, abetsula nende Omwoyo Omutsienukhu nende obuchesi, khubabikhe okhusinjil'la omulimo yiku.

⁴Nebutswa ifwe khulahana obweyangu bwosi okhusaaya nende okhukamba Ling'ana lia Nyasaye.”

⁵Omukanda kwosi kwayanzisibwa nende ling'ana yili, ma nibeela Stefano, omundu owetsula nobusubili nende Omwoyo Omutsienukhu, halala nende Filipu, Porokoro, Nikanori, Timona, Paramena, nende Nikola owa Antiokia owali niyakalukhana okhurula khudini yabwe okhutsia khudini Yesiyahudi.

⁶Nibabasinjisia imbeli wabarumwa, ne nabo nibabasaayila nibabarakhwo amakhono.

⁷Ne ling'ana lia Nyasaye nilitsitsachil'la okhulanda. Abechi nibameetekha mububali bwabwe okhusila, ne omukanda omukali kwabesaalisi nikuhuchil'la obusubili yibu.

⁸Stefano, omundu owetsula nesirenda sia Nyasaye nende obunyali, yakhola akamangalimwa nende akokhuchenya amakhongo mubandu.

⁹Nebutswa yafukulwa nende abandu bandi abo khu yabo abali musinakoki eyalangwa Esinakoki[3] eya abandu abalakhule, abarula Kurene nende Alekisandaria; abandi barula Kilikia nende Asia.

¹⁰Nebutswa bakhumbulwa okhumuleka khulwo buchesi bubwe nende Omwoyo owamwemel'la olwa yal'lomanga.

¹¹Ma nibahetsa abandu nalebe baboole, “Khuhuliye naboolanga amang'ana kokhunyeka Musa nende Nyasaye.”

¹²Munjila yiyo bamala nibachema abandu nende abakhulundu nende abebaali ba Malako. Nibatsia nibamufumila Stefano, nibamulera musiina.

¹³Nibasinjisia abakobokheli bobubehi ababoola, “Omundu uyu sialekhanga okhuboola amang'ana kokhufukula Ehekalu yefwe nende lilako lia Musa tawe.

¹⁴Khuhuliye naboolanga mbu Yesu wa Nasareti uyu yakhasambule Ehekalu yino nende okhukalukhania emima chiosi chia Musa yakhuhelesia.”

¹⁵Bosi abali mubwikhalo bwesiina yibwo bareela Stefano tsimoni, nibalola obwenibwe nibufwana singa obwa abamalaika.