Read lunyore EBIKHOLWA 7 Bible Online

EBIKHOLWA 7 - lunyore bible

EBIKHOLWA 7

¹Omwesaalisi Omukhongo nareeba Stefano, “Yaka nakatooto?”

²Ne Stefano naye naboola, “Abawefwe nende abapapa, mumbulile. Nyasaye yalolekhela papa wefwe Aburahamu olwa yali musibala sia Mesopotamia nasili okhutsia okhumenya Harani,

³namubool'la, ‘Rula musibala sienywe, olekhe abekho baabo, otsie musibala esianakhumanyie’

⁴Ma Aburahamu narula musibala siabwe, natsia okhumenya Harani. Inyuma wokhufwa khwa samwana, Nyasaye yamuhinia Harani, niyetsa okhumenya musibala esia mumenyelemwo luno yisi.

⁵Nyasaye siyahelesiakhwo Aburahamu esitonye siosi sibe esisie tawe, ne kata mbwo yamulaka alimuhelesia esibala yisi sibe esisie nende olwibulolwe, kata nikali siyalikhwo nende omwana tawe.

⁶Nyasaye yamubool'la mbu, ‘Abolwibulo lulwo bakhahilwe musibala esicheni ne bakhakholwe okhuba abahambe ebwene yiyo ma bakhakhol'lwe obubi ebwene yiyo khulwemihika etsimia tsine.

⁷Nebutswa ndakhakhalachile esiina olwibulo olwakhabakhole abahambe. Olweinyuma ndakhabahinie musibala yisio, baletse okhundekayakaya hano.’

⁸Ma Nyasaye nahelesia Aburahamu omulukha kwes'sebo kube esilolelo sieindakano yabwe. Ma Aburahamu naseba omwanawe Isaka khwitukhu lia munane. Ne Isaka naye naseba omwanawe Yakobo, ne Yakobo naye naseba abasianibe likhumi nende babili abali abakuka befwe.

⁹“Abasiani ba Yakobo bali neimbalikha khu Yosefu ma nibamukusia okhuba omuhambe Emisiri. Nebutswa Nyasaye yali halala n'naye,

¹⁰ma namusoola mumanyakhano kaake kosi. Yamuha obuchesi nende olukoosi imbeli womuruchi we Misiri, ma Omuruchi uyo namukhola okhuba omukhongo wesibala siosi esie Misiri khandi omulindi weinyumba yiye yoburuchi.

¹¹Ma inzala nebaho ingali musibala siosi esie Misiri nende Kanaani, nelera okhusal'la okhwinji. Abakuka befwe sibanyoola ebiokhulia ebibahela tawe.

¹²Nebutswa olwa Yakobo yahul'la mbu obuswache buli Emisiri, yaruma abaanabe, abali abakuka befwe, batsie Emisiri olwokhuranga.

¹³Olwa bakalukhayo olwakhabili Yosefu yeribula khubaana babwe, ma Omuruchi we Misiri namanya olwibulo lwanga Yosefu.

¹⁴Yosefu yaruma oburume khusamwana nende abekhobe bosi, abandu abahela amakhumi kane nakataru nende barano, betse Emisiri.

¹⁵Kho Yakobo yatsia Emisiri, owa ye nende abakuka befwe bafwila.

¹⁶Emibili chiabwe chialerwa Shekemu, nichiyabilwa musilindwa esia Aburahamu yali niyakula okhurula khu Baamori esitonye nalebe esiefetsa.

¹⁷“Olwe inyinga yoola eya Nyasaye okhuhesisiamwo lisubisio elia yahelesia Aburahamu, abandu yabo bali nibameetekha okhusila muno.

¹⁸Olwe inyuma omuruchi undi oramanya abanga Yosefu yachiaka okhuruka Emisiri.

¹⁹Yakaata abolwibulo lwefwe, ma nakhol'la abakuka befwe obubi, bafuubenge abaana babwe abatoro esioba nibafwilayo.

²⁰Musa yebulwa olwene yilwo, nali omwana omulahi okhusila. Yafwit'twa munyumba yabwe emiesi chitaru,

²¹ne olwa yahinibwa munyumba yabwe, omukhaana wa Farao yamubukula, namufwita abe omwanawe.

²²Musa yechibwa amang'ana kosi akobuchesi bwa Bamisiri ma naba owobunyali mumang'anake nende mubikholwabie.

²³“Olwa Musa yali nende emihika amakhumi kane, yapaala mbu atsie akonyekhwo abaana babwe Abaisiraeli.

²⁴Yanyoolayo mulala nasalisibwanga, natsia okhumusoola, ne khulwa okhurunga es'sialia yamala niyeera owali Omumisiri.

²⁵Yapaalanga mbu Abaisiraeli nabamanyilisie obwa Nyasaye yakhamurumikhiye khulwo okhubasoola, nebutswa sibamanyilisia tawe.

²⁶Litukhu lialondakhwo yalola Abaisiraeli babili nibakhupananga, natema okhubabukhania, nababool'la; ‘Inywe muli abolwibulo l'lala, busina musalisanianga abene khubene?’

²⁷Nebutswa owali nakhupakanga owasie yalumba Musa naboola, ‘Niwina owakhukhola okhuba omukhongo khandi omukhalachi wefwe?

²⁸Orunanga unzire singa wair're Omumisiri olwabeye?’

²⁹Olwa Musa yahul'la yako yelukha, natsia okhumenya musibala sia Midiani, niyebul'layo abaana babili.

³⁰“Emihika amakhumi kane nichihweye om'malaika yalolekhela Musa mulumemo lwomul'lo musitsakha esiali nisiatukhanga musitsiimi ahembi nende esikulu sia Sinai.

³¹Musa yachenya okhusila okhulola akene yako ma niyesunda ahembi alole esiali nisiekholanga, ne nahul'la omwoyo kwo Mwami nikuboola;

³²‘Ise nise Nyasaye wabakuka baabo, Nyasaye wa Aburahamu, Isaka nende Yakobo!’ Musa yatechela khulwoburi ma kata naria okhuhengaho.

³³Omwami namubool'la, ‘Hinia ebilaro mubilenjebio, sichila ahosinjiye hano nihabundu hatsienukhu.

³⁴Ndutsi amabi akakhol'lwanga abandu banje Emisiri. Mbuliye okhulakaya khwabwe, ma nzitsile okhubasoola. Khulwe yako, yitsa hano khurume Emisiri.’

³⁵“Musa omutelwa uyu niye owa Baisiraeli basuula nibaboola, ‘Niwina owakhukhola okhuba omukhongo khandi omukhalachi wefwe?’ Niye owa Nyasaye yaruma okhwamiha abandu ma abakhole okhuba abalakhule nakhonywanga nende om'malaika owalolekha khuye musitsakha esiomul'lo.

³⁶Niye owemel'la abandu yabo nabahinia Emisiri, nakhola akamangalimwa nende akokhuchenya musibala sie Misiri, nende khunyanza Inzakhanyu, nende musitsiimi emihika amakhumi kane.

³⁷Musa niye owabool'la Abaisiraeli, ‘Nyasaye yakhamurumile omuroobi singa ise okhurula mubaana benywe bene.’

³⁸Niye owali nende abandu ba Isiraeli abali nibebunjikhile musitsiimi; yaliho halala nende abakuka befwe ma nende om'malaika owal'loma n'naye musikulu sia Sinai, ma nanyoola oburume bwa Nyasaye obuli mwoyo nakhuhelesia ifwe.

³⁹“Nebutswa abakuka befwe basuula okhumuhulila, nibamwehanya, ma nibekomba okhukalukha Emisiri.

⁴⁰Ma nibabool'la Haruni, ‘Khulombele abanyasaye aba nabakhwemel'lenje, sichila sikhumanyile akakwiliye Musa owakhwemel'la okhurula Emisiri tawe!’

⁴¹Nilwo olwa balomba esifwanani siesimoosi nibalerakhwo emisango chiabwe ma nibalomba lisabo khulwa esiabali nibalombele abene.

⁴²Ma Nyasaye yasukhana nabalekha benamile tsinyininyini tsiokhwikulu, singa obwa kahandikwa musitapu siabaroobi. ‘Inywe abandu ba Isiraeli! Sindi nise owamwer'ra emiruko tsiemisango khulwemihika amakhumi kane musitsiimi tawe.

⁴³Inywe mwachinga liheema liesinyasaye esialangungwa Maloki, nende esifwanani sieinyininyini eyesinyasaye sienywe esialangwa Rafani. Ebiniini ebiamwalomba nibio ebiamwenamila. Khulweyako ndakhamuhile mulabe abahambe ehale okhubira Babuloni.’

⁴⁴“Abakuka befwe bali nende liheema liokhubaho khwa Nyasaye musitsiimi. Liali nilialombwa singa obwa Nyasaye yabool'la Musa okhulilomba, okhulondokhana nende esifwanani esiamanyibwa khu Musa.

⁴⁵Olwe inyuma abakuka befwe babukula liheema tsana nibenjisia halala nende Yoshwa ma nibabukula esibala yisio okhurula khutsimbia tsia Nyasaye yakhunga olwa bali nibetsanga. Ma liheema yilio nilimenyayo okhwola mumatukhu ka Daudi.

⁴⁶Daudi yabeelwa esirenda nende Nyasaye ma nareeba Nyasaye amuhuchilil'le okhunyool'la Nyasaye wa Yakobo habundu hamenya.

⁴⁷Nebutswa Solomoni niye owamwombokhela inyumba.

⁴⁸“Nebutswa Nyasaye weikulu okhusila samenyanga mutsinyumba etsiombokhwa nende abandu tawe; singa omuroobi aboolanga:

⁴⁹‘Omwami aboolanga mbu: Likulu noluruba lwanje lwobukhongo, ne esibala nesirebe sianje esiokhulambisiakhwo ebilenje. Ninyumba efwana mbwena eyamurunanga okhunyombokhela? Kata nihena aha ndakhahuluukhila?

⁵⁰Sindi nise omwene owalomba ebindu yibi?’

⁵¹“Inywe abamakosi amatinyu! Emioyo chienywe nende amarwi bili singa abandu betsinzibulo, inywe mufwana singa abakuka benywe. Amatukhu kosi mufukulanga Omwoyo Omutsienukhu.

⁵²Alikhwoho omuroobi wosi owabakuka benywe barakhupiakhwo esibi? Beera abandu aba Nyasaye yaruma okhumanyia okhwitsa khwo uyo Omulunji. Ne luno inywe mumusieman'ne ma mumwir're.

⁵³Inywe mwanyoola amalako akalerwa nende Om'malaika, nebutswa simwakalonda tawe.”

⁵⁴Olwa bakhulundu bomuse bahul'la aka Stefano yaboola yako, basinyikha okhusila, nibamukhwayul'la ameno muburima.

⁵⁵Nebutswa Stefano yali niyetsuye Omwoyo Omutsienukhu, nahenga mwikulu, nalola obukhongo bwa Nyasaye, ne Yesu nasinjiye khumukhono omusaatsa kwa Nyasaye.

⁵⁶Naboola, “Lole, ndolanga likulu nilikukhile, ne Omwana wo Mundu usinjiye khumukhono kwa Nyasaye omusaatsa.”

⁵⁷Abandu bosi abali mumuse nibakhupa liyoka, nibasiba amarwi kabwe nende amakhono kabwe. Nibaruuma khuye neimbul'lano,

⁵⁸nibamuhinia esioba welitaala, nibamulasa namachina. Abakobokheli nibalekha amakoti kabwe mubulindi bwomusiani owalangwa Saulo.

⁵⁹Batsitsachil'la okhulasa Stefano namachina, naye nasaaya Omwami naboola, “Omwami Yesu, bukula omwoyo kwanje.”

⁶⁰Nasikama hasi, nahanzukha nomwoyo omukali, “Omwami, oretsul'la tsimbi yitsi khubo tawe.” Namal'le okhuboola mbwo yamala nafwa.