Read lunyore EBIKHOLWA 8 Bible Online

EBIKHOLWA 8 - lunyore bible

EBIKHOLWA 8

¹Ne Saulo yalola okhufwa khwa Stefano nikhuli habwene. Khwitukhu yilio okhukhupibwa esibi okhukali khwabuukha khubakristo abali Yerusalemu. Abasubili bosi basalaanibwa mubibala bie Buyahudi nende Samaria, nibarali abarumwa bonyene nibo abasikala.

²Abasatsa abaria Nyasaye nibayabila Stefano nibamulombela amasika amakali.

³Nebutswa Saulo yateema okhwononia likanisa. Yenjila musie inyumba, nahinia esioba abasubili bosi, abasatsa nende abakhasi, nabara mububohe.

⁴Abasubili abasalaana batsia siahabundu nibakamba oburume yibwo.

⁵Ne Filipu naye natsia mwitookho likali lia Samaria, nakambila abandu balio aka Masihi.

⁶Emikanda chiahul'lisia mubweyinikhu aka Filipu yaboola, olwa bahul'la ne nibalola akamangalimwa aka yali nakholanga.

⁷Okhuba emioyo chiesifwabwi echiali nichiahamba abandu abenji chiarula nichikhupa liyoka likali; ne khandi abandu abenji abali nibanyela nende abalema, bahonibwa.

⁸Ma obusangali obwinji nibuba mwitookho yimwo.

⁹Yaliho omundu mulala owalangwa Simoni owali niyakhola obufumu bubwe mwitookho yimwo khulwe inyinga nalebe ma niyachenyia abandu ba Samaria, niyelolanga okhuba omundu omukhongo okhusila.

¹⁰Abandu bosi, abatu nende abakali bamuhul'langa, nibaboola, “Omundu uyu niye obunyali bwa Nyasaye obulangwangwa ‘Obunyali obukhongo’ ”

¹¹Bamuhul'la okhusila, sichila yali niyabachenyia nobufumu bubwe khulwamatukhu amenji.

¹²Nebutswa olwa basubila oburume bwa Filipu khulwa Amang'ana Amalahi ako Bwami bwa Nyasaye nende eliira lia Yesu Kristo, babaputiswa, abasaatsa nende abakhasi.

¹³Simoni naye khandi nasubila; nabaputiswa ma namenya ahembi nende Filipu, ne yahuka okhusila obwa yalola akamangalimwa nende akokhuchenya akali nikekholanga.

¹⁴Abarumwa abali Yerusalemu olwa bahul'la mbu abandu ba Samaria bahuchiliye ling'ana lia Nyasaye, babarumila Petero nende Yohana.

¹⁵Olwa boolayo, basaayila abasubili yabo banyoole Omwoyo Omutsienukhu.

¹⁶Okhuba olwene yilwo Omwoyo Omutsienukhu yali nasili okhuyel'lakhwo kata mulala khubo; bali nibabaputiswa butswa muliira lio Mwami Yesu.

¹⁷Ma Petero nende Yohana nibara khubo amakhono, ne nibanyoola Omwoyo Omutsienukhu.

¹⁸Olwa Simoni yalola abandu nibanyooye Omwoyo Omutsienukhu khulwo khurebwakhwo amakhono kabarumwa, yahelesia Petero nende Yohana amapesa naboola,

¹⁹“Mbekhwo obunyali yibu nase, khe omundu owa naretsengekhwo amakhono kanje, anyoolenge Omwoyo Omutsienukhu.”

²⁰Nebutswa Petero yamukalusia namubool'la, “Amapesa kako kakore halala n'nawe omwene, sichila opaalanga wakhakula esihanwa sia Nyasaye namapesa!

²¹Siolikhwo nesitonye mumilimo yichio tawe sichila omwoyokwo sikuli habwene m'moni mwa Nyasaye tawe.

²²Khulwe yako wekalukhanie okhurula khububi bubwo yibu ma osaaye Omwami akhulekhele amakani singa yako.

²³Okhuba ndolanga mbu oli nende imbalikha ingali ma oli omubohe wetsimbi.”

²⁴Simoni nakalusia, “Yanze musaayile khu Mwami, amang'ana kamuboolanga yaka kalekhe okhungwila.”

²⁵Olwa Petero nende Yohana bali nibamal'le okhuhaana obuloli bwabwe nende okhukamba oburume bwo Mwami, bakalukha Yerusalemu. Olwa bali nibakalukhanga bakamba Amang'ana Amalahi mumatookho amenji aka Samaria.

²⁶Om'malaika wo Mwami yabool'la Filipu, “Werechekhe okhutsia enandete khunjila eselenjeranga nerula Yerusalemu netsia Gasa.” (Injila yiyo yabir'ranga musitsiimi).

²⁷Filipu yamala niyerechekha, ma nachiaka oluchendo. Olwene yilwo omundu omukhongo wa Etsiopia owali omulindi wemiandu chia Kandake omuruchi omukhasi waba Etsiopia, owali natsiye Yerusalemu okhwekayakaya,

²⁸yali nakalukhanga ingo, niyekhaye mwikari lilie. Yali nasomanga esitapu siomuroobi Isaya.

²⁹Omwoyo Omutsienukhu nabool'la Filipu, “Esunde ahembi khwikari yilio.”

³⁰Filipu natsia tsimbilo khwikari yilio nahul'la omundu uyo nasomanga esitapu siomuroobi Isaya. Ma Filipu namureeba, “Omanyilisianga akosomanga?”

³¹Omundu uyo namukalusia, “Ndakhamanyilisia mbwena omundu naramanyisie?” Ma nahomba Filipu anine mwikari, yekhale n'naye.

³²Esitonye sia Amahandiko esia yali nasomanga ni yisi: “Yali singa likondi elihilwangwa okhwirwa, singa esimeme sielikondi sibulanga okhwana olwa sikhalakwangwa obwoya; Nimbwo naye arachinga omunwa kukwe.

³³Yasandibwa ne siyakhalachilwa esiina habwene tawe. Abulaho owakhal'lome khukolwibulo lulwe, sichila obulamubwe burul'le musibala.”

³⁴Omuetsopia uyo nabool'la Filipu, “Mbool'la, omuroobi uyu al'lomanga khuwina? Aboolanga akaake omwene nohomba akomundu undi?”

³⁵Ma Filipu nachiachila khusiasia siamahandiko yisio, namwinoosia Amang'ana Amalahi ka Yesu.

³⁶Olwa bali nibasitsitsachil'la noluchendo boola habundu ahamaatsi kali ne omukhongo uyo naboola, “Amaatsi ngaka yaha, nisina esiakhanzikal'la okhubaputiswa?” [

³⁷Filipu namubool'la, “Onyala okhubaputiswa nosubiye nomwoyo kukwo kwosi” Naye nakalusia, “Subiye mbu Yesu Kristo no Mwana wa Nyasaye.”][4]

³⁸Ma omukhongo uyo nalaka mbu likari lisinjisibwe, nibekha bombi mumaatsi ne Filipu namubaputisa.

³⁹Olwa barula mumaatsi Omwoyo wo Mwami yahiniaho Filipu nakhamulukha, ne Omuetsopia uyo siyamulola khandi tawe; nebutswa yatsitsachil'la nende oluchendo lulwe niyetsuye nobusangali.

⁴⁰Filipu yalolekha nali Asotu, ma natsitsachil'la okhwola Kaisaria nakambanga Amang'ana Amalahi mu sielitaala.