Read lunyore EBIKHOLWA 9 Bible Online

EBIKHOLWA 9 - lunyore bible

EBIKHOLWA 9

¹Olwene yilwo Saulo yali natsitsachil'langa okhwekhana nende okhwira abalondi bo Mwami. Yatsia khu Mwesaalisi Omukhongo

²nasaba ahebwe etsibarwa okhutsia mutsisinakoki Damasiko mbu nanyala okhunyoola abasubili abasaatsa nohomba abakhasi abatile abaleere Yerusalemu.

³Nebutswa olwa yali khunjila nali ahembi okhwola Damasiko, nonoho obulafu obwarula mwikulu bwamwakhila tsimbeka tsiosi.

⁴Nakwa hasi ne nahul'la omwoyo nikumubool'langa “Saulo, Saulo! Busina ukhupianga esibi?”

⁵Naye naboola, “Niwe wina Omwami?” Ne omwoyo yikwo nikukalusia, “Ise nise Yesu owe ibe okhupianga esibi.

⁶Nebutswa sinjila winjile mwitookho ne nonyoolemwo esia wenyekhanga okhole.”

⁷Abandu abali khuluchendo nende Saulo basinjila butswa habwene yaho, nibakorwa elia banyala okhuboola; bahul'la omwoyo yikwo nebutswa sibalola omundu wosi tawe.

⁸Saulo yasinjila, ne olwa yafunula tsimoni tsitsie siyalola esindu siosi tawe; ma abandu yabo nibamufumila omukhono nibamutasia okhwola mwitookho lia Damasiko.

⁹Saulo siyali onyala okhulola khulwamatukhu kataru tawe, kata siyaliakhwo nohomba okhunywa esindu siosi tawe.

¹⁰Yaliho omukristo mulala Damasiko owalangwa Anania. Omwami yamubool'la mubusukhi, “Anania!” Naye nahuchila, “Ndi hano, Omwami.”

¹¹Omwami namubool'la, “Werechekhe ma otsie khunjila elangwangwa Injila Inunji, ne olwa nawole munyumba ya Yudasi orebe omundu mulala owa Tariso, olangwanga Saulo. Luno ali mwisaaya,

¹²ne uluutsi mubusukhi omundu olangungwa Anania niyenjila namurakhwo amakhono mbu atoole okhulola khandi.”

¹³Nebutswa Anania nakalusia, “Omwami ndahul'la oluyali lwomundu uyo okhurula khubandu abenji, nende amabi kosi aka yakhol'la abandu baabo abali Yerusalemu.

¹⁴Ne yayitsile hano nobunyali okhurula khubesaalisi abakhongo mbu abafumile bosi abasaayanga muliira lilio.”

¹⁵Nebutswa Omwami namubool'la, “Tsia butswa, okhuba mwel'le okhuurumikhila, okhuhila eliira lianje khubetsimbia tsindi nende abaami ma nende khubandu ba Isiraeli.

¹⁶Ise omwene namumanyie amenji aka nakamuhachie okhusandibwa khulwe eliira lianje.”

¹⁷Anania yamala natsia, niyenjila munyumba yatsana. Ma nara amakhonoke khu Saulo, naboola, “Omwana wefwe Saulo, Omwami, Yesu mwene owakhulolekheye khunjila yokhwitsa yino, urumile mbu otoole okhulola khandi ma witsule nende Omwoyo Omutsienukhu.”

¹⁸Habwene yaho ebindu biarula mumoni tsia Saulo singa amakamba, natoola okhulola khandi. Nasinjila nabaputiswa.

¹⁹Olwa yali namal'le okhulia ebiokhulia tsingufu nitsikalukha khuye. Saulo yamenya Damasiko amatukhu matu halala nende abechi.

²⁰Ma nachiaka okhukamba mutsisinakoki mbu Yesu no Mwana wa Nyasaye.

²¹Abandu bosi abamuhul'la bahuka, nibaboola, “Omundu uyu siali niye oweranga abandu abasaayanga muliira yili Yerusalemu? Khandi yetsa hano nali nelichoomo eliokhufumila abandu yabo abahile khubesaalisi abakhongo.”

²²Ne Saulo yatsitsachil'la okhukufuhala, amakamboke nikamanyia kololi mbu Yesu niye Masihi. Akene yako kasinya Abayahudi ba Damasiko okhusila.

²³Inyuma wamatukhu amenji Abayahudi balomba omuse nibaloosia singa nabere Saulo.

²⁴Nebutswa Saulo yahul'la akobuloosie bwabwe. Bekonekhanga mubilibwa biokhwinjila mwitookho om'basu nende obutukhu nibenya banyoole obweyangu bwokhumwira.

²⁵Nebutswa litukhu lindi abalondi ba Saulo bamubukula butukhu, nibamwichisisia muluhinga nibamureye musikapo.

²⁶Saulo yoola Yerusalemu, ne yateema okhuhambana nende abechi bandi. Nebutswa bosi bamuria, ne sibali abanyala okhusubila mbu naye khandi ukwiye omusubili tawe.

²⁷Ma Baranaba niyetsa nabukula Saulo namuhila khubarumwa, nabenoosia singa obwa Saulo yalola Omwami nali khunjila nende obwa Omwami yal'loma n'naye. Khandi yababool'la singa obwa Saulo yakamba nolutswoni muliira lia Yesu Damasiko.

²⁸Ma Saulo namenya n'nabo, nachenda mu Yerusalemu mwosi nakambanga ling'ana lia Nyasaye sila oburi.

²⁹Khandi yal'loma nahingana nende Abayahudi abal'lomanga Oluyunani, nebutswa nabo bateema okhumwira.

³⁰Olwa abasubili basie bahul'la akene yako, babukula Saulo, nibamuhila Kaisaria, nibalekha natsia Tariso.

³¹Likanisa mu Buyahudi mwosi, nende mu Galilaya nende mu Samaria liali nomulembe. Khulwa obukhonyi bwo Mwoyo Omutsienukhu liakufuhasibwa ma abasubili nibameetekha okhusila sichila bamenya mukhuria Omwami.

³²Olwa Petero yayeyema tsimbeka tsiosi yoola khubandu ba Nyasaye abamenyanga Luda.

³³Yanyoolayo omundu owalangwa Ainea owali niyakwa likara khulwemihika munane. Siyali onyala okhubukha khusitanda tawe.

³⁴Petero namubool'la, “Ainea, Yesu Kristo akhuhonianga. Sinjila wale esitanda sisio.” Ne habwene yaho Ainea yasinjila.

³⁵Abandu bosi abamenyanga Luda nende Sharoni bamulola, ma nibakalukha khu Mwami.

³⁶Yaliho omukhasi undi mwitookho lia Yopa owalangwa Tabitsa (elibetsanga mu Luyunani Tulukasi, esifune sialio ni Esitsusu). Omukhasi uyo yakholanga amalahi nakhonya abatakha khasotso.

³⁷Olwene yilwo yalwala ma nafwa. Abandu basaaba om'bilikwe, ma nibakura munyumba yekorofa.

³⁸Yopa sieli ehale okhurula Luda tawe, khe olwa bechi bahul'la mbu Petero ali Luda, baruma abandu babili khuye neling'ana mbu, “Mwatsa yitsa sila okhusisil'la.”

³⁹Kho Petero niyerechekha ma natsia n'nabo. Olwa yoolayo, bamuhila mukorofa munyumba tsana. Abakhasi abakhutsakhali abali nibalimwo babotokhana Petero nibalakaya ne nibam'manyia amakoti nende tsingubo etsia Tulukasi yanabanga nasili mwoyo.

⁴⁰Petero yabahinia esioba bosi, nasikama nasaaya. Ma nasukhana nahenga omufu, naboola, “Tabitsa, buukha.” Naye nafunula tsimonitsie, ne olwa yalola Petero yabukha niyekhala.

⁴¹Petero yamuha omukhonokwe, namukhonya okhusinjila, ma nalanga abasubili bosi nende abakhutsakhali, namuhana khubo nali omulamu.

⁴²Amang'ana yako kalanda habundu hosi mu Yopa ne abandu abenji nibasubila Omwami.

⁴³Petero yamenya Yopa amatukhu amenji munyumba yomusitsa wamaseelo owalangwa Simoni.