Read lunyore BAROMA 1 Bible Online

BAROMA 1 - lunyore bible

BAROMA 1

¹Okhurula khu Ise Paulo, omurumikhi wa Yesu Kristo, owa Nyasaye yalanga okhuba omurumwa, ma namwahula okhukamba Amang'ana Amalahi.

²Amang'ana Amalahi yaka kasubisibwa khale muno na Nyasaye okhubir'ra mubaroobibe singa kahandikwa mu Mahandiko Amatsienukhu.

³Amang'ana yaka kal'lomanga khu Mwana wa Nyasaye, Omwami wefwe Yesu Kristo. Okhulondokhana khukokhwibulwa khwe khwomubili yali es'soni sia Daudi;

⁴ne okhulondokhana no Mwoyo khukobutsienukhu bwe Nyasaye yamanyia mbu no Mwana uwe mubunyali obukhongo khulwa okhusimukusibwa okhurula mubafu.

⁵Okhubir'ra muye Nyasaye yambelesia esirenda okhuba omurumwa, kho mbe onyala okhwemel'la abandube okhusubila nende okhuba abahulili.

⁶Inywe abali Eburoma muli mubene yabo khandi abalangwa okhuba aba Yesu Kristo.

⁷Khe muhandichilanga inywe mwesi abali Roma, aba Nyasaye yayanza ma nabalanga okhuba abandu baabe omwene. Esirenda sibe khwinywe nemilembe echirulanga khu Nyasaye Papa wefwe no Mwami Yesu Kristo.

⁸Olwokhuranga, khupilanga Nyasaye wanje embwo mu Yesu Kristo khulwe inywe mwesi, sichila obusubili bwenywe buralikhanga habulafu musibala siosi.

⁹Nyasaye owandekayakayanga nomwoyo kwanje mukhukamba Amang'ana Amalahi ko Mwana uwe, nomukobokheli wanje mbu akamboolanga nakatooto. Ye wamanya singa mwitsul'langa inywe khasotso mumasaayo kanje sila okhuhonga.

¹⁰Saayanga mbu nikali akanyalikha mubulalilo bubwe obulahi yanyal'le okhwitsa okhumukonya.

¹¹Okhuba ndi namahofu okhumulola, mbu khukhonyane n'nenywe esihanwa esirulanga khu Mwoyo wa Nyasaye okhumukufuhasia.

¹²Eliamboolanga lili mbu, ise nende inywe khukhonyane, siomundu mubusubili bwowasie, obwenywe nende obwanje.

¹³Khandi abaana befwe nyenya mumanye mbu ndaloosia hali khenji okhwitsa khwinywe, nebutswa nzikaliywe okhukhola mbwo okhwola leelo. Nyenyanga okhwemel'la abandu okhulonda Yesu Kristo mwinywe singa obwa ndakhola mubetsimbia tsindi.

¹⁴Kafwananga mbu ndi owelikobi khu abalaba tsimoni nende abasili ebitutsi, khubasoma nende khubarasoma.

¹⁵Mbwo, nderechekhele okhukamba Amang'ana Amalahi khwinywe khandi abali Roma.

¹⁶Okhuba sindolanga es'simba murwe okhukamba Amang'ana Amalahi tawe; kabetsanga obunyali bwa Nyasaye okhuhonia yabo abasubilanga; khu Bayahudi mbelio, khandi khu Betsinzibulo tsindi.

¹⁷Amang'ana Amalahi kamanyianga obwa Nyasaye akholanga abandu okhuba abalunji khuye. Nakobusubili okhurula mukhuchiaka okhwola mukhumal'likha. Singa obwa Amahandiko Amatsienukhu kaboolanga, “Omulunji alamenya khulwo obusubili.”

¹⁸Lirima lia Nyasaye libisukhanga okhurula mwikulu khutsimbi tsiosi nende obubi bwabandu abekalilanga akatooto okhumanyikha khulwe tsinjila tsiabwe tsimbibibi.

¹⁹Nyasaye abahelesianga esinyasio sichila yako akabandu banyala okhumanya khuka Nyasaye kali butswa habulafu khubo. Nyasaye mwene wakakhola okhuba habulafu.

²⁰Okhurula Nyasaye nalomba esibala obunyali bubwe obweinziayo nende obunyasaye bubwe kata nibilolekha netsimoni, bilolekhanga mubindu ebia Nyasaye yalomba. Kho abandu yabo sibali neinjila yosi eya banyala okhwesol'la mwo tawe.

²¹Bamanya Nyasaye, nebutswa sibamuhelesianga oluyali lulwe tawe, kata okhukhupa embwo khuye tawe. Habula basiluhala mumakani kabwe ne emioyo chiabwe emisilu chiayitsula mwo esiilima.

²²Abene baboolanga nabachesi nebutswa nabahingwa.

²³Balekhanga okhwekayakaya Nyasaye weinziayo nibekayakaya likondo liomundu namundu ohwetsangaho, namanyonyi nende etsisolo tsiebilenje bine nende kata ebindu ebimoolanga.

²⁴Khulwe yako Nyasaye wabalekha okhukhola ebiesifwabwi ebiemioyo chiabwe chiekombanga, nokhukhola akes'simba murwe abene khubene.

²⁵Basukhanianga obwatooto bwa Nyasaye okhuba obubehi; bekayakayanga nibarumikhila esia Nyasaye yalomba okhuyomba Omulombi mwene oli owokhwitsooibwa inziayo, Amina.

²⁶Khulwa mbu bakholanga yaka, Nyasaye yabalekha mukhwonyonywa okhubi khwomumioyo chiabwe. Kata abakhasi babwe baheyanga nabakhasi basiabwe nibakhola akes'simba murwe akarenyekhanga tawe.

²⁷Abasaatsa nabo khandi balekha okhusanga nabakhasi nibenya okhukhola abasaatsa basiabwe okhuba abakhasi babwe. Abasaatsa bakholanga akes'simba murwe abene khubene, ma khulwako, beler'ranga esinyasio abene esikwan'ne obukholi bwabwe obubi.

²⁸Ne khulwa mbu abandu basuula okhupaala khumang'ana aka bakwana okhumanya singa akatooto khuka Nyasaye, yabalekha khumakani akakoyana ma bakholanga amang'ana kosi akabarakwan'ne okhukhola.

²⁹Bayitsulamwo akarali amalunji kosi, nobubi, nobulangu, nobusuku; bayitsula nokhusiendekha, nende obwiri nobusoolo, nobukaati, nes'sinyo nokhwikhal'lana,

³⁰bal'lomanga obubi abene khubene, nabanyekani, ababihil'lwanga Nyasaye, nabeinjinia, abomwekhonyo; abakulukunzi bamabi, abarahulilanga abebuli babwe;

³¹nabesifwabwi, abaralindanga abiesuho biabwe, ababula obuyanzi, ababula tsimbabasi.

³²Yaba bamanya obukhalachi bwa Nyasaye mbu abakholanga amang'ana yaka bakwana okhufwa. Ne sikali bakholanga akene yako konyene tawe, nebutswa bahuchilisananga nende yabo abakakholanga.