Read lunyore BAROMA 10 Bible Online

BAROMA 10 - lunyore bible

BAROMA 10

¹Abaana befwe okhwekomba khwomwoyo kwanje nende okhusaaya khwanje khu Nyasaye khuli mbu Abaisiraeli basianje bahonibwe.

²Nyala okhubakobokhela mbu bayehana kupu khu Nyasaye. Harali okhwehana khwabwe sikhurulanga khu bumanyilisi bwatooto tawe.

³Basili okhumanya singa obwa Nyasaye abalanga abandu okhuba abalunji khuye, nebutswa batemanga okhwesinjisia khubwabwe abene; kho sibahuchil'la okhwelela khunjila ya Nyasaye eyokhubala abandu okhuba abalunji tawe.

⁴Okhuba Kristo waleera Amalako khusihesi mbu siomundu wosi oli nende obusubili abalwanga okhuba omulunji khu Nyasaye.

⁵Kano niko aka Musa naye yahandika khumundu obalwanga okhuba omulunji khu Nyasaye khulwa okhufumila Amalako; “Omundu okholanga aka Amalako kaboolanga, alamenyela Amalako.”

⁶Nebutswa akokhubalwa okhuba Omulunji khu Nyasaye okhubir'ra mubusubili kaboolanga mbu: “Oraboola mumwoyo kukwo mbu, Niwina owakhapulukhe okhutsia mwikulu?” (akali okhuboola, okhwisia Kristo hasi.)

⁷Nohomba, kata oraboola, “Niwina oliikha musibala Emakombe?” (akali okhuboola okhuhinia Kristo okhurula mubafu.)

⁸Amahandiko Amatsienukhu kaboolanga mbu: “Amang'ana ka Nyasaye kali ahembi n'nawe, m'munwa kukwo khandi m'mwoyo kukwo” nalio neling'ana liokhusubila eliakhukambanga.

⁹Noba noboola nomunwa kukwo mbu Yesu no Mwami, khandi nosubila mumwoyo kukwo mbu Nyasaye yamusimukusia okhurula mubafu, olahonibwa.

¹⁰Okhuba omundu asubilanga nomwoyo ma abalwa okhuba omulunji khu Nyasaye; yeyamanga nomunwa ma ahonibwa.

¹¹Amahandiko kaboolanga mbu, “Omundu wosi nasubila muye siyakhasimbibwe omurwe tawe.”

¹²Ling'ana yili lili khu bosi, sichila obwabukhani sibuliho hakari ha Abayahudi nende Abetsimbia tsindi tawe; Nyasaye no Mwami wa bosi ne akasianga abamulakayila namakhono amasiro.

¹³Singa Amahandiko kaboolanga, “Omundu wosi olanganga khu Mwami mbu amukhonye alahonibwa.”

¹⁴Nebutswa bakhalanga khuye mbwena, nibaramusubila? Kata bakhasubila mbwena nibasili okhuhulila amang'ana kaake? Kata bakhahulila mbwena nibarakambiiywe amang'ana tsana?

¹⁵Khandi amang'ana tsana kakhakambwa mbwena abakambi mbararumilwe? Singa obwa Amahandiko kaboolanga, “Mako obwa khuli okhulahi okhwitsa khwe yabo abaleranga Amang'ana Amalahi!”

¹⁶Nebutswa bosi sibahuchil'la Amang'ana Amalahi tsana tawe. Okhuba Isaya yaboola mbu, “Omwami, niwina osubiye amang'ana kefwe?”

¹⁷Kho obusubili burulananga khukhuhulila Amang'ana Amalahi; ne amang'ana tsana ketsanga khulwa okhukamba Kristo.

¹⁸Nebutswa reebanga: Kali tooto mbu sibahulila amang'ana tsana tawe? Siahene bahulila, okhuba Amahandiko kaboolanga: “Liyoosi liomwoyo kwabwe liarula ndihul'likha musibala siosi, amang'ana kabwe koola khusihesi siesibala.”

¹⁹Ne khandi reebanga ko: Abandu ba Isiraeli sibamanyilisiakhwo tawe? Musa niye owokhuranga okhuboola: “Ndakhachile mube neimbalikha khuyabo barali oluyia. Ne khulwa oluyia oluhingwa ndimuhambia lileko.”

²⁰Naye Isaya yaboola nolutswoni mbu, “Ndali okhunyoolekha ne yabo abarali nibaranyenyanga tawe; ndabisukha khu yabo abarayireba khwo tawe.”

²¹Ne khu Isiraeli yaboola mbu, “Om'basu kwosi tulu ndanyila amakhono kanje okhwinjisia abesikala marwi nende abamahingane.”