Read lunyore BAROMA 11 Bible Online

BAROMA 11 - lunyore bible

BAROMA 11

¹Khe, reba ko; Nyasaye yasula abandu baabe bene noho? Kata tawe! Ise omwene ndi Omuisiraeli wolwibulo lwa Aburahamu, woluyia lwa Benjameni.

²Nyasaye siyasula abandu baabe abayali okhwela okhurula mukhuchiaka tawe. Mumanyile aka Amahandiko kaboolanga musiasia sia Elija aha yali okhwekan'na Nyasaye khulwa Baisiraeli:

³“Omwami, bayira abaroobi baabo, nibalikulula ebimalilo biemisango bibio; nise osikaye sienyene, ne batemanga banzire.”

⁴Ne likalusio sina elia Nyasaye yamuhelesia? “Ise omwene ndabisa abasatsa etsielefu tsine natsitaru abasili okhusikamila khwo nyasaye wobubehi olangwanga Baali tawe.”

⁵Nimbwo khandi kali na leelo: nabandu bati butswa abasikaye aba Nyasaye yeela khulwe sirenda sie.

⁶Okhweelakhwe khweletanga khusirendasie, tawe khukabandu bakhola. Nikakhabeye okhwela khwa Nyasaye khwakheleta khukabandu bakholanga esirenda sie sisiakhaba esirenda siatooto tawe.

⁷Kho mbwena? Abandu Baisiraeli sibanyoola esia bakhabanga tawe. Nomukanda butswa omutititi okwa Nyasaye yela abali okhunyoola; ne abandi bosi bekala amarwi khumulango kwa Nyasaye; nibatinyia emioyo chiabwe.

⁸Singa obwa Amahandiko kaboolanga, “Nyasaye yakhola amakani nende emioyo chiabwe okhuba emisilu; okhwola leelo sibali abanyala okhulola nohomba okhuhul'la tawe.”

⁹Khandi Daudi aboolanga, “Lekha batilwe nibarechelwe mumasabo kabwe; Lekha bakwe nende okhunyoola esinyasio.

¹⁰Tsimoni tsiabwe tsimwamibwe, kho babe abaranyala okhulola, ma obeenamie emikongo mumanyakhano kabwe amatukhu kosi.”

¹¹Kho, reebanga ko: Olwa Bayahudi besikar'ra, mbula bakwa ma nibakora? Kata nahati tawe! Khulwa mbu bali okhukhola tsimbi; obuhonia bwayitsa khu Betsimbia tsindi, kho Abayahudi babe neimbalikha khubo.

¹²Tsimbi tsia Bayahudi tsialeera tsikhabi tsiobuhinda khusibala, ne obutakha bwabwe bwomwoyo bwalera tsikhabi tsinyingi khu Betsinzibulo tsindi. Khe kali kololi obwinji bwabwe bwakhacheme tsikhabi tsinyinji.

¹³Luno mubool'langa inywe Abetsimbia tsindi: Oluhono olwe ise sili omurumwa khu Abetsimbia tsindi, nandeitsomie mumulimo kwanje.

¹⁴Haundi nanombe abandu boluyia lwanje okhuba abeimbalikha, ma mbe onyala okhuhonia khwo abalala.

¹⁵Okhuba okhusulwa khwabwe khwachila abomusibala nibakholwa abalina ba Nyasaye; kakhabe mbwena olwa bakhahuchil'lwe na Nyasaye? Kata abafu bakhasimukukhe.

¹⁶Nikakhaba esitonye siomukaati siokhuranga sihan'nwe khu Nyasaye, khe omuhayila kwosi nokukwe khandi; emisi chiomusaala nichiba nichihanwa khu Nyasaye khe tsisaka tsiakwo netsisaie khandi.

¹⁷Tsindala khutsisaka tsiomuseituni okwasimikhwa tsifunachilwe ma olusaka olwo omuseituni kwomubulimo lwonganibubwe khwo. Inywe abarali Abayahudi muli singa omuseituni kula okwomubulimo ma luno musanganga obulamu bwa Bayahudi obukufu obwo Mwoyo.

¹⁸Kho orachiaya yabo abafunakwa singa tsisaka tawe. Wakheitsomia mbwena? Ibe oli butswa olusaka sioli niwe ochinjile es'sina tawe, nebutswa es'sina sikhuchingile ibe.

¹⁹Nebutswa olaboola, “Yee, tsisaka tsiaremakwa okhundekhela obweyangu.”

²⁰Yako kali tooto. Bali okhuremakwa okhurulakhwo khulwo okhubula okhusubila, olwa nawe wasikala mubweyangu sichila ibe osubilanga, nebutswa oreitsoomichisia yako tawe, nebutswa orie.

²¹Nyasaye siyalekha Abayahudi abali singa tsisaka tsieimbikho; nawe opaalanga yakhakhulekhe?

²²Hano khulolanga singa Nyasaye ali owetsimbabasi ma khandi omululu. Nomululu khuyabo abamal'le okhukwa; nebutswa nowetsimbabasi khuibe noba notsitsachil'la mutsimbabasi tsitsie. Nebutswa noratsitsachil'la mutsimbabasi tsie, nawe khandi olakhalakwa okhurulaho.

²³Ne nikaba Abayahudi bakhachwanya okhubula okhuba nobusubili bwabwe bakhakalusibwe mubukono obwa balinjimwo; okhuba Nyasaye ali nobunyali okhukhola mbwo.

²⁴Inywe abarali Abayahudi mufwana singa olusaka lwomuseituni kwomubulimo olwafunakwa; ma okhwabukhana neimbikho yakwo, lwayonganibwa khumuseituni okwachilwa. Abayahudi bali singa omuseituni okwachilwa yiku; nebwakhabe obutoro okhusila khu Nyasaye okhwongania tsisaka tsiafunikha khumusaala kwatsio kwene khandi.

²⁵Abaana befwe liliyo libiso liatooto, elianyenyanga mumanye, okhuba nalimuhinie khukhwepaala obwa muli abachesi. Kali mbu obutinyu bwemioyo chiabandu Baisiraeli sibuli obwoluhono tawe, nebutswa bulatsitsachil'langa butswa okhwola okhuhesikha khwa Betsimbia okhwitsa khu Nyasaye khuba nikhwol'le.

²⁶Nembu nimbwo Abaisiraeli balihonibwa. Amahandiko kaboolanga, “Omuhonia alarula Sayuni; Alihinia obubi bwosi okhurula mubetsukhulu ba Yakobo.

²⁷Ndakhalombe indakano yanje n'nabo, olwa ndihinia tsimbi tsiabwe.”

²⁸Khulwa mbu basuula Amang'ana Amalahi, Abayahudi nabasuku ba Nyasaye, khulwe inywe Abetsimbia tsindi. Ne khulwa okhwela khwa Nyasaye, nabalina baabe khulwa abakuka babwe.

²⁹Okhuba Nyasaye siakalukhanianga amakanike khulwe uyo owa yelanga nende okhulamila tsikhabi tawe.

³⁰Singa khulwe inywe abetsimbia tsindi, mwekala amarwi khu Nyasaye, ne luno mwabeelwa tsimbabasi khulwa esikala marwi sia Abayahudi,

³¹Khandi munjila indelwa yiyo, khulwe tsimbabasi etsia mwanyoola, Abayahudi nabo bakholeye Nyasaye esikala marwi kho kachile nabo banyoole khwo tsikhabi tsia Nyasaye.

³²Nyasaye wakhola abandu bosi ababohe besikala marwi, kho abele bosi tsimbabasi.

³³Mako obwa buli obukhongo obuyinda bwa Nyasaye! Mako obwa buli obweikulu obuchesi nende obumanyilisi bwa Nyasaye! Niwina onyala okhwinoosia obukhalachibwe? Niwina onyala okhumanyilisia tsinjila tsitsie?

³⁴Singa obwa Amahandiko kaboolanga, “Niwina omanyile amakani ko Mwami? Niwina onyala okhumwibaal'la?

³⁵Kata niwina owamuhelesiakhwo esindu, kho mbu Nyasaye amurunge khandi?”

³⁶Okhuba niye owalonga ebindu biosi, khandi biosi bimenyanga okhubir'ra muye khandi khulwa ye. Nyasaye ahebwe obukhongo inziayo! Amina.