Read lunyore BAROMA 12 Bible Online

BAROMA 12 - lunyore bible

BAROMA 12

¹Kho abaana befwe, muhombanga khulwe tsimbabasi tsia Nyasaye tsingali khwifwe: Mwehaane abene singa omusango okuli mwoyo, omutsienukhu ma okuhuchil'lwanga khu Nyasaye khandi okumuyanzisianga. Yikhu nikhwo okhwekayakaya khwatooto okhwa mukwan'ne okhuhaana khu Nyasaye.

²Muralonda emiima chiesibala sino tawe, nebutswa mulekhe Nyasaye amukalukhanie muusi nobukalukhani bwemioyo chienywe echiamuhebwa. Kho mulamanya obulalilo bwa Nyasaye, akali amalahi akamuyanzisianga ma akali amahesikhu.

³Khandi sichila esirenda esia Nyasaye yambelesia ise, mbool'langa siomundu wosi oli mwinywe, orebala okhuba ikulu okhuyomba obwa okwan'ne okhuba tawe. Nebutswa, webale munjila yobuchesi, ne wechele omwene okhuhelana nesichelo siobusubili obwa Nyasaye yakhuhelesia.

⁴Khuli nende ebitonye ebinji mumubili mulala, ne ebitonye tsana bili nende emilimo echiabukhan'ne.

⁵Nefwe nimbwo khuli kata olwa khuli abenji. Khuli omubili mulala mu Kristo, ne fwesi khuhambanibwanga siamulala khuwasie singa ebitonye lukano lukano khumubili mulala.

⁶Kho khukwana okhurumikhila ebihanwa biefwe ebiabukhan'ne okhuhelana nesirenda esia Nyasaye yakhuha. Nisiba nisili esihanwa esiokhuboola amang'ana ka Nyasaye, khuboole okhuhelana nesichelo siobusubili bwefwe.

⁷Nisili esioburumikhi, khurekhwo omwoyo khuburumikhi bwefwe tsana. Nisili esiokhwibaala okhwola khwibaale.

⁸Nisili esiokhutinyilisia abandi, khukhole mbwo. Uyo ohaananga ahane namakhono amasiro; orukanga aruke nesinani; okholanga tsimbabasi akhole mbwo nobusangali.

⁹Obuyanzi bube sila obukalama. Musuule amabi; muhande khumalahi.

¹⁰Muyanzane abene khubene obuyanzi obuta singa abaana bomundu mulala, ma mube abesinani okhuhelesania oluyali.

¹¹Mutiye butinyu ne murabba abakara mukesinani tawe. Murumikhile Omwami nomwoyo okwitsuye obwehani.

¹²Okhunaya khwenywe khumukhole okhuba nobusangali, mwesimilisie mumanyakhano, mutiike mukhusaaya hali khase.

¹³Mukhonyanenje nabasubili basienywe abatakha khumiandu chienywe, nimwinjisia abacheni mutsingo tsienywe.

¹⁴Murebe Nyasaye okhulamila ikhabi yabo abamukhupianga esibi, ne muramureba okhulama esilamo siobubi tawe, nebutswa okhukasia butswa.

¹⁵Musangalenge nende yabo abasangalanga, mwekhuulenge nende yabo abekhuulanga.

¹⁶Mube nokhuhendela khulala abene khubene. Murabba abeloli tawe, nebutswa mukhwane nende emilimo echimondanga. Murepaala okhuba abachesi tawe.

¹⁷Omundu namukhol'la obubi, muramurunjia es'sialia tawe. Muteme okhukhola akali akolukoosi imbeli wabandu bosi.

¹⁸Mukhole akanyalikha khulubeka lwenywe, mumenye nende emilembe halala nabandu bosi.

¹⁹Muramala es'sialia inywe abene tawe, abayanzwa banje, nebutswa mulekhe lirima lia Nyasaye limale es'sialia. Okhuba Amahandiko kaboolanga, “Omwami yaboola mbu, ‘Okhumala es'sialia nokhwanje, nase ndikol'lania.’ ”

²⁰Nebutswa singa Amahandiko Amatsienukhu kaboolanga: “Omusuku uwo naba neinzala omuliisie naba nobuluho omunywesie; okhuba nokholanga mbwo, olamukhola asal'lukhe khulwe es'simba omurwe.”

²¹Muralekhe obubi bumuyembel'le tawe; nebutswa muleke obubi nende okhukhola amalahi.