Read lunyore BAROMA 13 Bible Online

BAROMA 13 - lunyore bible

BAROMA 13

¹Siomundu akwan'ne okhwelela khuburuchi bwelihanga; sichila bubulaho obunyali oburaarula khu Nyasaye, ne yabo aboburuchi babiikhwa ho na Nyasaye.

²Omundu oba nafukulanga oburuchi obuliho afukulanga aka Nyasaye yalaka; naye ofukulanga yekhalachilanga esiina omwene.

³Abaruchi sibaleranga oburi khubakholi bemilimo emilahi tawe, nebutswa abemilimo emibi. Wakhenya obule okhuria omuruchi? Okhole akali amalahi naye alakhwitsomia,

⁴sichila ye nomurumikhi wa Nyasaye khulwobulahi bubwo. Nebutswa nokhola amabi, khe omurie, sichila obunyali bubwe okhukhuhelesia esinyasio nobwatooto. Ye nomurumikili wa Nyasaye ne ahesianga oburima bwa Nyasaye khubakholi bamabi.

⁵Niko akachila khatimba mube nokhwelela khubaruchi sikali khulwe esinyasio sia Nyasaye sionyene, nebutswa khandi khukamakani kaako omwene.

⁶Niko khandi akachilanga ibe norunga obusuru, sichila abaruchi barumikhilanga Nyasaye olwa bahesinjia emilimo chiabwe.

⁷Rungenge bosi amakobi kabwe; obusuru khuye owobusuru lisanza khuye owelisanza, khandi mukoosie nimuhaana oluyali khubo bosi.

⁸Murabba nelikobi khumundu wosi tawe; nikarali okhuyanzana. Omundu oyanzanga owasie abetsanga uhesisie lilako.

⁹Amalako singa kano mbu: “Oraheya; oreera; oreeba; orekomba esindu esiowasio” yaka kosi nende akandi kosi kahelana nelilako elala mbu, “Oyanze owasio singa weyanzanga omwene.”

¹⁰Omundu oyanzanga owasie siamukholelanga obubi bwosi tawe. Kho okhuyanza nokhuhesia Amalako kosi.

¹¹Mukwan'ne okhukhola yaka sichila mumanyile mbu inyinga imwoleye eyokhubuukha okhurula mundoolo. Okhuba obuhoni buli ahembi n'nefwe okhuyomba olwa khwasubila olwokhuranga.

¹²Obutukhu buli ahembi okhuhwa, ne omubasu kuli ahembi. Chende khulekhe emilimo chiesiilima, khwebiikhe ebilasan'no ebiokhukhupana mubulafu.

¹³Khuchende habwene, singa abandu abamenyanga mubulafu, khulekhe obulangu nende obukholwi bwamalwa, khulekhe obuheyi nende obusambale, nohomba tsimemba nende isatsa.

¹⁴Nebutswa mwebiikhe ebilasan'no ebio Mwami Yesu Kristo, ne murahendela okhuhesia okhwonyonywa khwemibili chienywe tawe.