Read lunyore BAROMA 14 Bible Online

BAROMA 14 - lunyore bible

BAROMA 14

¹Ne uyo oli omutekhele mubusubili, mumwinjisie, nebutswa muramuhangasia mumapaalo kaake tawe.

²Mulala aliho oli nobusubili bwokhulia ebindu biosi, olwa omusubili undi omutendekhele alitsanga tsifwa tsionyene.

³Omundu oliitsanga ebindu biosi arachaaya oraliitsanga tawe; ne naye oraliitsanga oramukhalachila esiina oliitsanga tawe sichila Nyasaye wamuhuchil'la singa omundu uwe.

⁴Ibe niwe wina owehakanga okhukhalachila omurumikhi womundu undi? Kali khu mwami uwe okhukhalaka nikaba asinjilanga nohomba akwitsanga. Naye alasinjila, sichila Omwami anyala okhumusinjisia.

⁵Omundu mulala alolanga litukhu elala okhuba likhongo okhuyomba amatukhu kandi; olwa omundu undi alolanga amatukhu kosi okhuba amafwanani. Siomundu amanyilisie mumwoyo kukwe akalonda khwo.

⁶Omundu ololanga litukhu elala okhuyomba akandi kosi akholanga mbwo okhumuyanzisia Omwami; naye oliitsanga ebindu biosi aliitsanga okhufumia Omwami, sichila akhupilanga Nyasaye embwo khulwe ebindu biosi. Naye oraliitsanga afumianga Nyasaye namukhupila embwo.

⁷Abulaho mulala khwifwe omenyanga khububwe omwene, kata abulaho ofwitsanga khububwe omwene.

⁸Nikhuba nikhumenya khumenyanga khulwo Omwami. Nikhuba nikhufwa, khufwitsanga khulwo Omwami. Kho nikhuba nikhumenya nohomba nikhufwa, khuli abo Mwami.

⁹Okhuba Kristo yafwa ma nasimukukha mbu abe Omwami wa bosi, abafu nende abali mwoyo.

¹⁰Ne ibe nawe oliitsanga tsifwa tsionyene okhalachilanga omwana wenywe esiina busina? Nawe oliitsanga ebindu biosi, ochaayanga omwana wenywe busina? Ifwe fwesi khulisinjila imbeli wa Nyasaye okhukhalachilwa esiina.

¹¹Okhuba Amahandiko kaboolanga, “Omwami yaboola mbu, singa obwandi mwoyo; abandu bosi bakhasikame imbeli wanje ne abandu bosi balieyama mbu nise Nyasaye.”

¹²Kho nimbwo siomundu khwifwe yakhaboole khukaake kosi omwene imbeli Nyasaye.

¹³Khe omundu arakhalachila owasie khandi tawe. Ngarali okhusila muno khukhalake ling'ana yili mumioyo chiefwe mbu omundu aresirasia omwana wabwe, nohomba okhumukoka mutsimbi tawe.

¹⁴Obusanjilani bwanje mu Mwami Yesu bunombanga okhumanya kupu mbu sibulaho esiokhulia esili siesifwabwi khubuha bwasio tawe; nebutswa uyo abalanga esindu okhuba nesiesifwabwi, khuye sili esiesifwabwi.

¹⁵Noba nosalisianga omwana wenywe khulwa ebiliibwa bibio, kho sioba nokholanga akobuyanzi tawe. Oralekha ebiokhulia bibio bisalisie omwoyo kwomwana wenywe owa Kristo yafwila tawe.

¹⁶Muralekha akamubalanga singa amalahi okhuralwa obubi tawe.

¹⁷Okhuba Obwami bwa Nyasaye sibuli butswa okhulia nende okhunywa tawe, nebutswa nobwo bulunji nende omulembe nobusangali obwo Omwoyo Omutsienukhu ahaananga.

¹⁸Omundu oba narumikhilanga Kristo munjila yiyi, ayanzisianga Nyasaye nahuchil'lwa nabandu mbu nowahabwene.

¹⁹Kho chende khulondel'le yako akaleranga omulembe nende akokhwombokhana abene khubene.

²⁰Kho murononia omulimo kwa Nyasaye khulwe ebiokhulia tawe. Ebiliibwa biosi nebisiyikhu; nebutswa sibuli obulahi okhulia esindu esiokhwesirasia owasio tawe.

²¹Bwakhaba bulahi okhulekha okhulia inyama nohomba okhunywa ewaini, nohomba okhukhola ling'ana lindi liosi eliakhachila omwana wenywe niyesiraala.

²²Khe ibe handal'la khukosubilanga khwing'ana yili hakari uwo nende Nyasaye. Nowobusangali omundu uyo orekhalachilanga esiina olwa akholanga esindu esialolanga nesilahi.

²³Nebutswa uyo oli nokhwetsama, esiina simufwilanga naba nalitsanga, sichila uliiye sila obusubili, ne esindu nisiba nisirali esiobusubili khe nesietsimbi.