Read lunyore BAROMA 15 Bible Online

BAROMA 15 - lunyore bible

BAROMA 15

¹Ifwe abali abakufuhalu mubusubili kakhuhel'le okhukhonya abatekhele okhuchinga ebisiro biabwe. Sikhukwan'ne okhweyanzisia ifwe abene tawe.

²Nebutswa, khuyanzisie abaana befwe khukobulahi bwabwe abene khulwo okhubombokha mubusubili bwabwe.

³Okhuba Kristo siyali okhweyanzisia omwene tawe, nebutswa singa obwa Amahandiko kaboolanga, “Amanyeko aka bakhunyekanga ibe kangwiliye ise.”

⁴Siesindu siosi esiahandikwa mu Mahandiko Amatsienukhu siahandikwa khulwa okhwibaala, khe khube nokhunaaya okhubir'ra mu khwesimilisia nende obutinyilisibwi obwa Amahandiko Amatsienukhu kakhuhetsanga.

⁵Ne Nyasaye owobwesimilisi nende obutinyilisi burulanga khwo amunyal'le okhuba namapaalo amafwanani mwinywe abene mukhulonda esimanyilo sia Yesu Kristo.

⁶Ma inywe mwesi mube abokhwitsoomia nomwoyo mulala Nyasaye khandi Samwana Omwami wefwe Yesu Kristo.

⁷Siomundu ahuchil'le okhukhonyana nowasie singa Kristo yakhuhuchil'le khube abaabe. Mukhole mbu kho Nyasaye ahebwe obukhongo.

⁸Okhuba muboolanga mbu Kristo yetsa okhuba omurumikhi khu Bayahudi, okhumanyia mbu Nyasaye nomusubilwa. Khandi okhukhola amasubisio aka abakuka babwe bali nibasubisibwa okhuhesikha,

⁹nende okhunyal'la kata Abetsimbia tsindi okhufumia Nyasaye khulwe tsimbabasi tsitsie. Singa Amahandiko, kaboolanga, “Niko akachila ndakhakhwitsomia mu Betsinzibulo tsiosi; Ndakhembe tsinyembo tsiokhukhwitsomia.”

¹⁰Khandi kaboolanga, “Sangale inywe, Abetsimbia tsindi, halala nende abandu ba Nyasaye!”

¹¹Khandi mbu; “Mwitsoomie Omwami; inywe mwesi Abetsimbia tsindi; mumwitsoomie inywe, abandu bosi!”

¹²Khandi, Omuroobi Isaya aboolanga, “Omwitsukhulu wa Yese alibaho, yakhetse okhuruka Abetsimbia tsiosi, nabo bakhare okhunaaya khwabwe muye.”

¹³Nyasaye omwene obunayi amwitsusie nobusangali nende emilembe khulwa okhusubila khwenywe muye, khe okhunaya khwenywe khutsitsachil'le okhumetekha mubunyali bwo Mwoyo Omutsienukhu.

¹⁴Abaana befwe: Ise omwene ndehul'langa nimbuchil'la mbu mwitsuye nende obulahi, mbu mwitsuye nende okhumanya khwosi, khandi mbu munyala okhwechesania.

¹⁵Nebutswa mubarwa iyi ndi nolutswoni khumang'ana nalebe akamal'le okhumwitsusia. Ndi nolutswoni khulwo obweyangu obulahi obwa Nyasaye yambelesisie,

¹⁶obwokhuba omurumikhi wa Kristo Yesu, okhukhola omulimo khu Betsinzibulo tsindi. Rumikhanga singa omwesaalisi mukhukamba Amang'ana Amalahi okhurula khu Nyasaye, kho Abetsimbia tsindi babe omusango okuhuchiliywe khu Nyasaye, okhuhaanwa khuye no Mwoyo Omutsienukhu.

¹⁷Kho okhubir'ra mu Yesu Kristo, nyala okhweyitsomia khumilimo chianje echia khol'langa Nyasaye.

¹⁸Sindasimba omurwe okhul'loma butswa khumang'ana aka Kristo yakhola okhubir'ra mwise okhwemel'la Abetsimbia tsindi okhuhul'la Nyasaye. Yakhola yaka okhubir'ra mumang'ana nende mubikholwa,

¹⁹mubunyali bwa kamangalimwa nende akokhuchenya nende mubunyali bwo Omwoyo wa Nyasaye. Ma khe, mukhuchenda oluchendo okhurula Yerusalemu okhwola Iluriko ndamala okhukamba Amang'ana Amalahi ka Kristo mububambukhu.

²⁰Okhwenya khwanje khasotso khubetsanga okhukamba Amang'ana Amalahi siahabundu aha Kristo asili okhumanyikha khwo, mbu mbule okhwombokha khumusinji okwomundu undi yalomba.

²¹Singa obwa Amahandiko kaboolanga, “Yabo abarabool'lwakhwo akaake nabalole, khandi yabo abarahul'la, balamanyilisia.”

²²Kho ndekal'lwa hali akhenji okhwitsa khwinywe.

²³Nebutswa luno, sichila mal'le omulimo kwanje mutsimbeka tsino ne khulwa mbetsanga ninyenyanga khulwemihika eminji okhwitsa khwinywe,

²⁴nayanga okhukhola mbwo luno. Ndakhekombele okhumulolakhwo nindi khuluchendo lwanje okhutsia Esipania, nende okhukhonywa n'nenywe okhutsiayo nimal'le okhusangal'la okhuba halala n'nenywe muluhono lutititi.

²⁵Nebutswa luno kata mbwo nzitsanga Yerusalemu okhufulukhanila abandu ba Nyasaye.

²⁶Okhuba abandu ba Makedonia nende aba Akaya bali okhuyanza okhuhana esihanwa okhukhonya abatakha abali mubandu ba Nyasaye aba Yerusalemu.

²⁷Obukhalachi yibwo bwali obwabwe abene ne mukatooto bali okhubakhonya. Singa obwa Abayahudi basanga tsikhabi tsiesinamwoyo nende Abetsimbia tsindi, kho Abetsimbia tsindi bahel'le okhurumikhila tsikhabi tsiemiandu tsiabwe okhukhonya Abayahudi.

²⁸Nyinga ndakhaba nimal'le omulimo kuno ne nimbaheye amapesa kosi akabasolol'lwa, ndakharule okhutsia Esipania ma ndimukonya nimbiranga okhutsiayo.

²⁹Manyile mbu olwa ndakhetse khwinywe, ndiitsa nende tsikhabi tsinyingi etsia Kristo.

³⁰Ne luno musaayanga inywe, abaana befwe, khulwa Omwami wefwe Yesu Kristo, nende khulwa obuyanzi bwo Mwoyo Omutsienukhu ahaananga: hambane n'nase mukhusaaya khasotso khu Nyasaye khulwe ise.

³¹Musaaye mbu mbe onyala okhuba mumulembe okhurula mubandu abarasubilanga mu Buyahudi, khandi oburumikhi bwanje mu Yerusalemu bube obunyala okhuhuchil'lwa mubandu ba Nyasaye.

³²Ma kho ndakhetse khu inywe nobusangali obwinji, nikaba nikali nobulalilo bwa Nyasaye, nende okhusangal'la okhuba halala n'nenywe mwesi.

³³Nyasaye owomulembe kurulanga khwo abe n'nenywe mwesi. Amina.