Read lunyore BAROMA 16 Bible Online

BAROMA 16 - lunyore bible

BAROMA 16

¹Mbaananga khwinywe Foyebe omukhaana wefwe mu Mwami. Nomurumikhi welikanisa elili Kenikerea.

²Mumwinjisie mu Mwami, singa abandu ba Nyasaye bakwan'ne okhukhola, khandi mumukhonye mwing'ana liosi eliaba niyakhenya okhurula khwinywe; okhuba ye mwene nomukhonyel'li wabandu abenji kata khwise.

³Musiechisie Piliskila nende Akula abakholi bemilimo halala n'nase mu Yesu Kristo;

⁴abali okhwehaana kata okhufwa khulwe ise. Ne sindi ise sienyene obakhupilanga embwo tawe, nebutswa kata amakanisa kosi aka Betsimbia tsindi.

⁵Khandi musiechisie abasubili ababukan'nanga munzu yabwe. Siechisie Epainito, omulina wanje; owali omundu wokhuranga okhusubila khu Kristo mumbeka tsia Asia.

⁶Musiechisie Mariamu, owamufulukhanila inywe butinyu.

⁷Musiechisie Anduroniko na Yunia, Abayahudi basianje aba ndali okhubohwa n'nabo; bali ne ifuma indahi mubarumwa, khandi bali abasubili mu Kristo imbeli wanje.

⁸Musiechisie Ambiliato omulina wanje mu Mwami.

⁹Musiechisie Arubano omukholi womulimo halala n'nase mu Kristo, nende Sitaku, omulina wanje.

¹⁰Musiechisie Apele, owa obusubilwa bubwe mu Kristo bwahuchil'lwa. Mubasiesie abomunzu ya Arisitobulo.

¹¹Musiechisie Herodioni, Omuyahudi wasianje. Musiechisie abeinzu ya Narikiso, abali abasubili basiefwe mu Mwami.

¹²Musiechisie Turufena nende Turufosa, abakholanga omulimo kwo Mwami, nende Perusi omulina wanje, owali okhutitikhana muno mu Mwami.

¹³Musiechisie Rufusi omukholi omulahi okhusila mumulimwo kwo Mwami, nende nyina oumbukulanga ise okhuba singa omwana uwe.

¹⁴Musiechisie Asingirito, nende Felikona nende Herime, nende Paturoba nende Herima, nende abasubili basiefwe bosi mu Mwami ababetsanga n'nabo.

¹⁵Musiechisie Filoloko nende Yulia, na Nelea nende omukhaana wabwe, nende Olimba nende abandu ba Nyasaye bosi abali halala n'nabo.

¹⁶Musiesanie nende obuyanzi bwobuta. Abasubili bosi aba Kristo bamusiesisie.

¹⁷Luno musaayanga inywe, abaana befwe: mwelinde khu yabo abachilanga okhwabukhana nikhubaho, nibachila obusubili bwabandu nibwesikoka, abebaalanga lukano khubwibaali obwa mwamala okhweka; mwekwenye khu abafwana mbwo.

¹⁸Okhuba abandu abakholanga amang'ana yako sibarumikhilanga Kristo Omwami wefwe tawe, nebutswa barumikhilanga tsinda tsiabwe abene. Khulwo okhuboola khwabwe okhulahi nokhubehelesia mumang'ana kabwe bakaatanga emioyo chie yabo abarali nesikha.

¹⁹Abandu bosi bamal'le okhuhul'la akobusubilwa bwenywe khu Amang'ana Amalahi. Khulwe yako sangalanga khulwe inywe. Nyenyanga mubetsenge abachesi khuyako akali amalahi, ne murabba nesikha khu yako akali amabi tawe.

²⁰Nyasaye mwene emilembe alasasachila Setani hasi mubilenje bienywe bwangu. Esirenda sio Mwami wefwe Yesu Kristo sibe halala n'nenywe.

²¹Timoteo omukholi wemilimo halala n'nase umusiesisie; Lukio, Yasoni na Sospatro, Abayahudi basianje nabo khandi bamusiesisie.

²²Ise Teretio, omuhandichi wa Paulo webarwa yino, musiesianga mu Mwami.

²³Gayo, owamenyanga munzu mwe khandi owa basubili babukan'nanga munzu mwe umusiesisie. Erasto omubiikhi wa mapesa kelitaala lino, amusiesianga halala nende Kwarito, omusubili wasiefwe. [

²⁴Esirenda sio Mwami wefwe Yesu Kristo sibetsenje n'nenywe mwesi. Amina.][2]

²⁵Luno chende khuhe Nyasaye oluyali! Ye anyala okhumuralisia okhulondokhana na Mang'ana Amalahi akangambanga, amang'ana aka Yesu Kristo, khandi okhulondokhana nokhubisukha khwobwatooto okhwali nikhwebisila tsinzibulo tsia khale.

²⁶Ne luno kabisukha kol'lani okhubir'ra mumahandiko kabaroobi, khandi okhubir'ra mwilako lia Nyasaye weinziayo. Kamanyikha mutsimbia tsiosi mbu bosi basubile nibahul'la.

²⁷Khu Nyasaye oli Nyasaye yenyene, khandi oli nobuchesi bwosi yenyene obukhongo bube khuye inziayo mu Yesu Kristo! Amina.