Read lunyore BAROMA 3 Bible Online

BAROMA 3 - lunyore bible

BAROMA 3

¹Khe Abayahudi bayombela sina abandi? Kata es'sebo sisie sili nabukhala sina?

²Bayomba muno mutsinjila tsiosi! Eliokhuranga, mbu nibo aba Nyasaye yahelesia obulindi bwamang'ana kaake.

³Kakhaba mbwena abalala mubo nibakhabula obusubilwa? Kakhanyala okhwira obusubilwa bwa Nyasaye?

⁴Tseyi! Lekha Nyasaye abe omusubilwa, kata omundu wosi naba omubehi. Singa Amahandiko Amatsienukhu kaboolanga: “Ololekhe okhuba omulunji mumang'ana kaako; khandi olekenje esiina lwosi olwa okhalachilwa.”

⁵Nebutswa kakhaba mbwena obwononekhu bwefwe nibuba nibumanyianga obulunji bwa Nyasaye? Khuboole mbu Nyasaye abula obwatooto olwa akhulunjisianga? (Hano n'nomanga singa omundu namundu).

⁶Sikanyalikha tawe, ngaba ngali mbwo Nyasaye yakhanyala okhukhalachila mbwena esibala?

⁷Haundi wakhaboola, Nikaba okhubula obusubilwa khwanje khumanyianga Nyasaye nomusubilwa okhusila ma khulwako khumuhelesianga oluyali. Busina khalachilwanga okhuba omwoni?

⁸Kali singa okhuboola: “Khukhole obubi kho obulahi bwitse!” Nimbwo abalala bali okhukhusiemana nende okhukhuchiikha mbu khwibaalanga mbwo. Esiina sibafwila habwene!

⁹Kho khuboole sina? Ifwe Abayahudi khuli nol'lahi okhuyomba Abetsimbia tsindi? Kata nahati tawe! Ise ndaseya okhumanyia mbu Abayahudi nende Abetsimbia tsindi bosi bali mubunyali bwetsimbi.

¹⁰Singa obwa Amahandiko Amatsienukhu kaboolanga, “Saliho omulunji kata mulala tawe.

¹¹Abulaho omanyilisianga; abulaho omurunanga Nyasaye.

¹²Bosi bayebera okhurula khu Nyasaye bosi halala batsia bubi; abulaho okholanga amalahi kata mulala tawe.

¹³Amang'ana kabwe kayitsula mwo obubehi bwolufu, okhukaata okhubi khurulanga khutsinimi tsiabwe, ne ebirisio ebilulu singa obusungu bwe tsinzokha birulanga muminwa chiabwe.

¹⁴Eminwa chiabwe chiayitsula mwo ebilamo biobululu.

¹⁵Ebilenje biabwe nebiangu biokhusalisia nende okhwira;

¹⁶balekhanga om'booko nende obwonekhu hosi aha batsitsanga.

¹⁷Sibamanyile injila yomulembe tawe,

¹⁸kata sibayeka okhuria Nyasaye tawe.”

¹⁹Ne khumanyile mbu amang'ana kosi ka Malako, kal'lomanga khu yabo abali hasi wa Malako mbu bang'ang'ale ma esibala siosi silerwe hasi hobukhalachi bwa Nyasaye.

²⁰Abulaho omundu wosi obalwanga okhuba omulunji imbeli wa Nyasaye khulwe emilimo chia Malako tawe. Amalako kakholanga omundu okhumanya mbu nowetsimbi.

²¹Nebutswa injila ya Nyasaye eyokhubala abandu abalunji yabisulwa sila Amalako. Amalako nende amang'ana kabaroobi kakobokhelanga obuloli khu kene yako.

²²Obulunji bwa Nyasaye bunyoolekhanga munjila yokhusubila mu Yesu Kristo. Nyasaye akholanga mbwo khubene yabo bosi abasubilanga mu Kristo, sichila sibuliho obwabukhani tawe:

²³okhuba abandu bosi bakhola tsimbi ma baleema okhwola khubukhongo oburulanga khu Nyasaye.

²⁴Nebutswa khulwe esihanwa siesirenda sia Nyasaye, abandu bosi babalwanga okhuba abalunji okhubir'ra mu Yesu Kristo oubakholanga okhuba abalakhule.

²⁵Nyasaye yahaana Yesu mbu khulwa amatsahi kaake abe injila eyokhulekhelwa khwetsimbi tsiabandu khulwo okhusubila muye. Yakhola yaka kho amanyie obulunji bubwe. Khale yali omwesimilisi narahenga khu ketsimbi tsiabandu tawe,

²⁶nebutswa mumatukhu kano ahenjelesianga tsimbi tsiabandu mbu amanyie obulunji bubwe. Munjila yiyi Nyasaye amanyianga mbu ye omwene nomulunji khandi niye okholanga abandu abasubilanga mu Yesu okhuba abulunji.

²⁷Sili hena esiomundu anyala okhweyitsomichisia khwo? Sibulaho! Khulwa sina? Siyakhanyala okhweyitsomia khulwo okhulonda Amalako ma khulwa ko wakholwa okhuba omulunji khu Nyasaye? Tawe; nebutswa khulwa mbu khwasubila.

²⁸Okhuba omundu akholwanga okhuba omulunji khu Nyasaye khulwo obusubili, akarali khubikhole bia Malako tawe.

²⁹Nohomba kakhaba Nyasaye ni Nyasaye wa Bayahudi bonyene? Siali niye khandi Nyasaye wa Betsimbia tsiosi? Yee, ni Nyasaye owa Betsinzibulo tsindi khandi.

³⁰Nyasaye ni mulala, naye alanga Abayahudi okhuba abalunji khuye khulwa obusubili khandi Abetsimbia tsindi nabo mbwo munjila yobusubili.

³¹Khe khwiranga Amalako khulwo obusubili nohomba? Kata nahati tawe; nebutswa khutinyilisianga Amalako.