Read lunyore BAROMA 4 Bible Online

BAROMA 4 - lunyore bible

BAROMA 4

¹Khe khuboola sina khu Aburahamu, kuka wefwe?

²Aburahamu naba niyabal'lwa obulunji khulwe emilimo echia yakhola aba nali nende esiokhweyitsomichisia. Nebutswa sianyala okhweyitsomia imbeli wa Nyasaye tawe.

³Amahandiko Amatsienukhu kaboolanga, “Aburahamu yasubila Nyasaye, ne khulwo obusubili bubwe, Nyasaye yamuhuchil'la okhuba omulunji.”

⁴Omundu okholanga emilimo anyoolanga omurungo kukwe ne sikubalwanga okhuba kwesihanwa tawe, habula nokwelikobi.

⁵Ne khumundu oreletanga khubikhole bibie, nebutswa asubilanga Nyasaye obeelanga yabo abarali abalunji, obusubili bubwe nibwo obwa Nyasaye abalanga okhumukhola okhuba omulunji.

⁶Daudi naye aboolanga yaka khubusangali bwomundu uyo owa Nyasaye abalanga okhuba omulunji akarali khulwe emilimo tawe:

⁷“Nabeikhabi aba Nyasaye yalekhela obubi bwabwe. Obwoni bwabwe bwalekhelwa!

⁸Noweikhabi omundu uyo owo Mwami aretsul'langa obwonibwe tawe!”

⁹Mbula obusangali yibu obwa Daudi yal'loma khwo nobwe yabo abasebwa bonyene noho? Tawe, nobweyabo abarasebwa khandi. Okhuba khumal'le khusoma mumahandiko mbu, “Aburahamu yasubila ma Nyasaye namubala okhuba omulunji khulwo obusubili bwe.”

¹⁰Khe Aburahamu yabalwa mbwena? Olwa yali niyasebwa, nohomba olwa yali nasili okhusebwa? Kekhola olwa yali nasili okhusebwa.

¹¹Aburahamu yasebwa olunyuma, ne es'sebo sie siali esimanyilo okhumanyia mbu khulwo obusubili bwe, Nyasaye yali okhumuhuchil'la okhuba omulunji olwa yali nasili okhusebwa. Khulwe yako Aburahamu nisamwana yabo bosi abasubilanga khu Nyasaye ma ababalwa okhuba abalunji kata nibasili okhusebwa.

¹²Khandi niye kukanyene yabo abasebwa, ne sibali nes'sebo sionyene tawe, nebutswa abachendanga mumakulu kobusubili obwa kuka wefwe Aburahamu; obwa yali n'nabwo olwa yali nasili okhusebwa.

¹³Olwa Nyasaye yasubisia Aburahamu nende olwibulolwe okhulamilwa esibala siyamusubisia munjila ya Malako tawe, habula munjila yobulunji okhurula khubusubili.

¹⁴Okhuba nikakhaba mbu obulame yibwo buli khu yabo abaritsanga Amalako, kho obusubili buba niburali esindu, ne lisubisio lia Nyasaye liba ndili butswa!

¹⁵Amalako kaleranga oburima bwa Nyasaye, ne aha Malako karali okhufunaka Amalako sikhuliho tawe.

¹⁶Nyasaye yahana lisubisio khulwa obusubili, kachile mbu lisubisio lia Nyasaye liralisibwe singa esirenda sia Nyasaye khubolwibulo lwa Aburahamu bosi. Ne sikali khuyabo abalondanga Amalako bonyene tawe, habula nende khuyabo abasubilanga singa Aburahamu. Okhuba Aburahamu ni papa wefwe fwesi.

¹⁷Singa Amahandiko kaboolanga: “Mal'le okhukhola ibe okhuba samwana abetsimbia tsinyinji.” Kho lisubisio yilio nelilahi imbeli wa Nyasaye owa Aburahamu yasubila osimukusianga abafu ne khulwe Lilako lilie alakanga ebindu ebiralinjiho okhubaho.

¹⁸Aburahamu yasubila ma nanaya kata esiokhunaya nisibula, ma naba papa nyenetsimbia tsinyingi singa butswa Amahandiko kaboolanga, “Olwibulo lulwo lwakhabe olwinji singa tsinyininyini.”

¹⁹Siyatendeya mubusubili bubwe tawe kata olwa yakanakana khumubili kukwe singa kwafwa olwa yali nahela emihika emia ndala kata nohomba okhukanakana khubukumba bwa Sara tawe.

²⁰Aburahamu siyali nende honzoni khulisubisio lia Nyasaye khulwa okhubula obusubili tawe; obusubili bubwe bwamukufuhasia ma nahelesia Nyasaye obukhongo.

²¹Yamanyilisia siahene mbu aka Nyasaye yamusubisia anyala okhukakhola.

²²Niko akachila Nyasaye nahuchil'la Aburahamu mubusubili bubwe okhuba omulunji.

²³Olwa kaboolwanga, “Nyasaye yamuhuchil'la,” sikaboolanga khuye yenyene tawe.

²⁴Kahandikwa khandi khu ifwe abasubilanga khu Nyasaye owasimukusia Yesu, Omwami wefwe okhurula mubafu.

²⁵Yahaanwa mbu yerwe khulwe tsimbi tsiefwe nasimukusibwa mbu khubalwe okhuba abalunji khu Nyasaye.