Read lunyore BAROMA 5 Bible Online

BAROMA 5 - lunyore bible

BAROMA 5

¹Olwa khumal'le okhubalwa okhuba abalunji khu Nyasaye khulwo obusubili, khuli nende omulembe khuye okhubir'ra mu Mwami wefwe Yesu Kristo.

²Khulwo obusubili bwefwe mu Kristo ye wamala okhukhuleera musirenda sia Nyasaye esia khumenyelemwo. Kho khusangalanga mubunaayi yibwo obwokhusanga mubukhongo bwa Nyasaye.

³Ne sikali akene yaka konyene tawe; habula khandi khusangalanga kata mukhusalila khwefwe, sichila khwamanya mbu eminyakhano chileeranga okhwetinyilisia,

⁴ne okhwetinyilisia khuleranga oburalilu, ne oburalilu buleranga okhunaya.

⁵Okhunaya sikhuchila khwesikoke tawe; sichila Nyasaye wamala okhutsukha obuyanzi bubwe mumioyo chiefwe khulwo Mwoyo Omutsienukhu ouli esihanwa sia Nyasaye khwifwe.

⁶Olwa khwali nikhusili abaranyala, Kristo yafwila ababi munyinga ya Nyasaye injomekhe.

⁷Nobutinyu omundu okhufwila oundi, kata oba nali omulunji. Haundi yetsukhila nabaho omundu owakhufwila oba nali omulahi.

⁸Nebutswa Nyasaye yakhumanyia obwa yakhuyanza okhusila mbu olwa khwali nikhuli aboni Kristo yakhufwila.

⁹Khulwo okhufwa khwa Kristo, khubalwanga okhuba abalunji khu Nyasaye, kho kali kololi mbu alakhuhonia khwirima lia Nyasaye.

¹⁰Khwali abasuku ba Nyasaye ma nakhukhola abalina baabe okhubir'ra mukhufwa khwo Mwana uwe. Ne olwa khuli abalina ba Nyasaye, kali kololi mbu khulahonibwa khulwo okhuba mwoyo khwa Kristo.

¹¹Ne sikali yako konyene tawe; habula khusangalanga mu Nyasaye khulwo Omwami wefwe Yesu Kristo omal'le okhukhukhola abalina ba Nyasaye.

¹²Tsimbi tsienjila musibala okhubir'ra mumundu mulala, ma okhufwa nikhwitsa khulwe tsimbi tsitsie. Niko akachila olufu nilulanda khubandu bosi, okhuba abandu bosi bayona.

¹³Tsimbi tsialinjiho musibala Amalako nikasili okhuhanwa; nebutswa aha Amalako karali tsimbi sitsibalwanga khubandu tawe.

¹⁴Ne kata nikali mbwo olufu lwali okhwamiha okhurula khu Adamu okhwola khu Musa, kata ne khuyabo abaraali okhukhola tsimbi singa obwa Adamu yakhola olwa yafunaka Lilako lia Nyasaye. Adamu naye niye esifwanani esie uyo owali nayetse.

¹⁵Nebutswa esihanwa esia Nyasaye yakhuhelesia sisili singa tsimbi tsia Adamu tawe. Kali kololi mbu tsimbi tsiomundu mulala, tsialeera okhufwa khubandu bosi. Nebutswa khulwa esirenda siomundu mulala, naye niye Yesu Kristo, Nyasaye wayinjihia esirenda khubandu bosi nende esihanwa sisie.

¹⁶Ne esihanwa siokhuhanwa butswa yisio siabukhan'ne netsimbi tsiomundu mulala yakhola. Khulwe tsimbi tsiomundu mulala, esiina siafwila abandu bosi, nebutswa khulwokhwona khwabandu abenji Nyasaye yabahelesia esihanwa sisie siokhubalwa okhuba abalunji.

¹⁷Nitooto mbu, khulwe tsimbi tsiomundu mulala okhufwa khwachiaka okhwamiha mubandu bosi khulwa omundu mulala uyo. Nebutswa, kali kololi okhusila mbu akomundu mulala, Yesu Kristo yakhola namalahi okhusila. Bosi abanyoolanga esirenda yisio nibakholwa abalunji nibo abakhamihe mubulamu okhubir'ra mumundu mulala uyo naye niye Yesu Kristo.

¹⁸Khe olwetsimbi tsiomundu mulala tsiachemela esiina okhufwila abandu bosi, nimbwo esikhole silala esiobulunji sihelesianga abandu bosi obulakhuule nende obulamu.

¹⁹Khandi singa abenji bakwa aboni khulwa esikala marwi siomundu mulala, nimbwo abenji bakhakholwe okhukwa abalunji khulwa obuhulili bwomundu mulala.

²⁰Amalako kenjila ma nikachila tsimbi nitsisilana; nebutswa ahetsimbi tsisilan'ne esirenda sisilanangaho okhusila.

²¹Khe singa tsimbi tsiamiha khulwolufu, nimbwo khandi esirenda sia Nyasaye siamihanga khulwo obulunji obuleeranga obulamu bweinziayo okhubir'ra mu Yesu Kristo Omwami wefwe.