Read lunyore BAROMA 6 Bible Online

BAROMA 6 - lunyore bible

BAROMA 6

¹Khe khuboole sina? Nakhutsitachil'le okhumenya mutsimbi kho esirenda sia Nyasaye sisilane?

²Kata nahati tawe. Ifwe abafwa khutsimbi khwakhamenya mbwena mutsio khandi?

³Okhuba tooto mumanyile yaka: Olwa khwali okhubaputiswa mu Yesu Kristo khwabaputiswa okhwinjisibwa mukhufwa khukhwe.

⁴Kho mukhubaputiswa khwefwe khwayabilwa halala n'naye nikhusanga mukhufwa khukhwe mbu obwa Kristo yasimukusibwa okhurula mukhufwa, khulwa obunyali obwobukhongo bwa Papa, nefwe khandi khube abanyala okhumenya obulamu obuyia.

⁵Okhuba ifwe nikhuba nikhwahambanibwa n'naye mukhufwa khukhwe, nimbwo khandi khulihambanibwa n'naye mukhusimukhukha khukhwe okhurula mubafu.

⁶Khandi khumanyile mbu ifwo yefwe yakhale yabambwa halala na Kristo khumusalapa kukwe, kho mbu tsingufu tsiomubili kwetsimbi tsiononibwe ma tsimbi tsibule okhukhwamiha khandi tawe.

⁷Okhuba olwomundu afwitsanga akholwanga okhuba omulakhule okhurula mubunyali bwetsimbi.

⁸Khulwa mbu khwali okhufwa halala nende Kristo, khusubilanga mbu khandi khuliba mwoyo halala n'naye.

⁹Okhuba khumanyile mbu Kristo wamala okhusimukusibwa okhurula mukhufwa, ma sialifwa khandi tawe; olufu siluli nobunyali khuye khandi tawe.

¹⁰Ne kho khulwa mbu yafwa, tsimbi sitsili nobunyali khuye tawe, ne luno ali mwoyo mubuhambani na Nyasaye.

¹¹Nimbwo nenywe khatimba mwelole singa abafu khutsimbi, nebutswa abalamu mubuhambani na Nyasaye okhubir'ra mu Yesu Kristo.

¹²Tsimbi tsiramiha khandi mumibili chienywe echifwitsanga, ma kachile mulonde okhwekomba khwachio tawe.

¹³Kata murahana esitonye silala siemibili chienywe khutsimbi okhurumikhilwa okhukhola obubi tawe. Nebutswa mwehane khu Nyasaye, singa yabo abasimukusibwa okhurula mubafu okhutsia mubulamu nimwehana kupu khu Nyasaye okhurumikhilwa khulwa obulunji.

¹⁴Tsimbi tsiramiha khu inywe, sichila simuli hasi wa Malako, habula muli hasi wesirenda sia Nyasaye.

¹⁵Kho nisina? Khukhole tsimbi, sichila sikhuli hasi wa Malako, habula hasi wesirenda sia Nyasaye? Tseyi!

¹⁶Mumanyile siahene mbu olwa mwehananga abene singa abasumba abokhuhulila omundu nalebe, kho muli abasumba bomundu tsana; abetsimbi etsileranga olufu, nohomba abokhuhulila okhuleranga obulunji.

¹⁷Nebutswa Nyasaye aboolelwe embwo! Okhuba olwa mwali nimusili abasumba betsimbi, mwahulila nomwoyo kwosi akatooto akanyoolekhanga mumebaalo aka mwanyoola.

¹⁸Mwakholwa abalakhule okhurula khutsimbi, nimukwa abasumba bobulunji.

¹⁹N'nomanga singa omundu namundu khulwa obutofu bwenywe. Singa obwa mwahana ebitonye biemibili chienywe okhurumikhilwa khukesifwabwi nende akobutamanu bwosi, nimbwo khandi mukwana okhwehana kupu singa abasumba bobulunji khulwo obuha obutsienukhu.

²⁰Olwa mwalinji abasumba betsimbi, mwali abalakhule okhurula khu bulunji.

²¹Olwene yilwo mwali nabukhala sina mumang'ana akachilanga nimusimba emirwe luno? Okhuba esihesi siako nokhufwa.

²²Nebutswa luno mwabohololwa okhurula khutsimbi, ma muli abasumba ba Nyasaye. Obukhala bwenywe nobulamu obwahanwa khuye, ne esihesi siabwo nobulamu oburahwaho tawe.

²³Okhuba omurungo kwetsimbi nolufu, nebutswa esihanwa sia Nyasaye nobulamu oburahwa mu Yesu Kristo Omwami wefwe.