Read lunyore BAROMA 7 Bible Online

BAROMA 7 - lunyore bible

BAROMA 7

¹Siahene mulamanyilisia akanyenyanga okhuboola abaana befwe sichila inywe mwesi mwamanya kosi akalondokhananga nende Amalako. Amalako kamihanga omundu olwa asili mwoyo.

²Okhuba omukhasi oli nende omusaatsa, Amalako kamubohanga khumusatsa uwe olwaba nasili mwoyo. Ne omusaatsa uwe naba nafwa, khe omukhasi uyo nomulakhule okhurula khu Malako akalinji okhumuboha khumusaatsa uwe.

³Khe luno, omukhasi naba natesibwa nende omusaatsa undi, ne omusaatsa uwe nasili mwoyo, alangwanga omuheyi. Nebutswa omusaatsa naba nafwa, omukhasi uwe nomulakhule khu Malako, ma mbwo siakholanga obuheyi tawe, kata omusaatsa undi naba namutesia.

⁴Nimbwo khandi kali khwinywe abaana befwe. Okhulondokhana singa obwa Amalako kali inywe mwali okhufwa sichila muli esitonye siomubili kwa Kristo; ma luno muli abaabe omwene uyo owasimukusibwa okhurula mubafu khe khube abanyala okhumenya obulamu obulimwo obukhala mukhurumikhila Nyasaye.

⁵Olwa khwamenyanga okhulondokhana khuliba liefwe liomubili, okhwekomba khwetsimbi okhwali okhuchemwa na Malako khwali nikhukholanga emilimo m'mibili chiefwe, ma kosi aka khwakhola kakhuler'ra olufu.

⁶Luno kata mbwo khuli abalakhuule okhurula khu Malako, sichila khwali okhufwa khuyako akali nikakhukhola okhuba ababohe. Kho oburumikhi bwefwe sibulondanga injila yakhale eya Malako akahandikwa tawe; habula bulondanga injila imbia eyo Mwoyo.

⁷Khe khuboole mbwena? Mbu, Amalako kene netsimbi noho? Kata hati tawe! Amalako niko akachila nimanya mbu tsimbi ni sina. Amalako kalabula okhuboola, “Orakhaaywa esindu siomundu undi tawe,” sindakhamanyile okhukhaaywa yikhwo tawe.

⁸Nebutswa khulwa okhurumikhila Amalako tsimbi tsianyoola obweyangu bwatsio okhuchema sieimbila yosi eyesikhayilwe mu ise. Okhuba sila Amalako tsimbi nesindu siafwa.

⁹Ise mwene olundi ndali omulamu sila Amalako, nebutswa olwene yilwo olwa Amalako ketsa, tsimbi tsiasimukukha,

¹⁰ne nase nifwa. Amalako yako kachoomwa okhuleera obulamu, elubeka wanje kaleera olufu.

¹¹Tsimbi olwa tsianyoola obweyangu, khulwe lilako, tsiangaata, ma nitsinzira.

¹²Khulwe yako Amalako kene namatsienukhu, khandi omuse nomutsienukhu, nomulunji, khandi nomulahi.

¹³Kho yaka kamanyianga mbu akali amalahi kalera olufu lwanje noho? Kata nahati tawe. Tsimbi nitsio etsiander'ra okhufwa. Khulwa okhurumikhila akali amalahi, tsimbi tsiander'ra okhufwa kho liiba liatsio liatooto libisukhe. Khandi Amalako kamanyianga obwetsimbi tsili tsimbibibi okhusila.

¹⁴Khumanyile Amalako nakomwoyo, nebutswa nase ndi omundu ofwitsanga, ma ndakusibwa singa omusumba wetsimbi.

¹⁵Ne akakholanga simanyilisianga tawe, okhuba sikholanga akangwan'ne okhukhola tawe, nebutswa akarenyanga okhukhola niko akakholanga.

¹⁶Ne khulwa akakholanga niko akarenya okhukhola tawe, yaka kamanyianga mbu mbuchil'langa Amalako namalahi.

¹⁷Kho sindi butswa nise okholanga yaka tawe, habula netsimbi etsimenyanga mwise.

¹⁸Manyile mbu obulahi sibumenyanga mwise tawe. Kata ninyenya okhukhola Amalahi sindi onyala okhukakhola tawe.

¹⁹Amalahi akanyenya okhukhola sikali niko akakholanga tawe, nebutswa obubi obwa renyanga nibwo obwakholanga.

²⁰Nikaba kholanga akarenyanga okhukhola, yaka kamanyianga mbu sindi khubwanje okholanga tawe, habula netsimbi etsimenyanga mwise.

²¹Kho ndutsi mbu lilako yili likholanga emilimo: olwa nyenyanga okhukhola amalahi, ne nyoola mbu elili libi nilio elianzahulanga.

²²Musi womwoyo kwanje sangal'langa lilako lia Nyasaye.

²³Ndolanga lilako eliabukhan'ne nilitiya mumubili kwanje. Lilako elihingananga nende lilako elia amakani kanje kahuchil'langa. Likholanga omubohe khwilako lietsimbi etsirukanga mumubili kwanje.

²⁴Arebane ko ise! Niwina olimbinia mumubili kwolufu yiku?

²⁵Mboolanga embwo khu Nyasaye okholanga yaka khulwa Yesu Kristo Omwami wefwe. Khe ise khubwanje rumikhilanga lilako lia Nyasaye, namakani kanje konyene nebutswa musinamundu sianje kholanga ake lilako lietsimbi.