Read lunyore BAROMA 8 Bible Online

BAROMA 8 - lunyore bible

BAROMA 8

¹Kho luno esiina sisinyala okhufwila yabo abali mu Yesu Kristo tawe.

²Okhuba Amalako ko Mwoyo akaleranga obulamu mu Yesu Kristo kaimboholola okhurula khu Malako ketsimbi nende olufu.

³Akaranyalikha khwilako, sichila omubili kwali nikwatofula, Nyasaye yakakhola. Nyasaye yaruma Omwana uwe mwene mukhufwana khwomubili kwetsimbi, mbu abe omusango kwetsimbi nakhalaka esiina okhumala tsimbi.

⁴Nyasaye yakhola mbwo mbu akobulunji akenyekha na Malako kahesibwe mwifwe abaramenyanga mubunyali bwomubili, nebutswa mubunyali bwo Mwoyo.

⁵Okhuba abamenyanga okhulondokhana nende amakani komubili, bemel'lwanga namapaalo komubili. Nebutswa abamenyanga okhulondokhana no Mwoyo bemel'lwanga namapaalo akalerwangwa no Mwoyo.

⁶Okhwemel'lwa namakani komubili khuleranga olufu, nebutswa okhwemel'lwa namakani ko Mwoyo khuleranga obulamu nende emilembe.

⁷Omundu owemel'lwanga namakani komubili nomusuku wa Nyasaye; siyelelanga khwilako lia Nyasaye, kata sianyala okhulikhola tawe.

⁸Abandu abelelanga khumakani komubili sibanyala okhuyanzisia Nyasaye tawe.

⁹Nebutswa inywe simwemel'lwanga nomubili tawe, habula mwemel'lwanga no Mwoyo, nikaba mbu Omwoyo wa Nyasaye amenyanga mwinywe. Omundu orali no Mwoyo wa Kristo, omwene uyo siali ouwe tawe.

¹⁰Kristo naba namenyanga mwinywe, kata ngaba mbu emibili chienywe chilafwa khulwe tsimbi, emioyo chienywe chilaba mwoyo sichila mwakholwa okhuba abalunji khu Nyasaye.

¹¹Omwoyo wa Nyasaye owasimukusia Yesu okhurula mubafu naba namenyanga mwinywe, kho uyo owasimukusia Kristo okhurula mubafu alahana obulamu khumibili chienywe echifwitsanga khulwo Mwoyo uwe omenyanga mwinywe.

¹²Khulwe yako abaana befwe khuli abelikobi, nebutswa silili likobi eliokhumenya nikhulonda amang'ana komubili tawe.

¹³Okhuba nimuba nimumenya nimulonda amang'ana komubili, mwakhafwa. Nebutswa nimuba nimwiira emilimo chienywe chiesifwabwi khulwo Mwoyo, mulaba mwoyo.

¹⁴Yabo abemel'lwanga no Mwoyo wa Nyasaye nibo abaana ba Nyasaye.

¹⁵Okhuba Omwoyo owa Nyasaye yamuhelesia saali Omwoyo wokhumukhola abasumba nokhumuha oburi tawe: nebutswa no Mwoyo owokhumukhola abaana ba Nyasaye. Ne khulwo obunyali bwo Mwoyo tsana khulanjisianga “Abba,[1] Papa.”

¹⁶Omwoyo wa Nyasaye ahambananga nende emioyo chiefwe okhuboola mbu khuli abaana ba Nyasaye.

¹⁷Kho olwa khuli abaana ba Nyasaye khulanyoola tsikhabi tsiosi etsia Nyasaye yalamila abandu baabe ne khulasanga mubulame yibwo halala; obwa Nyasaye yabikhila Kristo. Okhuba nikhuba nikhusanga mubusalili halala na Kristo khulasanga mubukhongo bubwe khandi.

¹⁸Ndi nobusubili mbu okhusalila okhwa khuli n'nakhwo mumatukhu kano sibuli esindu nikakhaba khwakhabuchelania nende obukhongo obulibisulwa khwifwe.

¹⁹Esibala siosi silindil'langa nokhunaaya okhubisulwa khwabaana ba Nyasaye.

²⁰Okhuba esibala siali okhukhalachilwa esiina okhukosia lichoomo liasio; akarali khubulalilo bwasio tawe habula Nyasaye yenya kabe mbwo. Kata mbwo okhunaya khuliho

²¹mbu esibala siosi siakhalakhulwe litukhu lindi okhurula khubuhambe bwokhubola, nisisanga mubulakhuule obukhongo obwabaana ba Nyasaye.

²²Okhuba khumanyile mbu kata okhwola luno esibala siosi sibindanga mubusalili singa obwe inumwa yomukhasi owenya okhwibula.

²³Nebutswa sisili butswa esibala sionyene tawe; habula ifwe nefwe khandi abali no Mwoyo oli singa esiokhuranga khubihanwa bia Nyasaye, khubindanga mumioyo chiefwe olwa khusilindil'la Nyasaye akhukhole abaana baabe nakhukhola abalakhule kupu.

²⁴Okhuba khwahonibwa khulwo okhunaaya; nebutswa okhunaaya khubula obukhala nikakhaba khulolanga esichilanga nikhunaya. Okhuba ali hena onaayanga khusiene yisio esiamal'le okhulola?

²⁵Kho nikhuba nikhunaaya khusiakhuralolanga, khusilindil'langa nokhwesimilisia.

²⁶Khandi nimbwo Omwoyo akhukhonyel'langa mubutofu bwefwe. Okhuba sikhwamanya obwa khukwan'ne okhusaaya khu Nyasaye tawe; nebutswa Omwoyo mwene niye okhusaayilanga khu Nyasaye mukhubinda okhwa khuranyala okhwinoosia mumang'ana.

²⁷Ne Nyasaye ololanga mumioyo chiabandu niye owamanya ako Mwoyo yenya, sichila Omwoyo asaayanga khu Nyasaye khulwabandu be okhulondokhana nobwenyi bwa Nyasaye.

²⁸Nefwe khumanyile mbu mumang'ana kosi Nyasaye atiyanga okhuleera obulahi khubene yabo abamuyanza, yabo aba yalanga okhulondokhana nelichoomo lilie.

²⁹Yabo aba Nyasaye yekholel'la okhumanya khale yabara sibeka, babe singa Omwana uwe, mbu Omwana tsana abe omwibulwa owokhuranga mubaana babwe.

³⁰Abene yabo aba Nyasaye yara sibeka, yabalanga, ne yabo abayalanga, yababala okhuba abalunji ma nasanga obukhongo bubwe n'nabo.

³¹Khe khuboole mbwena khumang'ana kano? Nyasaye naba nali khulubeka lwefwe, niwina owakhakhuhinga?

³²Siyakhaba Nyasaye tawe; sichila Nyasaye siyabeelel'la Omwana uwe omutelwa tawe, habula yamuhaana khulwefwe fwesi. Ne naba niyakhola mbwo, salakhuhelesia ebindu biosi ebilahi khandi?

³³Niwina owakhasinjila okhusitaaka abelwa ba Nyasaye mwing'ana liosi? Nyasaye mwene abahinianga khwo esikha.

³⁴Kho niwina olibakhalachila esiina? Abulaho: Okhuba Yesu Kristo niye owafwa khandi nasimukusibwa okhurula mubafu ne ali khumukhono musatsa kwa Nyasaye. Ye akhusaayilanga ifwe khu Nyasaye.

³⁵Niwina owakhakhwabukhania nende obuyanzi bwa Kristo? Neminyakhano, nohomba om'booko, nohomba okhukhupibwa esibi, nohomba inzala, nohomba obutakha, nohomba akokhusandibwa, nohomba okhufwa?

³⁶Singa Amahandiko Amatsienukhu kaboolanga: “Khululwo ibe, khwirwanga om'basu kwosi; khubalwanga singa amakondi akatsitsanga okhwirwa.”

³⁷Nebutswa mumang'ana yako kosi khulekanga okhusila khulwe uyo, owali okhukhuyanza ifwe.

³⁸Okhuba ndamanya mbu sibulaho esiakhakhwabukhania khubuyanzi bubwe: kata olufu, nohomba obulamu; nohomba abamalaika, nohomba abobwami bomwikulu; nohomba amang'ana ka luno, nohomba amang'ana aketsanga, nohomba ebiobunyali;

³⁹Kata esili ikulu kata esili isi; sibulaho esindu mubilonge biosi, esiakhanyala okhukhwabukhania khubuyanzi bwa Nyasaye obuli obwefwe okhubir'ra mu Yesu Kristo Omwami wefwe.