Read lunyore BAROMA 9 Bible Online

BAROMA 9 - lunyore bible

BAROMA 9

¹Mboolanga akatooto; simbehanga tawe sichila ndi owa Kristo. Amakani kanje nikemel'lwanga no Mwoyo Omutsienukhu kangobokhelanga mbu simbehanga tawe,

²olwa mboolanga singa obwa okhubeelela khwanje khuli okhukali nende obwa okhutsuunwa khubula esichelo khuli mumwoyo kwanje

³khulwa abandu banje, abali abolwibulo lwanje! Khulwabwe ndakhekomba mbu ise mwene ndakhabeye musilaamo sia Nyasaye ma ndabukhanibwa okhurula khu Kristo.

⁴Yabo nibo abandu aba Nyasaye yela babe abaanabe, nabisula obukhongo bubwe khubo; yakhola indakano n'nabo, nabahelesia Amalako kaake, bali nokhwekayakaya khwatooto nende amasubisio ka Nyasaye.

⁵Yabo nabetsukhulu abarula khubakuka ba Bayahudi; ne Kristo singa Omundu wasiefwe yarula mulwibulo lwabwe. Nyasaye owamihanga ikulu wabiosi afumibwe. Amina.

⁶Simboolanga mbu lisubisio lia Nyasaye liakalukhana tawe; sichila sibali Abaisiraeli bosi abali abelwa ba Nyasaye tawe.

⁷Kata siluli olwibulolwosi olwa Aburahamu oluli abaana ba Nyasaye tawe. Nyasaye yabool'la Aburahamu, “Okhubir'ra mu Isaka nimwo omwa olinyoola abetsukhulu abandakhusubisia.”

⁸Yaka kaboolanga mbu, abaana abebuywe munjila yabandu bosi bebul'lwangamwo sibali abaana ba Nyasaye tawe; habula abaana abebuywe okhurulana khwisubisio lia Nyasaye nibo abakhalangwe abaana baabe.

⁹Lisubisio liene ndieli; “Ndakhakalukhe munyinga injomekhe ma Sara yakhanyoole omwana omusiani.”

¹⁰Ne sikali yako konyene tawe. Abaana ba Rebeka abasiani babili amakhwana bali na samwana mulala, kuka wefwe Isaka.

¹¹Nebutswa khulwa mbu okhwela khwa Nyasaye okhwo musiani mulala khunyala okhuba kupu likalusio khukelichooma lia Nyasaye mwene, Nyasaye yabool'la Rebeka, “Omukhulundu yakharumikhile omukhokosi.” Nyasaye yaboola yaka olwa bali mbasili okhwibulwa,

¹²nibasili okhukhola esindu siosi esilahi nohomba kata esibi. Khe okhwela khwa Nyasaye khwali okhweleta khumulango kukwe, ne tawe khusindu siosi esiabali nibakhol'le.

¹³Singa obwa Amahandiko Amatsienukhu kaboolanga, “Ndali okhuyanza Yakobo nebutswa nimubihil'lwa Esau.”

¹⁴Khe nakhuboole mbwena? Mbu Nyasaye naye alimwo obusiamu noho? Tseyi.

¹⁵Okhuba yabool'la Musa mbu, “Ndakhamubeele tsimbabasi omundu wosi owanyenyanga okhubeela tsimbabasi; ndimukhol'la obulahi omundu owanyenyele.”

¹⁶Khe sikali siesindu sieletanga khuko mundu yenyanga nohomba aka akholanga tawe, habula khutsimbabasi tsia Nyasaye tsionyene.

¹⁷Amahandiko Amatsienukhu kaboolanga khumuruchi we Misiri mbu, “Ndakhukhola omuruchi khulwa okhukhurumikhila okhumanyia obunyali bwanje mu ibe, ma okhulandia ifuma yanje musibala siosi.”

¹⁸Khe Nyasaye abeelanga tsimbabasi owayanzile okhubeela, ne khandi atinyianga omwoyo uyo owayanzile okhutinyia.

¹⁹Khe mulala khwinywe nayambool'le, “Nikaba yaka nimbwo kali, Nyasaye yakhanyala mbwena okhunyoola obubi mumundu wosi? Okhuba niwina owakhanyala okhuhingana nende obulalilo bwa Nyasaye?”

²⁰Ne nawe, niwe wina omulina wanje okhukalusia Nyasaye? Indabu eyalongwa sierebanga owachilonga, “Busina unongele mbu?”

²¹Kata mbwo omulonji ali nobunyali okhurumikhila litoyi singa obwa yenyele, ma alonge tsindabu tsibili okhurula mwibumbi elala elielitohi, ndala khutsio eli khulwa omukho kwoluyali neyindi khulwa oburumikhi uburali obwoluyali.

²²Kho akene nakatooto aka Nyasaye yakhola. Yenya okhumanyia oburima bubwe nende okhukhola obunyali bubwe bumanyikhe. Nebutswa yali omwesimilisi okhusila mukhwefwila yabo abali ebilonge bielirima lilie ebikwana okhwononibwa.

²³Khandi yenya okhumanyia obuhinda bwobukhongo bubwe obwasundulwa khwifwe abali ebilonge bietsimbabasi tsitsie, yabo khwifwe abayarechekha okhunyoola obukhongobwe.

²⁴Nifwe abandu abayali okhulanga, sikali okhurula mu Bayahudi bonyene tawe habula khandi okhurula mu Betsinzibulo tsindi.

²⁵Yaka niko aka Nyasaye aboolanga musitapu sia Hosea. “Abandu abarali banje; ndakhabalange ‘Abandu banje;’ Ne olwibulo olwa ndabula okhuyanza ndakhalulange ‘Omuyanzwa wanje.’

²⁶Habundu, bwene yaho aha baboolelwa, ‘Inywe simuli Abandu banje,’ habwene yaho balilangwa abaana ba Nyasaye olimwoyo.”

²⁷Ne Isaya alanjisianga aka Baisiraeli; “Kata nikakhaba amabalo kabaana ba Isiraeli namenji singa omuyekhe kwokhunyanza, nebutswa batititi khubo nibo abalihonibwa.

²⁸Okhuba Omwami yakhahesie bwangu akobuha bubwe kosi nende esibala.”

²⁹Kali singa obwa Isaya yaboola olwokhuranga, “Omwami Wobunyali alaba narakhulekhela khwo abetsukhulu, khane khwakhafwan'ne singa Sodoma, khwakhabeeye singa Gomora.”

³⁰Khe khuboole mbwena? Mbu: Abetsimbia tsindi abarenyanga khulunjisia obulamu bwabwe nende Nyasaye, banyoola obulunji okhubir'ra mubusubili;

³¹nebutswa Abaisiraeli abenyanga okhunyoola obulunji khulwa okhulonda Amalako sibamala nibahesia Amalako katsana tawe.

³²Khulwa sina? Khulwa mbu sibabukhaba munjila yobusubili tawe, habula khulwe emilimo. Kho besirala khwichina liokhwesiraasia;

³³singa obwa Amahandiko Amatsienukhu kal'lomangakhwo, “Lole reye mu Sayuni lichina, eliakhakhole abandu okhwesiraala, nilwo olwanda lwokhwesiralakhwo. Nebutswa omundu wosi osubilanga muye siyakhesikoke tawe.”