Read lunyore 1 BAKORINTHO 1 Bible Online

1 BAKORINTHO 1 - lunyore bible

1 BAKORINTHO 1

¹Ise Paulo, owalangwa okhuba omurumwa wa Yesu Kristo khulwa okhwenya khwa Nyasaye, halala nende Sositsene omukristo wasiefwe,

²khumuhandichilanga inywe abandu ba Nyasaye abali mwitookho lia Korintho, khu bosi abahulwa okhuba abandu ba Nyasaye abatsienukhu abali abaabe mu Yesu Kristo halala nende abandu bosi siahabundu hosi abekayakayanga Omwami wefwe Yesu Kristo, ouli Omwami wabwe, khandi owefwe.

³Nyasaye Papa wefwe nende Omwami Yesu Kristo bamuhelesie esirenda nende omulembe.

⁴Khupilanga Nyasaye embwo amatukhu kosi khulwenywe khulwe esirenda esia Nyasaye yamuhelesia okhubir'ra mu Yesu Kristo.

⁵Okhuba mu Kristo, mwahindihasibwa mumang'ana kosi, kata nende mubul'lomi bwosi.

⁶Amang'ana akaboolwa khu Kristo kamal'le okhutinyilisibwa mwinywe,

⁷mbu musili okhutakha khwo esihanwa siosi, olwa mulindil'langa okhubisulwa khwo Mwami wefwe Yesu Kristo.

⁸Naye alamutinyilisia okhwola khusihesi, nimurabbakhwo nesikha siosi Khwitukhu lio Mwami wefwe Yesu Kristo.

⁹Nyasaye nomusubilwa, owamulanga inywe okhwinjila mubuhambani bwo Mwanawe Yesu Kristo Omwami wefwe.

¹⁰Abaana befwe, khulwo obunyali bwo Mwami wefwe Yesu Kristo yambelesia, muhombanga mbu mwesi muhuchilisanienge mumang'ana kenywe kosi kho emiabukha chilekhe okhuba mwinywe. Muhambane kupu nomwoyo mulala nende amapaalo malala.

¹¹Abaana befwe, abalala okhurula munyumba ya Kiloe baabeye okhumbool'la mbu muli netsimemba hakari wenywe.

¹²Akanjoomanga okhuboola kali mbu: Siamulala khwinywe aboolanga mbu “Ise ndi owa Paulo”; oundi naye “Ise ndi owa Apolo”; oundi naye “Ise ndi owa Petero”; ne oundi mbu, “Ise ndi owa Kristo.”

¹³Kristo yakabukhana noho? Paulo niye owabambwa khumusalapa khulwe inywe noho? Nohomba mwabaputiswa okhuba abalondi ba Paulo?

¹⁴Khupilanga Nyasaye embwo sichila sindabaputisa khwo omundu wosi khwinywe narali Krispo nende Gayo bonyene.

¹⁵Kho abulaho onyala okhuboola mbu yali okhubaputiswa okhuba omulondi wanje.

¹⁶(Khandi ndabaputisa Stefano nende abeinyumba yiye. Ne sinyala okhwitsul'la nimba ndabaputisa oundi wosi, nibarali yabo tawe.)

¹⁷Kristo siyairuma okhubaputisa tawe. Yaaruma okhukamba Amang'ana Amalahi, ne sikhuli okhukamba namachesi kamang'ana tawe khase obunyali obwokhufwa khwa Kristo khumusalapa bulakoyokoyibwa.

¹⁸Amang'ana akokhufwa khwa Kristo khumusalapa nobuhingwa khu yabo abatibanga; ne khwifwe abahonibwanga, nakobunyali bwa Nyasaye.

¹⁹Amahandiko Amatsienukhu kaboolanga: “Ndakhononie obuchesi bwabachesi, nifukula obumanyi bwabalwenyukhu.”

²⁰Omuchesi ali hena? Omusomi ali hena? Nohomba kata abamahingani abalwenyukhu? Nyasaye wamanyia habulafu mbu obuchesi bwesibala yisi nobuhingwa!

²¹Nyasaye mubuchesi bubwe, yakakhola okhuba amatinyu khubandu okhumumanya khulwobuchesi bwabwe abene. Harali Nyasaye yayanza okhubahonia yabo abusubila munjila eyokhukamba yabachesi bomusibala balola nobuhingwa.

²²Abayahudi barunanga ebilolelo, nabo Abayunani barunanga obuchesi;

²³nebutswa ifwe khukambanga Kristo owali okhubambwa khumusalapa. Khu Bayahudi namang'ana kokhwesikarisia ne khu Bayunani, nakobuhingwa,

²⁴nebutswa khu yabo abalangwa, Abayahudi nende Abayunani bosi, Kristo nobunyali bwa Nyasaye khandi obuchesi bwa Nyasaye.

²⁵Esilolekhanga singa obuhingwa bwa Nyasaye sili nobuchesi okhuyomba obuchesi bwabandu. Ne esilolekhanga singa obutofu bwa Nyasaye sili netsingufu okhuyomba tsingufu tsiabandu.

²⁶Abaana befwe, mwitsul'le singa mwali olwa Nyasaye yamulanga. Abenji khwinywe simwali abakufu nohomba aboluyali khumapaalo kesinamundu tawe.

²⁷Nyasaye yali okhwela bwela ebindu ebiesibala silolanga nebihingwa kho asimbie abachesi emirwe, khandi Nyasaye yali okhwela ebindu ebiesibala silolanga okhuba ebitofu kho asimbie abetsingufu emirwe.

²⁸Nyasaye yeela ebindu ebiesibala silolanga singa ebibula ifuma, nibichaywa kata nende ebindu ebirali esindu, mbu afubie ebindu ebiesibala sifumianga.

²⁹Yaka kamanyianga mbu omundu namundu sianyala okhweitsoomia imbeli wa Nyasaye tawe.

³⁰Nyasaye mwene niye owamuhambania khu Yesu Kristo, khandi Nyasaye wamala okhukhola Kristo okhuba obuchesi bwefwe. Muye khubalwanga okhuba abalunji khu Nyasaye. Khubalwanga okhuba abandu ba Nyasaye abatsienukhu khandi khwakholwa abalakhuule nobununuli.

³¹Kho, singa obwa Amahandiko kaboolanga: “Owenyanga okhweitsoomia, yeitsoomia khuko Mwami amukholeye.”